កាលពីសប្តាហ៍កន្លងទៅនេះ ក្រុមហ៊ុន Sony ទើបតែប្រកាសចេញនូវស្មាតហ្វូនស៊េរីថ្មីចំនួន 2 ម៉ូដែលនៅក្នុងព្រឹត្តិការណ៍ IFA 2017 គឺម៉ូដែល Xperia XZ1 និង Xperia XZ1 Compact។ ស្មាត ហ្វូនស៊េរីថ្មីទាំងពីរនេះ គឺមានភ្ជាប់ជាមួយនឹងលក្ខណៈសម្បត្តិគួរអោយចាប់អារម្មណ៍មួយគឺ 3D scanning ។ ថ្មីនេះៗ ក្រុមហ៊ុន Sony បានបញ្ជាក់នៅលើបណ្តាញសង្គម Twitter ថា ស្មាតហ្វូនស៊េរីថ្មី Xperia XZ Premium របស់ខ្លួន ក៏នឹងអាចធ្វើបច្ចុប្បន្នភាពប្រើប្រាស់ប្រព័ន្ធប្រតិបត្តិការ Android 8.0 Oreo នៅក្នុងរយៈពេលដ៏ខ្លីខាងមុខនេះផងដែរ តែក្រុមហ៊ុននៅមិនទាន់កំណត់នូវកាលបរិច្ឆេទជាក់លាក់ការធ្វើបច្ចុប្បន្នភាពទៅកាន់ប្រព័ន្ធប្រតិបត្តិការ Android Oreo នៅឡើយទេ។
ចំពោះ បច្ចេកវិទ្យា 3D scanning គឺជាផ្នែកមួយនៃកម្មវិធី 3D Creator app ដែលក្រុមហ៊ុន Sony បានអភិវឌ្ឍន៍ ហើយវាមិនមែនជាផ្នែកមួយនៃកម្មវិធីកាមេរ៉ានៅលើស្មាតហ្វូននោះទេ។ កម្មវិធីនេះ គឺអនុញ្ញាតអោយអ្នកប្រើប្រាស់ជាច្រើនធ្វើការស្កេននូវផ្នែកក្បាល ឬអ្វីដែលគួរអោយចាប់អារម្មណ៍ជាច្រើនទៀត។ វានៅតែជាជំហាននៃការចាប់ផ្តើមដំបូង ប៉ុន្តែក្រុមហ៊ុន Sony មានជំនឿជឿជាក់ថា ពិតជាការនាំយកនូវបទពិសោធន៍ថ្មីអស្ចារ្យ ហើយក្រុមហ៊ុនខិតខំយ៉ាងខ្លាំងដើម្បីសម្រេចបានរឿងនេះ។ ក្រុមហ៊ុន Sony បានប្រើប្រាស់កម្មវិធីនេះសម្រាប់ធ្វើការស្កែនពួកគេ និងដាក់ចូលទៅក្នុងហ្គេមជាច្រើនដូចជា Grand Theft Auto V។ នៅក្នុងរយៈពេលដ៏ខ្លីខាងមុខនេះ អ្នកប្រើប្រាស់ជាច្រើននឹងអាចប្រើប្រាស់មុខងារនេះ ជាមួយនឹងហ្គេមជាច្រើនទៀត ព្រោះក្រុមហ៊ុន Sony នៅក្នុងពេលនេះ ក៏កំពុងតែព្យាយាមចុះកិច្ចព្រមព្រៀងជាមួយនឹងក្រុមហ៊ុនលេងហ្គេមជាច្រើនទៀត។
មុខងារនេះ ពិតជាគួរអោយចាប់អារម្មណ៍ណាស់ ហើយវាពិតជារំភើបមែនទែន នៅពេលដែលមើលឃើញនូវមុខងារនេះ នៅលើស្មាតហ្វូនស៊េរីថ្មី Xperia XZ Premium ហើយលោកអ្នកដែលប្រើប្រាស់ស្មាតហ្វូនម៉ូដែលនេះ នឹងមានឱកាសប្រើប្រាស់នូវមុខងារនេះបាននោពេលខាងមុខ។ សង្ឃឹមថា ការធ្វើបច្ចុប្បន្នភាពទៅកាន់ប្រព័ន្ធប្រតិបត្តិការ Android 8.0 Oreo គឺពិតជាដំណើរការនៅក្នុងរយៈពេលដ៏ខ្លីខាងមុខនេះ ពីព្រោះថា ក្រុមហ៊ុន Sony បានបញ្ជាក់ថា ខ្លួនក៏ត្រៀមដាក់លក់ស្មាតហ្វូនស៊េរីថ្មី Xperia XZ1 និង Xperia XZ1 Compact ក្នុងពេលឆាប់ៗនេះ ៕
