កាលពីឆ្នាំមុននេះ ក្រុមហ៊ុន Toyota បានបញ្ចេញនូវរូបភាពជាច្រើនរបស់រថយន្តអគ្គិសនី Compact Cruiser EV នៅក្នុងទីក្រុងតូក្យូ ដែលនេះគឺជាប្រភេទរថយន្ត off-road ដែលមានរូបរាងតូច និងជាម៉ូដែលថ្មីមួយ ដែលបានធ្វើការរួមគ្នារវាងក្រុមហ៊ុន Toyota ហើយនិង Lexus ថែមទៀតផង។ នៅពេលនេះ ក្រុមហ៊ុនរថយន្តដ៏ធំមួយនេះ ក៏បានផ្តល់នូវរូបភាពដ៏អស្ចារ្យជាច្រើនអំពីការឌីស្សាញរបស់រថយន្តនេះនៅមុនពេលការបង្ហាញខ្លួនជាផ្លូវការផងដែរ។
បើមើលទៅលើរូបភាពរបស់រថយន្ត Compact Cruiser EV គឺជាពិតជាស្អាតខ្លាំងមែនទែន ហើយក៏ជាម៉ូដែលមួយដែល ទទួលបាននូវពានរង្វាន់ Car Design Award 2022 ចេញពីក្រុមហ៊ុន Auto & Design Magazine ផងដែរ។ ជាមួយនិងការបញ្ចេញរូបភាព ក្រុមហ៊ុន Toyota ក៏មានបង្ហាញនូវរូបភាពជាច្រើនរបស់រថយន្តនេះ ដែលចេញពីគំនូសព្រាងជាច្រើនរបស់រថយន្តនេះ។
ប្រភពខាងលើនេះ បានបន្តថា រថយន្ត Compact Cruiser EV នេះ គឺត្រូវបានគេឌីស្សាញចេញពី Toyota Europe Design Development Center នៅក្នុងទីក្រុង Nice ប្រទេសបារាំង។ សម្រាប់ម៉ូដែល Compact Cruiser EV គឺជាប្រភេទរថយន្ត all-wheel-drive ដែលមានការឌីស្សាញរូបរាងថ្មីយ៉ាងទាក់ទាញ។ យ៉ាងណាមិញ សម្រាប់ព័ត៌មានលម្អិតនៃលក្ខណៈបច្ចេកទេសរបស់រថយន្តនេះ គឺនៅមិនទាន់បានដឹងនៅឡើយទេ។ ក្រុមហ៊ុន Toyota នៅមិនទាន់បង្ហាញនូវព័ត៌មានលម្អិតអំពីកាលបរិច្ឆេទនៃការបង្ហាញវត្តមានរបស់រថយន្ត Compact Cruiser EV នេះនៅឡើយទេ៕
