លោក Luhut Binsar Pandjaitan រដ្ឋមន្ត្រីសម្របសម្រួលកិច្ចការដែនសមុទ្រ និងការវិនិយោគរបស់ប្រទេសឥណ្ឌូនេស៊ីបាននិយាយថា រោងចក្រអាគុយដែល Tesla មានបំណងសាងសង់នៅក្នុងប្រទេសឥណ្ឌូនេស៊ី អាចនឹងត្រូវបានសាងសង់នៅក្នុងតំបន់ឧស្សាហកម្មដ៏សំខាន់បំផុតមួយរបស់ប្រទេស។
យោងតាមរបាយការណ៍ តំបន់ឧស្សាហកម្មដ៏ធំមួយនោះ គឺមានទីតាំងស្ថិតនៅក្នុងខេត្ត North Kalimantan (Kaltara) របស់ប្រទេសឥណ្ឌូនេស៊ីដែលគ្របដណ្តប់លើផ្ទៃដីចំនួន 3 ម៉ឺនហិកតា។ លោករដ្ឋមន្ត្រីបានគូសបញ្ជាក់ថា តំបន់នេះអាចផលិតថាមពលវារីអគ្គិសនីបាន 1 ម៉ឺនមេហ្គាវ៉ាត់ ហើយក៏អាចបង្កើតថាមពលបន្ទះសូឡាបាន 1 ម៉ឺនមេហ្គាវ៉ាត់ផងដែរ។ ជាងនេះទៅទៀត ក្នុងតំបន់នេះអាចបង្កើតថាមពលបាន 2 ម៉ឺន 9 ពាន់មេហ្គាវ៉ាត់ពីឧស្ម័នធម្មជាតិទៀតផង។
.jpg)
នៅលើផ្ទៃដីទំហំ 3 ម៉ឺនហិកតា (115.8 ម៉ាយការ៉េ) ក្នុងបរិវេណតំបន់ Kaltara គឺជាការអភិវឌ្ឍន៍ឧស្សាហកម្មដ៏ធំបំផុតមួយនៅក្នុងពិភពលោក។ ការសាងសង់សួនឧស្សាហកម្មបានចាប់ផ្តើមនៅខែធ្នូ ឆ្នាំ 2021។ លោករដ្ឋមន្ត្រីបាននិយាយថា នេះគឺស្របទៅនឹងចក្ខុវិស័យរបស់មហាសេដ្ឋីផុតលេខលោក Elon Musk នៅក្នុងការអភិវឌ្ឍន៍តំបន់ឧស្សាហកម្ម Green Batteries និងការផលិតផលរថយន្ត។ គាត់ជឿថាសួនឧស្សាហកម្មឥណ្ឌូនេស៊ីអាចក្លាយជាជម្រើសដំបូងរបស់ Elon Musk។ លើសពីនេះ លោករដ្ឋមន្ត្រីអះអាងថា ក្រុមមួយមកពីក្រុមហ៊ុន Tesla បានធ្វើទស្សនកិច្ចនៅប្រទេសឥណ្ឌូនេស៊ី។ ក្រុមនេះក៏ត្រូវបានអញ្ជើញឱ្យទៅទស្សនកិច្ចនៅក្នុងមជ្ឈមណ្ឌលឧស្សាហកម្មនីកែលនៅ Morowali ផងដែរ។
ចំពោះរោងចក្រ Tesla Berlin Gigafactory បានបើកដំណើរការនៅថ្ងៃទី 22 ខែមីនា ដែលជារោងចក្រដ៏ធំដំបូងគេរបស់ Tesla នៅក្នុងតំបន់អឺរ៉ុប។ ការកើនឡើងនៃសង្វាក់ផលិតកម្មនៅរោងចក្រទីក្រុងប៊ែកឡាំង គឺមានសារៈសំខាន់ដោយសារតែក្រុមហ៊ុន Tesla មិនអាចផលិតរថយន្តនៅរោងចក្រសៀងហៃរបស់ខ្លួនសម្រាប់រយៈពេលបីសប្តាហ៍នៅក្នុងត្រីមាសទីពីរ។ រោងចក្រថ្មីចំនួនពីររបស់ Tesla គឺរោងចក្រ Berlin Gigafactory និង Austin រដ្ឋ Texas បានបើកដំណើរការឡើងវិញហើយ។
ដូចគ្នានេះផងដែរ ការចែកចាយរថយន្តអគ្គិសនី Tesla នៅត្រីមាសនេះគួរតែមានលក្ខណៈស្មើគ្នាជាមួយនឹងត្រីមាសទីមួយ ឬប្រហែល 31 ម៉ឺង គ្រឿង។នាយកប្រតិបត្តិក្រុមហ៊ុន Tesla លោក Elon Musk បាននិយាយពីមុនថា ទោះបីជាផលិតកម្មបានធ្លាក់ចុះក្នុងត្រីមាសទីពីរក៏ដោយ ក៏ផលិតកម្មរបស់ក្រុមហ៊ុននឹងកើនឡើងយ៉ាងខ្លាំងនៅក្នុងត្រីមាសទីបី និងទីបួន ដូច្នេះ ការនាំចេញ និងការលក់រថយន្តអគ្គិសនីរបស់ Tesla នឹងមានភាពល្អប្រសើរឡើងវិញក្នុងឆ្នាំនេះ៕
