បន្ទាប់ពីក្រុមហ៊ុន Canalys និង Strategy Analytics ធ្វើការចែករំលែកអំពីការវិភាគរបស់ពួកគេទៅលើទីផ្សារស្មាតហ្វូនពិភពលោករួចមកនោះ នៅថ្ងៃនេះយើងបានទទួលបាននូវរបាយការណ៍ថ្មីមួយចេញពីក្រុមហ៊ុនស្រាវជ្រាវ Counterpoint Research ។ ក្រុមហ៊ុនបច្ចេកវិទ្យានេះជឿជាក់ថា ទីផ្សារស្មាតហ្វូនពិភពលោកគឺមានការលក់ស្មាតហ្វូនបានចំនួន 380 លានគ្រឿងសម្រាប់ត្រីមាសទី៣ ឆ្នាំ 2019 នេះបើធៀបជាមួយនឹងត្រីមាសទី 3 ឆ្នាំ 2018 គឺមានចំនួនត្រឹមតែ 379.8 លានគ្រឿង។
តាមការបញ្ជាក់របស់ Shobhit Srivastava អ្នកវិភាគការស្រាវជ្រាវនៅ CP បញ្ជាក់ថា ហាងលក់រាយជាច្រើននៅក្នុងប្រទេសឥណ្ឌាចាប់ផ្តើមរៀបចំសម្រាប់ព្រឹត្តិការណ៍នៃពិធីបុណ្យ Diwali ខណៈពេលដែលប្រទេសចិននឹងរៀបចំនូវព្រឹត្តិការណ៍ National Day Golden Week ដែលធ្វើអោយមានការកើនឡើងដល់ទៅ 6% នោះ។ ការកើនឡើងនេះគឺដោយសារតែវាមានសន្ទុះខ្លាំងនៅក្នុងរដូវវិសម្សកាលនេះ ហើយក្រុមហ៊ុនផលិតស្មាតហ្វូនជាច្រើនប្រហែលជាអាចឃើញនូវស្ថេរភាពនៃទីផ្សារថែមទៀត។
ទោះជាយ៉ាងណាក៏ដោយ សម្រាប់ទីផ្សារជាច្រើនទៀតគឺដោយសារតែក្រុមហ៊ុន Huawei សម្រាប់ត្រីមាសទី ៣ នៅក្នុងឆ្នាំ 2019 នេះគឺមើលឃើញពីការធ្លាក់ចុះរបស់ខ្លួននៅក្នុងអ៊ឺរ៉ុប អាមេរិកឡាទីន និងមជ្ឈឹមបូព៌ាថែមទៀត។ សង្គ្រាមពាណិជ្ជកម្មរបស់អាមេរិក និងចិនក៏បង្ករនូវផលប្រយោជន៍សម្រាប់ក្រុមហ៊ុន Samsung និង Xiaomi ក្នុងការបង្កើនទីផ្សាររបស់ខ្លួនផងដែរ។ក្រុមហ៊ុន Counterpoint ក៏មានការបញ្ចូលនូវម៉ាកយីហោជាច្រើនទៀតនៅក្នុងរបាយការណ៍របស់ខ្លួន ខណៈពេលដែលក្រុមហ៊ុន Realme និង Tecno ក៏មានការកើនឡើងនៅក្នុង Top 10 ផងដែរ។ ក្រុមហ៊ុន LG, Motorola ក៏មានការធ្លាក់ចុះទៅលើការលក់របស់ខ្លួនផងដែរ ខណៈពេលដែលក្រុមហ៊ុន HMD Global ក៏មានការធ្លាក់ចេញពី Top 10 សម្រាប់ត្រីមាសទី 3 ឆ្នាំ 2019 នេះផងដែរ៕
