Samsung Galaxy Note 21 អាចនឹងក្លាយជាស្មាតហ្វូនដំបូងបំផុត ដែលមានកាមេរ៉ាក្រោមអេក្រង់ ស្របពេលដែល A-Series នឹងក្លាយជាអ្នកបន្ទាប់

នៅក្នុងព្រឹត្តិការណ៍ CES 2021 គឺចាប់ផ្តើមបើកជាផ្លូវការហើយ ជាពិសេសក្រុមហ៊ុន Samsung បានប្រាកសបង្ហាញនូវវីដេអូផ្សព្វផ្សាយមួយនៅថ្ងៃដំបូងនៅក្នុងព្រឹត្តិការណ៍នេះផងដែរ។ នៅក្នុងវីដេអូនេះ យើងអាចមើលឃើញនូវស្មាតហ្វូនដែលមានអេក្រង់ថ្មីពេញគែមផងដែរ។ មានរបាយការណ៍ជាច្រើនដែលនិយាយថា នេះ គឺជាស្មាតហ្វូន Galaxy Note 21 ដែលនឹងបង្ហាញខ្លួននៅក្នុងឆមាសទី 2 ឆ្នាំនេះ។ នេះ គឺជាស្មាតហ្វូនដំបូងបំផុតរបស់ក្រុមហ៊ុន Samsung ដែលមានកាមេរ៉ាខាងក្រោមអេក្រង់។

តាមការបញ្ជាក់របស់ LetsGoDigital បានអោយដឹងថា ក្រុមហ៊ុន Samsung បានធ្វើការនៅលើការស្រាវជ្រាវនិងការអភិវឌ្ឍទៅលើកាមេរ៉ាខាងក្រោមអេក្រង់សម្រាប់រយៈពេល 2 ឆ្នាំមុនមកម្លេះ ក្រុមហ៊ុន Samsung នឹងបង្ហាញនូវស្មាតហ្វូនជាច្រើនដែលមានបច្ចេកវិទ្យានេះនៅក្នុងឆ្នាំ 2021 នេះ។

ក្រុមហ៊ុន Samsung ប្រហែលជាបង្ហាញនូវស្មាតហ្វូនដែលមានកាមេរ៉ាខាងក្រោមអេក្រង់នៅក្នុងឆមាសទី 2 ឆ្នាំ 2021 នេះ ជាមួយនឹងមានវត្តមានរបស់ស្មាតហ្វូន Galaxy Note 21 Ultra។ សម្រាប់ពេលនេះ យើងនៅមិនទាន់ច្បាស់នោះទេ នៅពេលដែលស្មាតហ្វូន Samsung Galaxy ដែលប្រើប្រាស់នូវកាមេរ៉ាខាងក្រោមអេក្រង់ ដែលនឹងបង្ហាញខ្លួន។ 

យោងតាមព័ត៌មានថ្ងៃនេះ គឺបាននិយាយថា ស្មាតហ្វូន  Samsung Galaxy S21 series នឹងបង្ហាញខ្លួននៅលើទីផ្សារនៅសប្តាហ៍ក្រោយនេះ។ ប៉ុន្តែសម្រាប់ស្មាតហ្វូនទាំង 3 ម៉ូឌែលនេះ នឹងមានកាមេរ៉ា Punch-Hole Selfie។  ដូច្នេះផ្អែកលើឯកសារនេះ បញ្ជាក់ថា ស្មាតហ្វូន Galaxy S21 នឹងក្លាយជាស្មាតហ្វូន Flagship ចុងក្រោយបំផុត ដែលនឹងមិនមានកាមេរ៉ាខាងក្រោមអេក្រង់នោះទេ។

សូមជំរាបថា មានមនុស្សជាច្រើន បានជឿជាក់ថា ស្មាតហ្វូន Galaxy Z Fold 3 ជំនាន់ថ្មី ក៏នឹងមានកាមេរ៉ាខាងក្រោមអេក្រង់ផងដែរ។ ក្រុមហ៊ុន Samsung អាចនឹងប្រើប្រាស់នូវបច្ចេកវិទ្យានេះ នៅលើស្មាតហ្វូនថ្នាក់កណ្តាលត្រកូល A-series របស់ខ្លួនដូចគ្នា ស្របពេលដែលកន្លងមក ស្មាតហ្វូន Galaxy A8s ដែលបានបង្ហាញខ្លួននៅក្នុងឆ្នាំ 2018 នោះ ក៏បានភ្ជាប់ជាមួយនឹងអេក្រង់ទម្លុះអេក្រង់មុនគេផងដែរ។ ស្មាតហ្វូន Samsung Galaxy S22 នឹងមានទម្រង់ថ្មីនៃកាមេរ៉ា Selfie ផងដែរ៕