នៅក្នុងព្រឹត្តិការណ៍តាំងពិពរណ៍ Mobile World Congress ខាងមុខនេះ ក្រុមហ៊ុន Samsung បានប្រកាសថា នឹងបង្ហាញចេញនូវស្មាតហ្វូនស៊េរីថ្មីរបស់ខ្លួនម៉ូដែលចុងក្រោយបំផុតនោះគឺ Samsung Galaxy S9 និង Galaxy S9 Plus គឺថ្ងៃទី 26 ខែកុម្ភៈខាងមុខនេះ។ ជាមួយនឹងព័ត៌មានរបស់ស្មាតហ្វូនត្រកូល Galaxy S9 នេះ នៅមិនទាន់មានការបញ្ជាក់អំពីតម្លៃនៅឡើយទេ។ មានការរំពឹងទុកជាមុនថា Samsung នឹងមានចេញនូវស្មាតហ្វូន Galasy S9 ដែលមានតម្លៃថោកសំរាប់ប្រទេសចិន ។
លោក Gui Xian អគ្គនាយករបស់ក្រុមហ៊ុន Samsung នៅក្នុងប្រទេសចិន បានទម្លាយនៅក្នុងបទសម្ភាសន៍កាលពីពេលថ្មីៗនេះថា តម្លៃរបស់ស្មាតហ្វូន Galaxy S9 នៅក្នុងប្រទេសចិន នឹងមានតម្លៃថោកជាងគេបំផុតនៅក្នុងពិភពលោក។ តែទោះជាយ៉ាងណាក៏ដោយ លោកមិនទាន់ទម្លាយអំពីតម្លៃរបស់ស្មាតហ្វូននេះនៅឡើយទេ។ យោងតាមការបញ្ជាក់នៅក្នុងព្រឹត្តិការណ៍មុននេះ បញ្ជាក់ថា ស្មាតហ្វូនននេះ នឹងចាប់ផ្តើមនូវការកម្មង់ទិញមុននៅថ្ងៃទី 1 ខែមីនា ហើយការចាប់ផ្តើមដឹកជញ្ជូនគឺនៅថ្ងៃទី 16 ខែមីនាខាងមុខនេះ។ ក្រុមហ៊ុននៅមិនទាន់បញ្ជាក់អំពីកាលបរិច្ឆេទទៅលើការលក់ជាផ្លូវការនៅឡើយទេ។
ស្មាតហ្វូន Samsung Galaxy S9 ត្រូវបានគេរំពឹងថា នឹងប្រើប្រាស់រ៉េមទំហំ 4GB នឹងមានម៉េមូរីក្នុងម៉ាស៊ីនទំហំ 64GB និង 128GB ។ មួយវិញទៀត សម្រាប់ស្មាតហ្វូន Galaxy S9 Plus នឹងមានរ៉េមទំហំ 6GB និងម៉េមូរីក្នុងម៉ាស៊ីនទំហំ 64GB, 128GB, 256GB និង 512GB។ សម្រាប់ម៉េមូរីក្នុងម៉ាស៊ីនទំហំ 128GB នឹងដាក់លក់នៅក្នុងទីផ្សារមួយចំនួនប៉ុណ្ណោះ ហើយមានចំនួនកំណត់ផងដែរ។
ស្មាតហ្វូនទាំងពីរម៉ូដែលនេះ នឹងប្រើប្រាស់បន្ទះឈីប Snapdragon 845 សំរាប់ទីផ្សារសហរដ្ឋអាមេរិក និងទីផ្សារប្រទេសចិន ស្របពេលដែលបន្ទះឈីប Exynos 9810 ត្រូវបានប្រើប្រាស់សំរាប់អន្តរជាតិ ដែលមានការពង្រឹងទៅលើសមត្ថភាពនៃ CPU, GPU performance, artificial intelligence (AI) និង deep learning ជាដើម។ អេក្រង់របស់ Galaxy S9 នេះមានអេក្រង់ទំហំ 5.8 អ៊ីង Galaxy S9 Plus មានអេក្រង់ទំហំ 6.2 អ៊ីង។ Galaxy S9 មានកាមេរ៉ាមួយនៅផ្នែកខាងក្រោយ សំរាប់ S9 Plus នឹងប្រើប្រាស់ប្រព័ន្ធកាមេរ៉ាភ្លោះនៅផ្នែកខាងក្រោយ។
គួរបញ្ជាក់ថា កាលពីដើមសប្តាហ៍នេះ ក៏មានព័ត៌មានបែកធ្លាយមួយចេញពី ANATEL បានទម្លាយថា ស្មាតហ្វូន Galaxy S9 នឹងប្រើប្រាស់ថាមពលថ្មទំហំ 3000mAh និង Galaxy S9 Plus មាន ទំហំ 3500mAh ដូចជំនាន់មុនដែរ។ មានការព្យាករណ៍ថា តម្លៃរបស់ស្មាតហ្វូន Galaxy S9 ប្រហែលជាមិនខុសប្លែកខ្លាំងពីស្មាតហ្វូនត្រកូល Galaxy S8 នោះទេ៕
