Microsoft បានចាប់ផ្តើមផ្តោតនៅលើប្រព័ន្ធប្រតិបត្តិការ Windows 10X ដោយគ្រោងនឹងដំណើរការដំបូងបំផុតនៅលើឧបរកណ៍អេក្រង់តែមួយ

កាលពីឆ្នាំមុនក្រុមហ៊ុន Microsoft បានប្រកាសចេញនូវប្រព័ន្ធប្រតិបត្តិការ Windows 10X របស់ខ្លួនជាមួយនឹង Surface Neo និង Surface Duo របស់ខ្លួន។ នៅក្នុងពេលនោះ ក្រុមហ៊ុនបានទម្លាយថា OS ថ្មីនេះ នឹងបង្ហាញខ្លួននៅលើឧបករណ៍ដែលមានតែអេក្រង់ភ្លោះប៉ុណ្ណោះ។ ក្រុមហ៊ុនបានអោយដឹងថា ប្រព័ន្ធប្រតិបត្តិការ Windows 10X គឺសម្រាប់ប្រើលើស្មាតហ្វូន ថេប្លេត និងកុំព្យូទ័រ ជាមួយនឹងអេក្រង់ពីរ ដែលក្រុមហ៊ុន គ្រោងនឹងដំណើរការដំបូងបំផុតនៅលើឧបករណ៍ Surface Neo សម្រាប់ដាក់លក់នៅក្នុងរដូវឈប់សម្រាកនៅក្នុងឆ្នាំនេះ ប៉ុន្តែនៅពេលនេះ មានការរាយការណ៍ថា ឧបករណ៍នេះ នឹងមានការពន្យារពេលដល់ឆ្នាំ 2021។

ក្រុមហ៊ុន Microsoft បានបញ្ជាក់ថា ខ្លួនបានធ្វើការផ្លាស់ប្តូរហើយពេលនេះ ក្រុមហ៊ុននេះ នឹងប្រកាសចេញនូវប្រព័ន្ធប្រតិបត្តិការ Windows 10X ជាលើកដំបូងនៅលើឧបករណ៍ ដែលមានអេក្រង់តែមួយប៉ុណ្ណោះនោះ គឺចង់សំដៅទៅលើកុំព្យូទ័រ។ នៅក្នុងការបង្ហោះរបស់ប្លុកមួយនេះ លោក Panos Panay ដែលជាប្រធានផ្នែកផលិតផលរបស់ក្រុមហ៊ុន Microsoft បាននិយាយថា “ ជាមួយនឹងប្រព័ន្ធប្រតិបត្តិការ  Windows 10X នោះ ការប្រើប្រាស់នូវក្លោដ ដ៏មានសក្តានុពលខ្លាំងក្នុងការជួយការងាររបស់អ្នកប្រើប្រាស់ និងការកម្សាន្តជាច្រើនទៀតផងដែរ។” 

គាត់បានបន្ថែមថា សម្រាប់ឧបករណ៍ ដែលមានអេក្រង់មួយនេះ នឹងក្លាយជាផលិតផល ដែលគួរអោយចាប់អារម្មណ៍ជាមួយនឹងប្រព័ន្ធប្រតិបត្តិការ Windows 10X នេះ សម្រាប់អតិថិជនជាច្រើន ហើយក្រុមហ៊ុន នឹងបន្តក្នុងការធ្វើការងារជាមួយនឹងដៃគូជាច្រើនទៀត នៅក្នុងការនាំយកសម្រាប់ដំណើរការនៅលើឧបករណ៍ដែលមានអេក្រង់ពីរនៅក្នុងទីផ្សារនៅក្នុងពេលឆាប់ៗនេះ។ ក្រុមហ៊ុន Microsoft បានសម្រេចចិត្តក្នុងការបោះជំហាននេះ ដោយសារតែមេរោគរាតត្បាត COVID-19 នៅតែរំខាន និងបន្តកើនឡើងនោះ។ 

លោក Panos Panay បានបង្ហើបថា ពិភពលោក គឺនឹងក្លាយជាកន្លែងផ្សេងមួយទៀត បើធៀបទៅនឹងខែតុលាឆ្នាំមុននេះ នៅពេលដែល យើងចែករំលែកនូវចក្ខុវិស័យរបស់យើង សម្រាប់ឧបករណ៍ថ្មី ដែលមានអេក្រង់ភ្លោះជាមួយនឹង Windows នេះ។ ហើយជាមួយនឹងព័ត៌មានថា ប្រព័ន្ធប្រតិបត្តិការ Windows 10X នឹងដំណើរការនៅលើឧបករណ៍ ដែលមានអេក្រង់តែមួយនោះ គឺនៅមិនទាន់មានការបញ្ជាក់ថា វានឹងមកដល់នៅពេលណានោះទេ។ ដើម្បីដឹងកាន់តែច្បាស់ យើងមានតែរង់ចាំការប្រកាសជាផ្លូវការពីក្រុមហ៊ុន Microsoft តែប៉ុណ្ណោះ៕