Ford Motor ពិចារណាឡើងវិញស្តីការផ្លាស់ប្តូរសង្វាក់ផលិតកម្មរថយន្តរបស់ខ្លួន ទៅផលិតរថយន្តអគ្គិសនីសុទ្ធនៅឆ្នាំ 2030

នៅពេលដែលក្រុមហ៊ុន Ford បានប្រកាសពីផែនការដើម្បីធ្វើការផ្លាស់ប្តូរខ្សែសង្វាក់រថយន្តដឹកអ្នកដំណើរទាំងមូលរបស់ខ្លួននៅក្នុងទ្វីបអឺរ៉ុបនៅឆ្នាំ 2030 វាគឺជាគម្រោងការដ៏សំខាន់បំផុតមួយនៅក្នុងឧស្សាហកម្មផលិតរថយន្តរបស់ក្រុមហ៊ុនអាមេរិកមួយនេះ។ ទោះជាយ៉ាងណាក៏ដោយ នៅប៉ុន្មានឆ្នាំក្រោយមក ម៉ាកយីហោរថយន្តអាមេរិកដ៏ល្បីល្បាញបំផុតក្នុងពិភពលោកមួយនេះ បាននឹងកំពុងដំណើរការកែសម្រួលយុទ្ធសាស្រ្តរបស់ខ្លួនចូលក្នុងទីផ្សាររថយន្តអគ្គិសនីបន្តិចម្តងៗ ដោយបង្ហាញឱ្យឃើញថា ការផ្លាស់ប្តូរជាយុទ្ធសាស្តរនេះអាចនឹងដំណើរការយឺតជាងការរំពឹងទុកកាលពីលើកដំបូងរបស់ក្រុមហ៊ុន។

លោក Martin Sander អ្នកគ្រប់គ្រងទូទៅនៃក្រុមហ៊ុន Ford នៃអឺរ៉ុបបានទទួលស្គាល់នូវបញ្ហាប្រឈមសម្រាប់ដំណើរការក្នុងការផ្លាស់ប្តូរខ្សែសង្វាក់ផលិតរថយន្តរបស់ក្រុមហ៊ុនមានភាពយឺតយ៉ាវជាងការរំពឹងទុក។ ហើយជាលទ្ធផល ក្នុងពេលនេះក្រុមហ៊ុនបើកទូលាយក្នុងការបន្តផលិតរថយន្តដែលដំណើរការម៉ាស៊ីនចំហេះខាងក្នុង (ICE) ក្នុងទសវត្សរ៍ក្រោយ ប្រសិនបើទីផ្សាររថយន្តរបស់ខ្លួននៅតែមានភាពល្អប្រសើរ។

គម្រោងក្នុងការផ្លាស់ប្តូរវិធីសាស្រ្តថ្មីចូលក្នុងឧស្សាហកម្មរថយន្តអគ្គិសនី គឺបង្ហាញពីតុល្យភាពដ៏ល្អដែលក្រុមហ៊ុនផលិតរថយន្តត្រូវតែធ្វើដើម្បីកែប្រែពិភពលោកឆ្ពោះទៅរកបរិស្ថានបរិសុទ្ធដោយគ្មានការបំភាយឧស្ម័នចេញពីរថយន្តចូលទៅក្នុងបរិយាកាស។ ទោះជាយ៉ាងណាការផ្លាស់ប្តូរសង្វាក់ផលិតកម្មរថយន្តបែបប្រពៃណី ឬរថយន្តប្រើម៉ាស៊ីនចំហេះក្នុង (ICE) ទៅរថយន្តអគ្គិសនី គឺមានការចំនាយទុនវិនិយោគខ្ពស់ ម៉្យាងវិញទៀត ក្រុមហ៊ុនផលិតរថយន្តមិនអាចបោះបង់ចោលនូវគំរូប្រពៃណីរបស់ពួកគេក្នុងរយះពេលខ្លីបាននោះទេ ជាពិសេសខណៈពេលដែលតម្រូវការសម្រាប់រថយន្តដែលប្រើថាមពល ICE នៅតែមានតម្រូវការប្រើប្រាស់។

ដំណើររបស់ Ford ក្នុងការកែប្រែសង្វាក់ផលិតកម្មរថយន្តពី ICE ទៅរថយន្ត EV នៅអឺរ៉ុប គឺកំពុងស្ថិតក្នុងដំណើរសិក្សានៅឡើយ។ ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុន Ford បានបញ្ឈប់ការផលិតរថយន្តម៉ូដែលពេញនិយមរបស់ខ្លួនមួយចំនួនដូចជា ម៉ាក Mondeo, Fiesta, S-MAX និង Focus ដែលនេះ គឺបង្ហាញថា Ford កំពុងតម្រង់ទិសឆ្ពោះទៅរកការផលិតរថយន្តអគ្គិសនីថ្មីទាំងស្រុងនាពេលខាងមុខ។ ជាមួយគ្ននេះ Ford Puma Gen-E ដែលជាកំណែអគ្គិសនីពេញលេញជាប្រភេទរថយន្ត subcompact crossover និងម៉ូដែល Explorer SUV ក៏ជារថយន្តអគ្គិសនីសុទ្ធត្រូវបានបង្កើតឡើងដោយប្រើទម្រង់ MEB Platform របស់ក្រុមហ៊ុន Volkswagen។

ក្រុមហ៊ុនផលិតរថយន្តម៉ាកល្បីៗបំផុតក្នុងពិភពលោកដោយជា Volkswagen Group និង Stellantis ដែលជាក្រុមហ៊ុនមេគ្រប់គ្រងលោកម៉ាករថយន្តប្រណិតដូចជា Peugeot និង Citroen ជាដើម បាននឹងប្រើយុទ្ធសាស្ត្រដូចគ្នានឹងក្រុមហ៊ុន Ford Motor ដែរ គឺការបន្តផលិតរថយន្តដំណើរការដោយប្រើម៉ាស៊ីន (ICE) និងធ្វើការវិវត្តន៍ឧស្សាហកម្មរថយន្តរបស់ខ្លួនបន្តិចម្តងៗចូលទៅកាន់ទីផ្សាររថយន្តអគ្គិសនីពេញលិញក្នុងពេលអនាគត មានន័យថា បច្ចុប្បន្នក្រុមហ៊ុនទាំងនេះ នៅតែបន្តផលិត និងចែកចាយរថយន្តប្រភេទ ICE រួមនិងរថយន្តអគ្គិសនីរបស់ពួកនៅលើទីផ្សារ។ ដូចនេះ ចាំមើល Ford អាចមានលទ្ធភាពគ្រប់គ្រាន់ក្នុងការផ្លាស់ប្តូរខ្សែសង្វាក់ផលិតកម្មរថយន្តរបស់ខ្លួនទៅផលិតរថយន្តអគ្គិសនីទាំងស្រុងក្នុងឆ្នាំ 2030 បានដែរ ឬយ៉ាងណា៕