Mangmi នឹងបញ្ចេញឧបករណ៍លេងហ្គេមថ្មី Pocket Max Handheld បំពាក់អេក្រង់ OLED ទំហំ 7 អ៊ិងល្បឿន 144Hz

ក្រុមហ៊ុន Mangmi ទើបតែបានបង្ហាញចេញឧបករណ៍លេងហ្គេមចល័តស៊េរីថ្មីម៉ូដែល Pock Max Handheld នៅលើគណនី X របស់ក្រុមហ៊ុន។ Mangmi Pocket Max Handheld ស៊េរីថ្មីនេះ បំពាក់មកជាមួយអេក្រង់ប្រភេទ OLED ល្បឿន refresh rate 144Hz ទំហំ 7-inch កម្រិតបង្ហាញ Full-HD ដែលល្អបំផុតក្នុងការលេងហ្គេមមិនថានៅក្នុងបន្ទប់ ឬនៅខាងក្រៅឡើយ។

យោងតាមការបញ្ជាក់ពី Mangmi បានឲ្យដឹងថា អេក្រង់របស់ Pocket Max Handheld ស៊េរីថ្មីរបស់ខ្លួន គាំទ្រនូវកម្រិតបង្ហាញមាតិកាហ្គេម HDR, មានកម្រិត Contrast ratio 100,000:1 និងកម្រិតទឹកពណ៌ 155% sRGB color gamut coverage។ ជាមួយគ្នានៅលើផ្ទៃខាងមុខរបស់ Pocket Max ត្រូវបានពាសដោយកញ្ចក់រលោងពេញតែម្តង។ ជាមួយគ្នានេះ Mangmi Pocket Max ជម្រើសម៉ូដែលពិសេស Retro GB ត្រូវបានឌីស្សាញឡើងជាមួយពណ៌សបែកទឹកមាសស្រាលរំលេចជាមួយប៊ូតុងចុចខាងលើ shoulder button, D-pad និង ABXY buttons ពណ៌ក្រហមឈាមជ្រូក។

បន្ថែមពីលើម៉ូដែល Retro GB ឧបករណ៍ហ្គេមស៊េរីថ្មីនេះ ក៏មានជម្រើសពណ៌ខ្មៅ និងពណ៌សផងដែរ។ ហើយទាំងបីជម្រើសនេះ គឺមានមកជាមួយប្រព័ន្ធសារធាតុត្រជាក់ active cooling system, ប្រព័ន្ធបញ្ចេញរន្ធបំភាយកម្តៅនៅលើផ្ទៃខ្នងខាងក្រោយ និងលើគែមខាងលើ។ ហើយនៅលើផ្ទៃខ្នងខាងក្រោយរបស់ Mangmi Pocket Max មានបន្ថែមប៊ូតុងចំនួនពីរទៀតពីលើប៊ូតុង Shoulder ខាងលើ ដែលប៊ូតុងទាំងពីរនៅខាងក្រោយនេះ គឺអាចនឹងប្រើជាប៊ូតុងសម្រាប់ចូលទៅកំនត់មុខងារប្រើប្រាស់មួយចំនួន។ ហើយសម្រាប់ប៊ូតុងសំឡេង ប៊ូតុងបិទបើក និងប៊ូតុង Sleep mode គឺស្ថិតនៅលើគែមខាងលើរបស់ឧបករណ៍។

ទោះជាយ៉ាងណា Mangmi មិនបានបញ្ចេញព័ត៌មានលម្អិតពាក់ព័ន្ធនឹងផ្នែករឹងដែលបំពាក់ខាងក្នុងរបស់ Pocket Max ស៊េរីថ្មីនៅឡើយទេ ប៉ុន្តែ មានការសន្និដ្ឋានថា ឧបករណ៍លេងហ្គេមស៊េរីថ្មីនេះ នឹងប្រើប្រាស់ដំណើរការនៅលើបន្ទះឈីប Qualcomm Snapdragon 865 ហើយអាចនឹងមានតម្លៃខ្ទង់ប្រហែល $200។ Mangmi Pocket Max ត្រូវបានគេព្យាករណ៍ថា នឹងបង្ហាញវត្តមានផ្លូវការណ៍នៅចុងឆ្នាំ 2025 នេះ ឬនៅដើមឆ្នាំ 2026 ខាងមុខនេះ៕