នៅក្នុងព្រឹត្តិការណ៍ការសម្ពោធរបស់ហ្វាប់ប្លេតស៊េរីថ្មី Galaxy Note 8 របស់ក្រុមហ៊ុន Samsung កាលពីសប្តាហ៍មុននេះ បានបង្ហាញថា ហ្វាប់ប្លេតនេះ គឺបំពាក់នូវអេក្រង់គែមកោងទំហំ 6.3 អ៊ីង ដែលធំជាងគេបំផុតនៅក្នុងត្រកូលរបស់ Galaxy Note។ ខណៈពេលដែលកម្រិតភាពច្បាស់របស់វា គឺជាប្រភេទអេក្រង់ Quad HD+ (1440 x 2960 ភិចសែល) ហើយលោកអ្នក ប្រហែលជាមិនឃើញកម្រិតភាពច្បាស់នេះ ជាទម្រង់ Default នៅលើហ្វាប់ប្លេតនេះនោះទេ។
ដូចអ្វីដែលលោកអ្នកធ្លាប់មើលឃើញនៅលើស្មាតហ្វូនស៊េរីថ្មី Samsung Galaxy S8 និង Galaxy S8+ ក្រុមហ៊ុន Samsung បានប្រើប្រាស់អេក្រង់កម្រិត Default របស់ហ្វាប់ប្លេត Galaxy Note 8 កម្រិត Full HD+ ហើយក្រុមហ៊ុន ក៏បានបង្ហាញអំពីរឿងនេះ នៅលើគេហទំព័រផ្លូវការរបស់ខ្លួនផងដែរ។ ដោយសារតែការប្រើប្រាស់នូវអេក្រង់ 18.5:9 aspect ratio នោះកម្រិតភាពច្បាស់របស់វា គឺ 1080x2220 ភិចសែល គឺធំជាងការប្រើប្រាស់នូវកម្រិតស្តង់ដារ 1080x1920 Full HD ។
អ្នកប្រើប្រាស់ជាច្រើន អាចធ្វើការផ្លាស់ប្តូរកម្រិតភាពច្បាស់នៅលើអេក្រង់ទៅជាប្រភេទ Quad HD+ (1440x2960) បានគ្រប់ពេលវេលាតាមរយៈការចូលទៅកែប្រែនៅលើ Setting Menu នៅលើហ្វាប់ប្លេត Galaxy Note 8។ ប៉ុន្តែលោកអ្នកប្រហែលជាមិនចង់ផ្លាស់ប្តូរនោះទេ ដោយសារតែកម្រិតភាពច្បាស់ 1080x2220 ភិចសែលគឺវាម៉ត់ច្បាស់ស្រស់ស្អាត ទាក់ទិននិងបញ្ហានេះ លោកអ្នកក៏មិនអាចកំណត់នូវភាពខុសគ្នារវាងកម្រិតភាពច្បាស់ 1440x2960 នោះដែរ គ្រាន់តែដឹងថា ប្រសិនបើលោកអ្នកប្រើប្រាស់អេក្រង់ Full HD+ ការប្រើប្រាស់ថាមពលថ្ម គឺមានលក្ខណៈប្រសើរជាងការប្រើប្រាស់ Quad HD+ ៕
