បើតាមរបាយការណ៍ចេញពីស្ថាប័នចុះបញ្ចីរថយន្តរបស់ប្រទេសចិន China Passenger Car Association បានឲ្យដឹងថា ទីផ្សារលក់រថយន្តក្នុងប្រទេសចិននៅតែបន្តមានភាពរឹងមាំដោយនៅក្នុងខែសីហា មានរថយន្តថ្មីប្រមាណ 2.033 លានគ្រឿងត្រូវបានលក់។ តួរលេខនេះបង្ហាញថា មានការកើនឡើងប្រមាណ 0.7% ធៀបនឹងខែកញ្ញា និង 10.2% ធៀបពីមួយឆ្នាំទៅមួយឆ្នាំ។
នៅក្នុងចំនួនរថយន្តដែលបានលក់ក្នុងខែតុលា គឺមានរថយន្តដំណើរការដោយថាមពលអគ្គិសនីសុទ្ធ (NEVs) មានចំនួន 195,000 គ្រឿង និងប្រភេទ Plug-in Hybrid (PHEV) មានចំនួន 272,000 គ្រឿង។ ហើយរថយន្តប្រភេទ NEVs មានចំនួនប្រមាណ 37,7% នៅក្នុងចំនួនរថយន្តដែលបានលក់សរុប។ ក្រុមហ៊ុន BYD នៅតែជាក្រុមហ៊ុនដែលមានទីផ្សារលក់ល្អជាងគេនៅក្នុងទីផ្សាររថយន្តប្រទេសចិន ក្រុមហ៊ុន Top 1 របស់ប្រទេសចិនមួយនេះលក់រថយន្តបានចំនួន 246,389 គ្រឿងក្នុងខែតុលា ដោយក្តោបក្តាប់ចំនែកទីផ្សារប្រមាណ 12.12%។
ចំនែកក្រុមហ៊ុន Volkswagen ឈរនៅលេខរៀងទីពីរបន្ទាប់ពី BYD ជាមួយការលក់រថយន្តបានចំនួន 198,210 គ្រឿង មានចំនែកទីផ្សារសរុប 9.75% និងលេខរៀងទី 3 បានទៅលើក្រុមហ៊ុន Toyota ដោយលក់រថយន្តបានចំនួន 151,003 គ្រឿង ទទួលបានចំនែកទីផ្សារសរុប 7.43%។ ដោយឡែកក្រុមហ៊ុន Honda របស់ជប៉ុនវិញឈរនៅលេខរៀងទី 4 ដោយលក់រថយន្តបានចំនួន 130,221 គ្រឿង ទទួលបានចំនែកទីផ្សារ 6.41% រីក្រុមហ៊ុន Geely ឈរនៅលេខរៀងទី 5 ដោយលក់រថយន្តបានចំនួន 92,770 គ្រឿង មានចំនែកទីផ្សារ 4.56%។
សម្រាប់រថយន្តរបស់ BYD ដែលមានទីផ្សារលក់បំផុតប្រចាំខែតុលា គឺមានចំនួន 3 ម៉ូដែល ដោយក្នុងនោះមានម៉ូដែល BYD Qin Plus លក់ចំនួន 37,902 គ្រឿង, ម៉ូដែល BYD Seagull លក់បានចំនួន 37,836 គ្រឿង និងម៉ូដែល BYD Song Plus លក់បានចំនួន 34,799 គ្រឿង៕
