ថ្មីៗនេះ ក្រុមហ៊ុន OPPO បានផលិតនូវជំរើសស្មាតហ្វូនជំនាន់ថ្មីមួយបន្ថែមទៀតសម្រាប់ ស្មាតហ្វូន OPPO R11 ស៊េរីថ្មីរបស់ខ្លួន។ ស្មាតហ្វូនជំនាន់ថ្មីនេះ OPPO R11 TFBOYS Edition ត្រូវបានដាក់ឈ្មោះតាមក្រុមចម្រៀងប្រុសនៅក្នុងប្រទេសចិន ហើយក្រុមហ៊ុន OPPO ក៏មានជំនាន់ FC Barcelona Edition ផងដែរ។ TFBOYS គឺជាក្រុមតារាចម្រៀងប្រុសដែលមានសមាជិកចំនួន 3 នាក់គឺ Wan Yuan, Wang Junkai និង Yi Yangqianxi ដែលបង្កើតឡើងដោយផលិតកម្ម TF Entertainment។ សម្រាប់ស្មាតហ្វូន R11 មាន 3 ជម្រើសផ្សេងៗគ្នា។ គ្រប់ស្មាតហ្វូននីមួយៗ ភ្ចាប់ជាមួយហត្ថលេខារបស់សមាជិកម្នាក់នៅផ្នែកខាងក្រោយនិងរូបឡូហ្គោមាស 18K របស់ក្រុមនេះផងដែរ។
OPPO R11 TFBOYS Edition ត្រូវបានបំពាក់មកជាមួយរ៉េមទំហំ 4GB និងម៉េមូរីក្នុងម៉ាស៊ីនទំហំ 64GB។ ស្មាតហ្វូនជំនាន់ពិសេសថ្មីនេះ នឹងដាក់លក់ជាផ្លូវការចាប់ពីថ្ងៃទី 15 ខែកញ្ញាខាងមុខនេះហើយ វាមានចំនួនជាក់លាក់ប៉ុណ្ណោះ។ អតិថិជនដែលចាប់អារម្មណ៍ទិញស្មាតហ្វូនជំនាន់ពិសេសនេះ មានរយៈពេល 15 នាទី ដើម្បីទិញ បើមិនដូច្នេះទេពួកគេនឹងបាត់បង់ឱកាសរបស់គេជាក់ជាមិនខាន។ គួរបញ្ជាក់ផងដែរថា ស្មាតហ្វូន Barcelona Edition ដាក់លក់នៅក្នុងតម្លៃ ¥3500 (∼$534) ខណៈពេលដែលស្មាតហ្វូន TFBOYS Edition ដាក់លក់នៅក្នុងតម្លៃ ¥2999 (∼$458) ៕