Fang Cheng Bao Bao 8 ឬ Leopard 8 ត្រូវបានបង្ហាញដោយនិយតករនៅក្នុងប្រទេសចិន ដែលបង្ហាញពីលក្ខណៈសំខាន់ៗមួយចំនួននៃរថយន្តប្រភេទ SUV ដ៏រឹងមាំស៊េរីថ្មីមួយនេះ។ Fang Cheng Bao គឺជាម៉ាកយីហោរថយន្តថ្មីមួយទៀតដែលស្ថិតក្រោមការគ្រប់គ្រង់ដោយ BYD។ ស្លាកយីហោរថយន្តមួយនេះត្រូវបាន BYD ប្រកាសចេញដំបូងក្នុងខែសីហា ឆ្នាំ 2023 ហើយរថយន្តដំបូងរបស់ Fang Cheng Bao ដែលចេញលក់នៅលើទីផ្សារ គឺម៉ូដែល Fang Cheng Bao 5 ដែលបានប្រកាសចេញក្នុងខែវិចិ្ឆកា ចំនែកម៉ូដែល Fang Cheng Bao Bao 8 គឺជាម៉ូដែលទីពីរចេញពីម៉ាកយីហោមួយនេះ។
កាលពីថ្ងៃទី 12 ខែ ឧសភា កន្លងទៅក្រសួង Ministry of Industry and Information Technology (MIIT) របស់ប្រទេសចិន បានរាយការណ៍ថា BYD ដែលជាក្រុមហ៊ុនមេបានដាក់ពាក្យស្នើរសុំសម្រាប់ការចេញលក់រថយន្តស៊េរីថ្មីរបស់ខ្លួនម៉ូដែល Fang Cheng Bao Bao 8 ក្នុងទីផ្សារប្រទេសចិនជាមួយការបង្ហាញរូបភាពរថយន្តដែលនឹងត្រូវផលិតផងដែរ។ សូមបញ្ជាក់ថា គ្មានរថយន្តណាមួយត្រូវបានចេញលក់ក្នុងទីផ្សារប្រទេសចិន ដោយពុំមានការយល់ព្រមពីស្ថាប័ន MIIT ជាមុននោះទេ។ ទោះជាយ៉ាងណា BYD មិនសូវជាសប្បាយចិត្តនោះទេ ដោយសារតែស្ថាប័នបានធ្វើការបញ្ចេញព័ត៌មានដូចជារូបភាព និងលក្ខណៈសម្បត្តិរបស់រថយន្តថ្មីរបស់ខ្លួនដែលមិនទាន់ត្រូវបានប្រកាសចេញ។
បើតាមការបង្ហាញនៅលើបញ្ចីរបស់ស្ថាប័ន MIIT បានឲ្យដឹងថា Fang Cheng Bao Bao 8 គឺជារថយន្ត SUV ខ្ពស់ធំ ឬ Full-side SUV ដែលមានប្រវែងបណ្តោយ 5.2 ម៉ែត្រ ជាមួយជម្រើស 6 កៅអី និង 7កៅអី។ រថយន្តស៊េរីថ្មីនេះមានទទឹង1,994mm, កម្ពស់ 1,875 mm និងចន្លោះរវាងកង់មុខទៅកងក្រោយ 2,920mm ជាមួយទំងន់ប្រមាណ 3,905 គីឡូក្រាម។ ដូចគ្នានឹងជំនាន់ទីមួយ Bao 5 ដែល ដោយ Bao 8 គឺមានម៉ូដែល Extended-range electric vehicle (EREV) ដែលមានន័យថា Fang Cheng Bao Bao 8 នឹងមានបំពាក់ម៉ាស៊ីន (ICE) គ្រាន់តែម៉ាស៊ីនមិនអាចដំណើរការសម្រាប់ដំណើរការរបស់រថយន្តនោះទេ ដោយម៉ាស៊ីននេះ គឺប្រើសម្រាប់ផ្តល់ថាមពលទៅឲ្យកញ្ចប់អាគុយ ឬក៏ម៉ូទ័រអគ្គិសនីរបស់រថយន្ត។ ដោយម៉ាស៊ីនដែលបំពាក់នៅលើ Bao 8 ជាប្រភេទម៉ាស៊ីន 2.0 Turbo ដែលអាចផលិតកំលាំង 200kW។
Fang Cheng Bao Bao 8 ប្រើប្រាស់ប្រព័ន្ធម៉ូទ័រអគ្គិសនីចំនួនពីរ ដោយម៉ូទ័រខាងមុខអាចផលិតកំលាំង 200kW និងម៉ូទ័រខាងក្រោយអាចផលិតកំលាំង 300kW ដែលសរុបកំលាំងម៉ូទ័រទាំងពីរអាចធ្វើបានដល់ 700kW ឬ 939 សេះ ហើយអាចជាន់ស្ទុះល្បឿនពី 0 ទៅ 100km/h ប្រើពេល 4.8 វិនាទី និងអាចជាន់លឿនលឿនបំផុត Top Speed ដល់ 180km/h។ រថយន្តនេះ SUV ស៊េរីថ្មីនេះ ប្រើប្រាស់កញ្ចប់អាគុយអគ្គិសនីប្រភេទ lithium iron phosphate Blade battery (LFP) របស់ BYD ផ្ទាល់ ដែលផលិតដោយក្រុមហ៊ុនបុត្រសម្ព័ន្ធ FinDreams ប៉ុន្តែ ទំហំអាគុយមិនទាន់ត្រូវបានបញ្ជាក់នៅឡើយទេ។
Fang Cheng Bao Bao 8 ត្រូវបានផលិតឡើងដោយប្រើទម្រង់គ្រោងឆ្អឹងថ្មី DMO platform របស់ BYD ជាប្រភេទគ្រោងឆ្អឹងសម្រាប់រថយន្ត off-road និងបំពាក់នូវប្រព័ន្ធ Disus-P suspension system។ Fang Cheng Bao Bao 8 ឬ Leopard 8 នឹងចេញលក់នៅលើទីផ្សារក្នុងប្រទេសចិននៅក្នុងត្រីមាសទី 3 ឆ្នាំនេះ ជាមួយតម្លៃប្រហែល 500,000 យាន់ ឬប្រហែល 7 ម៉ឺនដុល្លារអាមេរិក៕
