កាលពីព្រឹត្តិការណ៍ CES2020 (Consumer Electronics Show 2020) ក្រុមហ៊ុន Samsung បានប្រកាសចេញម៉ាស៊ីនកុំព្យូទ័រយួរដៃប្រភេទ Chromebook ដំបូងរបស់ខ្លួនដែលបំពាក់បន្ទះអេក្រង់ AMOLED Display។
ចំនែកក្នុងព្រឹត្តិការណ៍ CES2021 ឆ្នាំនេះវិញ Samsung ក៏បានប្រកាសចេញ Galaxy Chromebook ជំនាន់ទី 2 ដែលជាម៉ាស៊ីនកុំព្យូទ័រយួរដៃ Chromebook ដំបូងគេបង្អស់ក្នុងពិភពលោកដែលបំពាក់បន្ទះអេក្រង់ QLED Display។ ឧបករណ៍ប្រភេទ 2-in-1 ជំនាន់ថ្មីមួយនេះមានអេក្រង់ទំហំ 13.3 អ៊ីញ Q-LED Touchscreen និងទ្រទ្រង់កម្រិតរីសូលូហ្ស៊ិនទំហំ 1920x1080px ជាមួយបច្ចេកវិទ្យា HDR ព្រមទាំងមានគែម Bezels អេក្រង់តូចស្តើងថែមទៀតផង។ ក្រៅតែពីអាចចុចប៉ះថាច់បញ្ជាបានហើយ អេក្រង់របស់ Galaxy Chromebook 2 នៅអាចទ្រទ្រង់ជាមួយនឹងប៊ិច USI Pen (Universal Stylus Initiative) ជាមួយសំពាធសំគាល់កម្រិត 4,096។
ម៉ាស៊ីនកុំព្យូទ័រយួរដៃ Galaxy Chromebook ជំនាន់ថ្មីនេះប្រតិបត្តិការដោយ Google Chrome OS ជំនាន់ចុងក្រោយ ដែលត្រូវបាន Samsung ដាក់រួមបញ្ចូលនូវប្រព័ន្ធដំណើរការ Galaxy និង Google Ecosystem ដើម្បីផ្តល់អោយអ្នកប្រើប្រាស់កាន់តែមានភាពងាយស្រួលប្រើបានទាំងប្រព័ន្ធដំណើរការ Google Ecosystem និង Samsung Galaxy Ecosystem នៅលើឧបករណ៍តែមួយ។ ហើយការរួមបញ្ចូលគ្នាបែបនេះគឺផ្តល់អោយអ្នកប្រើប្រាស់អាចធ្វើការតភ្ជាប់ម៉ាស៊ីន Chromebook ជំនាន់ថ្មីនេះទៅនឹងឧបករណ៍ផ្សេងៗទៀតរបស់ Samsung ដែលរាប់ចាប់ពីទូរស័ព្ទស្មាតហ្វូន ថេបប្លែត និងម៉ាស៊ីនកុំព្យូទ័រជា ដើម្បីអាចធ្វើការទំនាក់ទំនងបានកាន់តែមានភាពងាយស្រួលដូចជាការហៅទូរស័ព្ទ និងការផ្ញើសារជាដើម។
Galaxy Chrombook 2 គឺមានការឌីស្សាញឡើងបានយ៉ាងស្រស់ស្អាតប្រណិតបែប Premium ជាមួយទំងន់ស្រាលត្រឹមតែ 1.23 គីឡូក្រាម និងមានកម្រាស់សរុបស្តើតបំផុតត្រឹមតែ 13.9 ម.ម ប៉ុណ្ណោះ។ រីឯផ្ទាំងក្តារចុចវិញត្រូវបាន Samsung ធ្វើការឌីស្សាញឡើងជាមួយនឹងគ្រាប់ចុចមានទំហំធំៗជាមួយគម្លាតល្មមងាយស្រួលដល់ការវាយអត្ថបទ ព្រមទាំងមានរំលេចដោយភ្លើង LED នៅពីក្រោមថែមទៀតផង។
Galaxy Chromebook 2 បានដំឡើងមកជាមួយនឹង CPU ជំនាន់ទី 10 របស់ Intel ស៊េរី Core-i3-Dual-core លេខ 10110U ដែលមាន 4 threads និងល្បឿនខ្លាំងជាជំនាន់មុន។ ចំនែកមួយម៉ូដែលទៀតប្រើប្រាស់ Intel-Celeron-Dual-Core 15W លេខ 5205U មានចំនួន 2 threads និងភ្ជាប់ដោយ GPU Intel-UHD។ ម៉ាស៊ីនរបស់វាភ្ជាប់អមដោយរ៉េមទំហំ 4GB និង 8GB ប្រភេទ LPDDR3 ជាមួយថាសរឹកផ្ទុកទិន្នន័យទំហំចាប់ពី 64GB ដល់ 128GB ព្រមទាំងមានរន្ធបន្ថែមទំហំផ្ទុកពីក្រៅជាប្រភេទ microSD ផងដែរ។
ក្រៅពីនេះម៉ាស៊ីន Galaxy Chromebook 2 នៅមានភ្ជាប់ដោយថ្មទំហំ 45.5W ដែល Samsung អះអាងថាសាកពេញម្តងអាចកាន់ប្រើការទូទៅបាន 14 ម៉ោង, មាន Speaker បំពងសំឡេងទំហំ 5W ភ្ជាប់នូវមុខងារសំឡេង Smart AMP ដែលអាចស្រេចសំឡេងចេញបានលឺខ្លាំងជាងមុខដល់ទៅ 178%, បំពាក់កាមេរ៉ាវ៉ិបខេមមួយគ្រាប់កម្រិត HD-720px សម្រាប់ប្រើជាមួយវីដេអូខល, បំពាក់នូវបច្ចេកវិទ្យា Wi-Fi 6 កម្រិត ax:2X2, ប្លូធូស 5.0, រន្ធដោតចម្លងទិន្នន័យប្រភេទ USB-C ចំនួនពីរ រួមនឹងរន្ធដោតម៉ាយក្រូហ្វូន និងកាសខ្នាត 3.5 ម.ម។ Samsung Galaxy Chromebook 2 មានជម្រើសពីរពណ៌គឺពណ៌ប្រផេះហៅថា Mercury Gray និងពណ៌ក្រហមហៅថា Fiesta Red។ ហើយមួយម៉ូដែលក្នុងចំនោម Galaxy Chromebook 2 ទាំងពីរនឹងមានចេញលក់ដំបូងនៅទីផ្សារសហរដ្ឋអាមេរិកនាជិតដំណាច់ខែមិនា, 2021 ប៉ុន្តែគួរអោយស្តាយដោយសារតែនៅពេលនេះ Samsung មិនទាន់បង្ហើបប្រាប់ពីតម្លៃរបស់ម៉ាស៊ីន Chromebook 2 QLED Display នៅឡើយទេ៕
