Peugeot 308 ស៊េរីថ្មីឆ្នាំ 2026 ដែលជារថយន្តប្រភេទ Hatchback ដ៏ល្បីរបស់ក្រុមហ៊ុនប្រទេសបារាំង នឹងបង្ហាញវត្តមាននៅទីផ្សារអូស្រ្តាលីនាពាក់កណ្តាលឆ្នាំ 2026។ រថយន្តស៊េរីថ្មីមួយនេះបានបង្ហាញវត្តមាននៅទីផ្សារអឺរ៉ុបរួចហើយ នៅមុនការបង្ហាញខ្លួននៅទីផ្សារអូស្រ្តាលីនាឆ្នាំក្រោយនេះ។ 2026 Peugeot 308 ត្រូវបានក្រុមហ៊ុនធ្វើការកែប្រែការឌីស្សាញផ្នែកខាងមុខថ្មីខុសពីជំនាន់មុនជាមួយការឌីស្សាញផ្ទាំង Grille, bumper និងចង្កៀងមុខថ្មី ព្រមទាំងបង្កើនសមត្ថភាពបើកបរបានចម្ងាយឆ្ងាយជាងមុនសម្រាប់ម៉ូដែលអគ្គិសនី E-308 ផងដែរ។
.jpg)
ក្រុមហ៊ុនផលិតរថយន្តបារាំងមួយនេះ មានរំពឹងខ្ពស់ទៅលើការលក់កើនឡើងសម្រាប់ Peugeot 308 ជំនាន់ថ្មីឆ្នាំ 2026។ បើតាមរបាយការណ៍បានឲ្យដឹងថា Peugeot 308 ដែលកំពុងមានវត្តមានលក់នៅទីផ្សារអូស្រ្តាលីបច្ចុប្បន្ន គឺលក់បានចំនួន 57 គ្រឿងប៉ុណ្ណោះក្នុងឆ្នាំនេះ ដែលបាននាំមុខរថយន្ត Roll-Royce ដែលលក់បានចំនួន 41 គ្រឿង ប៉ុន្តែ តាមពីក្រោយរថយន្ត Bently ដែលលក់បានចំនួន 68 គ្រឿង, Aston Martin លក់បានចំនួន 108 គ្រឿង និង Ferrari ចំនួន 121។ ក្នុងរយៈពេលដូចគ្នានេះ ក្រុមហ៊ុនតូយ៉ូតារបស់ជប៉ុន ត្រូវបានរាយការណ៍ពីការលក់រថយន្ត Corolla បានចំនួន 11,322 គ្រឿង ខណៈរថយន្ត Volkswagen Golf ដែលជាគូប្រជែងតម្លៃ $48,990 ជាមួយ Peugeot 309 លក់បានចំនួន 1,952 គ្រឿង។
បើតាមអ្នកនាំពាក្យរបស់ក្រុមហ៊ុន Peugeot Australia បានប្រាប់ឲ្យដឹងថា Peugeot 306 ឆ្នាំ 2026 នឹងមកដល់ទីផ្សារអូស្ត្រាលី "នៅឆមាសទីមួយក្នុងឆ្នាំ 2026" ជាមួយនឹងការប្រើប្រាស់ម៉ាស៊ីនសាំង ប្រភេទ turbocharged ចំណុះ 1.2-litre 3-cylinder mild-hybrid petrol engine ដូចម៉ូដែលមុនដដែល។
បើតាមការបង្ហាញវត្តមានផ្លូវការណ៍នៅទីផ្សារអឺរ៉ុប Peugeot 308 ស៊េរីឆ្នាំ 2026 មានជម្រើសប្រើយ៉ាន់កង់ទំហំ 17-inch និង 18-inch ជាប្រភេទ Alloy wheel ជាមួយជម្រើសពណ៌ខៀវថ្មីហៅថា Lagoa Blue។ សម្រាប់ផ្នែកកាប៊ីនខាងក្នុងវិញត្រូវបានបំពាក់នូវអេក្រង់បង្ហាញព័ត៌មានទម្រង់ជា 3D graphics។ ចំពោះម៉ូដែល Peugeot E-308 wagon ថ្មីនេះ គឺបំពាក់កញ្ចប់ថ្មដែលសាកមួយពេញម្តងជិះបានចម្ងាយដល់ 450km បានឆ្ងាយជាងម៉ូដែលបច្ចុប្បន្នដែលជិះបានត្រឹម 400km។
បច្ចុប្បន្នរថយន្ត Peugeot 308 ដែលប្រើម៉ាស៊ីនសាំងមានតម្លៃខ្ទង់ $48,990 សម្រាប់ម៉ូដែល GT Hybrid។ ម៉ូដែលនេះ បំពាក់ម៉ាស៊ីនសាំង 1.2-litre three-cylinder turbocharged mild-hybrid petrol engine ដែលមានកម្លាំង 100kW និងកម្លាំងរមួល 230Nm។ សម្រាប់ព័ត៌មានលម្អិត ហើយនិងតម្លៃម៉ូដេល Peugeot 308 ស៊េរីថ្មីឆ្នាំ 2026 សម្រាប់ទីផ្សារអូស្ត្រាលី ក្រុមហ៊ុន Peugeot Australia មិនទាន់បានបង្ហាញចេញនៅឡើយទេក្នុងពេលនេះ៕
