កាលពីថ្ងៃទី 14 ខែ កញ្ញា សប្តាហ៍មិន វីដេអូនៃការឆេះរថយន្តអគ្គិសនីទំនើបម៉ាក Porsche ត្រូវបានចែកចាយពីប្រព័ន្ធអ៊ីនធ័រណិតរបស់ប្រទេសចិន។ ប្រព័ន្ធផ្សព្វផ្សាយក្នុងប្រទេសចិន បានរាយការណ៍ថា រថយន្តអគ្គិសនីដែលឆាបឆេះសល់តែគ្រោងឆ្អឹងនោះ គឺម៉ាក Porsche Taycan EV ដែលបានឆាបឆេះនៅក្នុងទីក្រុង Suzhou ភាគខាងត្បូងនៃខេត្ត Jiangsu ស្ថិតនៅតំបន់ភាគខាងកើតប្រទេសចិន។
ប្រព័ន្ធផ្សព្វផ្សាយជាច្រើនបាននិយាយថារថយន្តអគ្គិសនី Porsche Taycan EV បានជូបឧបទ្ទវហេតុគ្រោះថ្នាក់ចរាចរ និងបានបង្កឲ្យបានភ្លើងឆាបឆេះភ្លាមៗ។ ក្នុងរបាយការណ៍បានបញ្ជាក់ថា រថយន្តបានបើកបុករបាំងការពារនៅជិតផ្សារទំនើបមួយកន្លែង ហើយក៏បានឆាបឆេះតែម្តង។ រំពេចនោះ អ្នកធ្វើដំណើរតាមដងផ្លូវ បានព្យាយាមជួយសង្គ្រោះអ្នកបើកបរ ប៉ុន្តែ ទ្វាររថយន្តបានជាប់គាំង និងមិនអាចបើកពីខាងក្រៅបាន ដែលជាហេតុនាំឱ្យអ្នកបើកបរវ័យក្មេងអាយុជាងសាមសិបឆ្នាំស្លាប់នៅក្នុងអណ្តាតភ្លើង។
ក្រោយមក វីដេអូមួយនេះបានរីករាលដាលនៅលើប្រព័ន្ធផ្សព្វផ្សាយសង្គមចិន ដែលបង្ហាញពីមនុស្សជុំវិញរថយន្តអគ្គិសនីដែលបានឆេះនោះ ព្យាយាមជួយអ្នកបើកបរ ប៉ុន្តែ ឥតប្រយោជន៍ ខណៈដែលរថយន្តបានផ្ទុះឆេះ។ គេនៅមិនទាន់ដឹងពីមូលហេតុ និងមូលហេតុពិតប្រាកដនៃគ្រោះអគ្គិភ័យឆាបឆេះរថយន្តអគ្គិសនីទំនើបម៉ាក Porsche នេះនៅឡើយទេ ។
នេះជាឧបទ្ទវហេតុទី 3 ក្នុងរយៈពេល 4 ខែចុងក្រោយដែលរថយន្ត Porsche ត្រូវបានអគ្គីភ័យឆាបឆេះ ដោយ 2 ក្នុងចំណោមរថយន្តទាំងនោះ គឺជារថយន្តដែលទើបចេញថ្មីៗនេះ។ កាលពីថ្ងៃទី 12 ខែសីហា រថយន្ត Porsche Panamera EV ស្រាប់តែបានឆាបឆេះ ប៉ុន្តែ អ្នកបើកបរ និងអ្នករួមដំណើរបានឃើញផ្សែងហុយចេញពីកៅអីអ្នកបើកបរ រំពេចនោះអ្នកបើកក៏បានឈប់រថយន្តយ៉ាងប្រញាប់ ហើយប្រញាប់ប្រញាល់ចេញមកក្រៅរថយន្តក្នុងរយៈពេលប៉ុន្មានវិនាទី នៅមុនពេលរថយន្តទាំងមូលត្រូវបានផ្ទុះឆេះ។ មួយករណីទៀត គឹនៅថ្ងៃទី 13 ខែមិថុនា នៅទីក្រុង Suzhou គេបានឃើញរថយន្ត Porsche ឆេះដោយឯកឯង ដោយក្នុងករណីថ្មីនេះ អ្នកបើកបរ និងអ្នករួមដំណើរ ក៏មានសំណាង ហើយអាចរត់គេចខ្លួនបាន មុនពេលរថយន្តត្រូវឆេះទាំងស្រុង។
ទិន្នន័យថ្មីៗដែលចេញផ្សាយដោយនាយកដ្ឋានគ្រប់គ្រងគ្រោះអាសន្នជាតិ (National Emergency Management Department) បានបញ្ជាក់ថា នៅត្រីមាសទីមួយនៃឆ្នាំ 2022 មានការឆេះរថយន្តអគ្គិសនីចំនួន 640 ករណី។ ដែលតួលេខនេះមានការកើនឡើង 32ភាគរយ ធៀបកាលពីមួយឆ្នាំទៅមួយឆ្នាំ។ ទោះជាយ៉ាងណាក៏ដោយ សម្រាប់រថយន្តដែលដំណើរការដោយចំហេះខាងក្នុង (ប្រើឥន្ធនៈ) មានអត្រាកំណើន គឺត្រឹមតែ 8.8% ប៉ុណ្ណោះ។ អគ្គីភ័យឆាបឆេះរថយន្តចំនួន 3 ករណី និងស្លាប់ម្នាក់នៅក្នុងរថយន្ត Porsche ក្នុងប្រទេសចិនបាននាំឱ្យមានសំណួរចោទសួរអំពីសុវត្ថិភាព និងប្រព័ន្ធសុវត្ថិភាពនៃរថយន្តអគ្គិសនី (EVs) ដែលប្រើប្រាស់នៅក្នុងប្រទេសចិនថែមទៀតផង៕