Samsung Galaxy Tab S4 ទំនងជានឹងបង្ហាញខ្លួននៅមុនព្រឹត្តិការណ៍ MWC 2018

នៅក្នុងពេលបច្ចុប្បន្ននេះ អ្នកគាំទ្ររបស់ក្រុមហ៊ុនបច្ចេកវិទ្យាយក្ស Samsung ភាគច្រើន បាននឹងកំពុងតែផ្តោតអារម្មណ៍យ៉ាងខ្លាំងទៅលើស្មាតហ្វូនស៊េរីថ្មីរបស់ក្រុមហ៊ុននេះគឺ ស្មាតហ្វូន Galaxy S9 និង Galaxy S9+។ ក៏ប៉ុន្តែទោះជាយ៉ាងណាក៏ដោយ ក៏នូវមានឧបករណ៍ថ្មីមួយទៀតដែរ ដែលក្រុមហ៊ុនគ្រោង នឹងបង្ហាញនៅចុងខែនេះក្នុងព្រឹត្តិការណ៍តាំងពិពរណ៍ Mobile World Congress 2018 ដែលជាថេប្លេតស៊េរីថ្មីនោះ។

បើទោះបីជាស្មាតហ្វូនស៊េរីថ្មី Galaxy S9 ត្រូវបានគេរំពឹងថាណ នឹងបង្ហាញខ្លួននៅក្នុងពេលឆាប់ៗខាងមុខនេះក៏ដោយ ក្រុមហ៊ុន Samsung ក៏បាន ត្រៀមខ្លួនក្នុងការប្រកាសចេញអំពីថេប្លេតស៊េរីថ្មី Galaxy Tab S4 ដូចគ្នា។ ថេប្លេតស៊េរីថ្មីនេះ ទើបតែបង្ហាញនៅលើ GFXBench រួមជាមួយនឹងលក្ខណៈសម្បត្តិរបស់វាផងដែរ។ Galaxy Tab S4 ដែលមានលេខកូដ SM-T835 គឺជាថេប្លេតប្រភេទប្រណិតដែល នឹងបំពាក់នូវរ៉េមទំហំ 4GB និងម៉េមូរីក្នុងម៉ាស៊ីនទំហំ 64GB នោះ។ ថេប្លេតនេះនឹងបំពាក់នូវបន្ទះឈីប Snapdragon 835 processor និងក្រាហ្វិកកាត Adreno 540 GPU ។

បន្ថែមពីនេះទៀត ថេប្លេតនេះ នឹងបំពាក់នូវកាមេរ៉ាខាងក្រោយទំហំ 12MP និងកាមេរ៉ាខាងមុខទំហំ 8MP សម្រាប់ការថតរូប Selfies។ ថេប្លេតនេះមិនមានភ្ជាប់ជាមួយនឹង NFC (Near Field Communications) ប៉ុន្តែវាអាចប្រើប្រាស់នូវ Wi-Fi និងGPS ផងដែរ។ ថេប្លេត Samsung Galaxy Tab S4 នឹងមានអេក្រង់ទំហំ 10.5 អ៊ីញជាមួយនឹងកម្រិតភាពច្បាស់ 2560 x 1600 ភិចសែល និងប្រព័ន្ធប្រតិបត្តិការ Android 8.0 Oreo ។ ថេប្លេតនេះអាចភ្ជាប់ជាមួយនឹង SIM ដែលអនុញ្ញាតឱ្យអ្នកប្រើប្រាស់ធ្វើការខលផងដែរ៕