ក្តៅៗ Lexus ប្រកាសឈប់លក់ម៉ូដែល NX 250 ទៀតហើយ សម្រាប់ស៊េរីឆ្នាំ 2026

ក្រុមហ៊ុនផលិតឡានជប៉ុន Lexus បានប្រកាសថានឹងលែងផ្តល់ជម្រើសម៉ូដែល NX 250 ទៀតហើយ សម្រាប់ស៊េរីឆ្នាំ 2026 ដោយចាប់ផ្តើមពីម៉ូដែល NX 350 ដែលមានតម្លៃចាប់ពីខ្ទង់ $46,000 ឡើងទៅ សម្រាប់ទីផ្សារសហរដ្ឋអាមេរិក។

ចំពោះ Lexus NX 350 ឆ្នាំ 2026 នៅតែប្រើម៉ាស៊ីនសាំង ចំណុះ 2.4L Turbo ទំហំ 4 ស៊ីឡាំង មានកម្លាំង 275 HP និង កម្លាំងរមួល 430 NM ដំណើរការដោយប្រអប់លេខអូតូ 8 វគ្គ និង ប្រព័ន្ធបើកបរប៉ុង 2 (AWD) មកស្តង់ដារតែម្តង អនុញ្ញាតឲ្យវាអាចរត់ស្ទុះពីកុងទ័រ 0-100 KM/H ប្រើពេលត្រឹមតែ 6.6 វិនាទីប៉ុណ្ណោះ ហើយមានកម្រិតស៊ីសាំងជាមធ្យម 9.8L/100KM។

សម្រាប់ស៊េរីឆ្នាំ 2026 Lexus ក៏បានបន្ថែមនូវម៉ូដែល NX 350h ប្រើប៉ុង 1 (FWD) ដែលមានតម្លៃចាប់ពីខ្ទង់ $45,000 ដោយបំពាក់ម៉ាស៊ីន Hybrid ចំណុះ 2.5L ទំហំ 4 ស៊ីឡាំង មានកម្លាំង 240 HP វាអាចរត់ស្ទុះពីកុងទ័រ 0-100 KM/H ប្រើពេលត្រឹមតែ 8.2 វិនាទី និង មានកម្រិតស៊ីសាំងជាមធ្យម 5.8L/100KM ខណៈម៉ូដែល NX 350h ប៉ុង 2 (AWD) ប្រើពេលត្រឹម 7.2 វិនាទីប៉ុណ្ណោះ ហើយមានតម្លៃចាប់ពីខ្ទង់ $47,000។

អ្វីដែលរឹតតែពិសេសនោះគឺ សម្រាប់ម៉ូដែល Hybrid ឥឡូវនេះក៏អាចបន្ថែម Option F-Sport និង ពណ៌សថ្មី ហៅថា Ultra White ផងដែរ។ បន្ថែមពីនេះ សម្រាប់ម៉ូដែល Lexus NX 450h+ ឆ្នាំ 2026 ឥឡូវនេះ មានថែមជម្រើស Premium ដែលមានតម្លៃចាប់ពីខ្ទង់ $59,000 ខណៈជម្រើស Luxury គឺ $63,000។

ថ្វីបើមានតម្លៃធូរជាងមែន ប៉ុន្តែ NX 450h+ Premium ក៏បានបំពាក់ Option ទំនើបៗមកជាច្រើនដែរ ដូចជា កៅអីមុខក្តៅត្រជាក់, ដៃចង្កូតមានមុខងារកម្តៅ អាចចុចសារ៉េអូតូបាន, កញ្ចក់មើលក្រោយឌីជីថល, ដំបូលកញ្ចក់, Speaker 10 គ្រាប់ និង អេក្រង់កម្សាន្ត ទំហំ 14 អ៊ីញ ព្រមទាំង កុងទ័រឌីជីថល ទៀតផង៕