ស្ថាប័នស្រាវជ្រាវទីផ្សារ Avi Cloud ហៅកាត់ថា AVC បានបញ្ចេញរបាយការណ៍ចុងក្រោយស្តីពីការនាំចេញស្មាតធីវីនៅទូទាំងទីផ្សារពិភពលោក (Global TV Brand Shipment Monthly Data Report)។ ទិន្នន័យរបាយការណ៍របស់ស្ថាប័នមួយនេះបានបង្ហាញថា ការនាំចេញទូរទស្សន៍ស្មាតធីវីពីក្នុងក្រុមហ៊ុនផលិតនៅឆមាសដំបូងក្នុងឆ្នាំ 2021 ឃើញថាមានប្រតិបត្តិការល្អ។ បើតាមតួលេខបឋមក្នុងរបាយការណ៍ការនាំចេញទូរទស្សន៍ស្មាតធីវីក្នុងឆមាសដំបូង ឆ្នាំ 2021 គឺមានចំនួនប្រហែល 98.3 លានគ្រឿង មានកំណើនប្រមាណ 6.8% ពីមួយឆ្នាំទៅមួយឆ្នាំ (Year-on-Year)។ ក្នុងរបាយការណ៍ AVC បានបង្ហាញផងដែរថា ការនាំចេញទូរទស្សន៍ស្មាតធីវីប្រភេទ OLED TVs គឺមានចំនួនប្រមាណ 2.7 លានគ្រឿង កើនឡើងប្រមាណ 133.3% ពីមួយឆ្នាំទៅមួយឆ្នាំ។
ក្រុមហ៊ុន Samsung នៅតែជាក្រុមហ៊ុនឈានមុខគេក្នុងការនាំចេញស្មាតធីវីនៅក្នុងឆមាសទី 1 ឆ្នាំ 2021នេះ។ បើតាមទិន្នន័យបឋម ការនាំចេញស្មាតធីវីរបស់ក្រុមហ៊ុនបច្ចេកវិទ្យាយក្សកូរ៉េខាងត្បូងមួយនេះ គឺមានចំនួនប្រមាណ 20.8 លានគ្រឿង កើនឡើង 11.9% YoY។ Samsung គឺជាក្រុមហ៊ុនដែលឈានមុខគេក្នុងការនាំចេញ និងលក់ស្មាតធីវីនៅទូទាំងទីផ្សារសកលលោក ដែលគិតមកទល់នឹងពេលនេះក្រុមហ៊ុននេះបានគ្រងដំណែងលេខ 1 អស់រយះពេល 15 ឆ្នាំមកហើយ។ ចំនែកក្រុមហ៊ុនបច្ចេកវិទ្យាយក្ស LG Electronics ដែលជាដៃគូប្រគូតប្រជែងរួមស្រុកវិញបានឈរនៅលេខរៀងទី 2 ដោយនាំចេញស្មាតធីវីបានចំនួន 13.1 លានគ្រឿង។
.jpg)
ចំនែកក្រុមហ៊ុន TCL ដែលជាដៃគូប្រគូតប្រជែងក្រៅស្រុកមានប្រភពចេញពីប្រទេសចិនវិញ បានឈរនៅលេខរៀងទី 3 ដោយនាំចេញស្មាតធីវីបានចំនួន 11.1 គ្រឿង កើនឡើង 13.6% YoY។ ជាច្រើនឆ្នាំមកនេះ TCL គឺជាក្រុមហ៊ុនម៉ាកស្មាតធីវីដែលស្ថិតនៅលេខរៀងទី 3 ជានិច្ចបន្ទាប់ពី LG និង Samsung ហើយក្រុមហ៊ុននេះ គឺជាក្រុមហ៊ុនឈរនៅលំដាប់លេខរៀងទី 1 ក្នុងទីផ្សារស្មាតធីវីរបស់ប្រទេសចិនថែមទៀតផង។ ដោយឡែកក្រុមហ៊ុន Hisense ដែលជាក្រុមហ៊ុនរួមស្រុកជាមួយ TCL បានឈរនៅលេខរៀងទី 4 ដោយនាំចេញស្មាតធីវីបានចំនួន 5.5 លានគ្រឿង រីឯក្រុមហ៊ុន Xiaomi វិញស្ថិតនៅលេខរៀងទី 5 ដោយ នាំចេញស្មាតធីវីបានចំនួន 5.4 លានគ្រឿង។
.jpg)
ហើយសម្រាប់ក្រុមហ៊ុន 5 ទៀតដែលស្ថិតក្នុងតារាងក្រុមហ៊ុនទាំង 10 ដែលនាំចេញស្មាតធីវីបានច្រើនក្នុងត្រីឆមាសទី 1 ឆ្នាំនេះមានដូចជា ក្រុមហ៊ុន Sony មានចំនួន 4.1 លានគ្រឿង, Vizio មានចំនួន 3.3 លានគ្រឿង, Philips+AOC មានចំនួន 3.2 លានគ្រឿង, Skyworth មានចំនួន 3.0 លានគ្រឿង និង Sharp មានចំនួន 2.7 លានគ្រឿង៕
