ជឿជាក់ថា គ្រប់គ្នាគឺពិតជាបានដឹងហើយថា Xiaomi Car (Xiaomi Motors) គឺជាគម្រោងដ៏ធំមួយដែលក្រុមហ៊ុនបច្ចេកវិទ្យាដ៏លេចធ្លោរបស់ចិនមួយនេះ នឹងចាប់ផ្តើមក្នុងការផលិតនៅក្នុងពេលឆាប់ៗនេះហើយ។ បើតាមការបញ្ជាក់នៅក្នុងប្រភពផ្លូវការណ៍ជាច្រើន គឺបានអោយដឹងថា កាលពីថ្ងៃទី 27 ខែវិច្ឆិកានេះកន្លងទៅនេះ គណៈកម្មាធិកានៅក្នុងតំបន់អភិវឌ្ឍន៍សេដ្ឋកិច្ចនៃទីក្រុងប៉េកាំង និងក្រុមហ៊ុន Xiaomi Technology បានចុះហត្ថលេខានៅលើ "កិច្ចព្រមព្រៀងសហប្រតិបត្តិការ" រវាងភាគីទាំងពីរនេះហើយ។
ឯកសារនេះ ត្រូវបានគេទម្លាយថា ក្រុមហ៊ុន Xiaomi Motors នឹងមានទីតាំងនៅក្នុងតំបន់អភិវឌ្ឍន៍សេដ្ឋកិច្ចទីក្រុងប៉េកាំង។ គម្រោង Xiaomi Automobile ឬ Xiaomi Motors នឹងសាងសង់ឡើងជាមូលដ្ឋានទីស្នាក់ការកណ្តាល Xiaomi Automobile ទីស្នាក់ការលក់ និងទីស្នាក់ការស្រាវជ្រាវ និងការអភិវឌ្ឍ។ ក្រុមហ៊ុននេះនឹងបញ្ចប់នូវរោងចក្រផលិតរថយន្តរបស់ខ្លួនដែលអាចនឹងធ្វើការផលិតរថយន្តបានដល់ទៅ 300,000 គ្រឿង។
បន្ទាប់ពីរយៈពេលជិត 30 ឆ្នាំនៃការអភិវឌ្ឍ និងការសាងសង់ តំបន់អភិវឌ្ឍន៍សេដ្ឋកិច្ច និងបច្ចេកវិទ្យាប៉េកាំង (BETD) បានបង្កើតនូវឧស្សាហកម្មកម្រិតខ្ពស់នេះ។ ឧស្សាហកម្មនេះ គឺផ្តោតទៅលើ 4 ផ្នែកសំខាន់ៗនោះគឺបច្ចេកវិទ្យាព័ត៌មានកម្រិតខ្ពស់ (១) រថយន្តប្រណិត និងរថយន្តឆ្លាតវៃ (២) បច្ចេកវិទ្យាជីវសាស្រ្ត និងសុខភាព (៣) និងរ៉ូបូត និងការផលិតឆ្លាតវៃ (៤)។ នៅក្នុង 3 ត្រីមាសដំបូងនៅក្នុងឆ្នាំនេះ តំបន់អភិវឌ្ឍន៍សេដ្ឋកិច្ច និងបច្ចេកវិទ្យាទីក្រុងប៉េកាំង សម្រេចបាននូវ GDP ក្នុងតំបន់នូវទឹកប្រាក់ 193.48 billion yuan ($30.26 billion) ដែលមានកំណើនកើនឡើងពីឆ្នាំមុននេះ គឺ 38.8%៕