BYD នឹងចាប់ផ្តើមសង្វាក់ផលិតកម្មរថយន្តអគ្គិសនីប្រើបច្ចេកវិទ្យាថ្មថ្មី Sodium-ion ទ្រង់ទ្រាយធំនៅត្រីមាសទី 2 ក្នុងឆ្នាំ 2023

ក្រុមហ៊ុនផលិតរថយន្តដំណើរការដោយថាមពលអគ្គិសនីដែលកំពុងមានទីផ្សារស្ទុះខ្លាំងរបស់ប្រទេសចិន BYD ឬ Build Your Dreams បានសហការជាមួយក្រុមហ៊ុនផលិតថ្មអគ្គិសនី ឬអាគុយអគ្គិសនី CATL ប្រកាសចេញថ្មអគ្គិសនីថ្មីប្រភេទ Sodium-ion Battery ដែលក្រុមហ៊ុន BYD នឹងក្លាយជាក្រុមហ៊ុនដំបូងដែលនឹងនាំយកផលិតផលរថយន្តដែលបំពាក់អាគុយប្រើបច្ចេកវិទ្យាថ្មីនេះចូលទៅកាន់ទីផ្សារមុនគេ។ ក្រុមហ៊ុនផលិតរថយន្តអគ្គិសនីល្បីឈ្មោះរបស់ប្រទេសចិនមួយនេះបានប្រកាសពីគម្រោងក្នុងការផលិតរថយន្តដែលបំពាក់បច្ចេកវិទ្យាអាគុយអគ្គិសនីថ្មីនេះទ្រង់ទ្រាយធំចាប់ពីត្រីមាសទីពីរក្នុងឆ្នាំ 2023 ទៅ។

បើតាមប្រព័ន្ធផ្សព្វផ្សាយក្នុងប្រទេសចិនបានរាយការណ៍ថា FinDreams-BYD បាននឹងកំពុងស្ថិតក្នុងដំណាក់កាលអភិវឌ្ឍន៍ទៅលើគំរូអាគុយ Sodium-ion ហើយសម្រាប់សង្វាក់ផលិតកម្មអាគុយប្រភេទថ្មីនេះលក្ខណៈទ្រង់ទ្រាយធំនឹងចាប់ផ្តើមក្នុងរយះពេលប៉ុន្មានខែខាងមុខទៀតនេះ។ យោងតាមរបាយការណ៍ស្រដៀងគ្នានេះ បាននិយាយថា រថយន្តអគ្គិសនីរបស់ BYD ដំបូងដែលបំពាក់បច្ចេកវិទ្យាថ្ម Sodium-ion Battery Packs គឺមាននូវម៉ូដែលដូចជា Qin EV, Dolphin និងម៉ូដែលថ្មី Seagull ជាដើម។ ដែលរថយន្តទាំងបីម៉ូដែលនេះ គឺមានតម្លៃខ្ទង់ប្រហែល $13,980 នៅក្នុងទីផ្សារប្រទេសចិន។ BYD បានលក់រថយន្តអគ្គិសនីបានចំនួន 1.46 លានគ្រឿងនៅអំឡុងខែមករា ដល់ខែតុលា ក្នុងឆ្នាំ 2022 នេះ ដែលមានកំណើនក្នុងការលក់ប្រមាណ 37% នៅក្នុងការលក់រថយន្តអគ្គិសនីសរុបក្នុងប្រទេសចិន។

CATL គឺជាក្រុមហ៊ុនដំបូងគេដែលបានប្រកាសចេញបច្ចេកវិទ្យាអាគុយអគ្គិសនី Sodium-ion កាលពីដើមឆ្នាំ 2022។ ហើយ BYD ក៏បានប្រកាសចេញក្រុមហ៊ុននឹងប្រើបច្ចេកវិទ្យាអាគុយអគ្គិសនីថ្មីនេះដំបូងគេនៅលើរថយន្តរបស់ខ្លួន។ CATL បានបញ្ជាក់ថាបច្ចេកវិទ្យាអាគុយថ្មីនេះ គឺផ្តល់នូវថាមពលខ្លាំងដល់ 160Wh/Kg និងបានបញ្ជាក់ថា គឺជាបច្ចេកវិទ្យាអាគុយអគ្គិសនីដែលផ្តល់នូវថាមពលខ្លាំងក្លាបំផុតក្នុងលោកសម្រាប់បច្ចេកវិទ្យាអាគុយអគ្គិសនីថ្មីមួយនេះ។ ទោះជាយ៉ាងណាបច្ចេកវិទ្យាអាគុយ Sodium-ion battery នឹងមិនអាចជំនូសដំណែងអាគុយប្រើបច្ចេកវិទ្យា Lithium-ion Technology  បាននោះទេ ប៉ុន្តែ បច្ចេកវិទ្យាអាគុយថ្មីនេះនឹងចូលខ្លួនមកដោះស្រាយសម្រាប់ការផលិតរថយន្តអគ្គិសនីដែលមានតម្លៃធូរថ្លៃ ហើយ CATL រំពឹងថា Sodium-ion battery នឹងមានការប្រើប្រាស់ទូលំទូលាយសម្រាប់ក្រុមហ៊ុនផលិតរថយន្តក្នុងការផលិតរថយន្តអគ្គិសនីដែលមានតម្លៃធូរថ្លៃនាពេលអនាគត៕