vivo ត្រៀមបង្ហាញស្មាតហ្វូនស៊េរីថ្មីដែលមានភ្ជាប់ជាមួយនឹងបន្ទះឈីប Exynos 980 5G នៅចុងឆ្នាំ 2019 នេះ

របាយការណ៍មួយចំនួនកាលពីប៉ុន្មានសប្តាហ៍មុននេះ បានបញ្ជាក់ថា ក្រុមហ៊ុនបច្ចេកវិទ្យាយក្សរបស់ចិន vivo បាននិងកំពុងតែធ្វើការនៅលើបន្ទះឈីបរបស់ខ្លួន។ យ៉ាងណាមិញ ក្រុមហ៊ុនបច្ចេកវិទ្យានេះ បានច្រានចោលទៅលើព័ត៌មាននេះដោយ និយាយថា ស្មាតហ្វូនស៊េរីថ្មីរបស់ខ្លួន នឹងបង្ហាញខ្លួននៅចុងឆ្នាំនេះជាមួយនឹងបន្ទះឈីបថ្មី Exynos 980 5G SoC របស់ក្រុមហ៊ុន Samsung។ vivo ប្រហែលជាក្រុមហ៊ុនដំបូងគេ ដែលនឹងប្រើប្រាស់នូវបន្ទះឈីបថ្មីនេះ។ Exynos 980 គឺជាបន្ទះឈីបដំបូងបំផុត សម្រាប់ប្រើប្រាស់នៅលើស្មាតហ្វូនថ្នាក់កណ្តាលដែលមានភ្ជាប់ជាមួយនឹងម៉ូដឹម 5G ដែលមានភ្ជាប់ជាមួយនឹងបន្ទះឈីប 8nm ដែលមានអង្គគណនា 2x Cortex-A77 cores និង 6 x A55 cores។ 

បន្ថែមពីនេះទៀតនោះ បន្ទះឈីបក៏មានភ្ជាប់ជាមួយនឹងក្រាហ្វិកកាត Mali-G76 MP5 GPU និងមាន NPU ផងដែរ។ អ្វីដែលគួរអោយកត់សម្គាល់នោះ ជាមួយនឹងការប្រើប្រាស់នូវម៉ូដឹម 5G នេះគឺជាដំណោះស្រាយមួយដែលមានតម្លៃថោកចាប់តាំងពីពេលដែលវាបង្កើតឡើងនៅលើ Motherboard នេះ។ វាក៏មានការពង្រឹងទៅលើល្បឿននៃការ Boot ផងដែរ។ យោងទៅតាមសន្លឹកឯកសាររបស់បន្ទះឈីប Exynos 980 នេះ វាមានល្បឿននៅក្នុងការដោនឡូតដល់ទៅ 2.55Gbps ដោយប្រើប្រាស់នូវស្តង់ដារ sub-6GHz ។ បន្ថែមពីនេះទៀតនោះ វាក៏មានការបញ្ចូលគ្នានៃ 4G និង 5G downlinks ដែលមានល្បឿនដល់ទៅ 3.55Gbps ថែមទៀត។ 

ស្មាតហ្វូន vivo នេះ នឹងក្លាយជាស្មាតហ្វូនមួយនៅក្នុងចំណោមស្មាតហ្វូនថ្នាក់កណ្តាលជាច្រើនដែលភ្ជាប់ជាមួយនឹងស្តង់ដារ Network លឿនបំផុតនៅក្នុងឆ្នាំ 2019 នេះ។ ជាក់ស្តែង យើងរំពឹងថាវានឹងមានបន្ទះឈីបជាច្រើនទៀតដែលនឹងបង្ហាញខ្លួននៅក្នុងឆ្នាំ 2020 នេះ។ ឆ្នាំក្រោយនេះអាចនឹងមានការបង្ហាញខ្លួននូវស្មាតហ្វូន និងបន្ទះឈីប 5G ជាច្រើន។ ក្រុមហ៊ុនបច្ចេកវិទ្យា Qualcomm ធ្វើការសន្យារួចហើយថានឹងនាំយកនូវបន្ទះឈីប 5G ទៅកាន់ស្មាតហ្វូនថ្នាក់កណ្តាលជាច្រើនរួមជាមួយនឹងបន្ទះឈីបថ្មី 7 និង 6-series Snapdragons របស់ខ្លួនផងដែរ។ កាលពីដើមខែនេះ លោក Brian Shen  អនុប្រធានរបស់ក្រុមហ៊ុនបច្ចេកវិទ្យា Oppo និយាយថា ក្រុមហ៊ុនបច្ចេកវិទ្យានេះ នឹងក្លាយជាក្រុមហ៊ុនដំបូងបំផុតដែលប្រើប្រាស់នូវឈីបមួយនេះ។ បន្ទះឈីប Snapdragon SDM7250 5G SoC នេះ ត្រូវបានគេរំពឹងថា នឹងបង្ហាញខ្លួននៅចុងឆ្នាំនេះហើយវាបង្កើតឡើងជាមួយនឹងដំណើរការ 7nm ផងដែរ៕