នៅក្នុងព្រឹត្តិការណ៍សន្និសីទអ្នកអភិវឌ្ឍកម្មវិធីពិភពលោក (World Wide Developers Conference) កាលពីម្សិលមិញនេះ ក្រុមហ៊ុនបច្ចេកវិទ្យា Apple បានប្រកាសចេញនូវកុំព្យូទ័រ MacBook Air ដែលប្រើប្រាស់នូវបន្ទះឈីបថ្មី M2។ កុំព្យូទ័រថ្មីនេះគឺមានរូបរាងថ្មីដែលភ្ជាប់នូវបច្ចេកវិទ្យា Magsafe Charging និងថាមពលថ្មបានយូរជាងមុនថែមទៀតផង។ បន្ថែមពីនេះទៀតនោះ សម្រាប់ម៉ូដែល MacBook Pro 13 អ៊ីង ក៏ប្រើប្រាស់ជាមួយនឹងបន្ទះឈីប M2 ផងដែរ។
បើនិយាយពីរូបរាងវិញ សម្រាប់កុំព្យូទ័រ MacBook Air ថ្មីនេះ គឺមានការឌីស្សាញរូបរាងស្រស់ស្អាតជាងមុន និងមើលទៅស្តើង និងកម្រាស់ត្រឹមតែ 11mm និងទម្ងន់ត្រឹមតែ 2.7 ផោន (1.22kg) ប៉ុណ្ណោះ។ កុំព្យូទ័រថ្មីនេះ មានភ្ជាប់ជាមួយនឹងអេក្រង់ទំហំ 13.6 អ៊ីង Liquid Retina និងកម្រិតពន្លឺ 500 nits និងពណ៌ 1 ពាន់លានថែមទៀតផង។ សម្រាប់កាមេរ៉ារបស់កុំព្យូទ័រជំនាន់ថ្មីនេះ មានកម្រិតភាពច្បាស់ដល់ទៅ 1080p។
MacBook Air ម៉ូដែលថ្មីនេះ គឺមានភ្ជាប់ជាមួយ Magic Keyboard ហើយក៏មានភ្ជាប់ជាមួយនឹង MagSafe Charging ផងដែរ។ ក្រៅពីនេះនៅលើម៉ាស៊ីននេះ ក៏មានភ្ជាប់ជាមួយនឹង 2xUSB-C ports និងមានរន្ធដោតកាសស្តាប់ 3.5mm ព្រមទាំងមានថាមពលថ្មអាចប្រើប្រាស់បាន 18 ម៉ោង។ MacBook Air នេះ មានភ្ជាប់ជាមួយនឹងប្រព័ន្ធ quad-speaker ដែលមានលក្ខណៈប្លែកពីការឌីស្សាញជំនាន់មុននេះ។
M2 MacBook Air នេះ គឺមានជម្រើសពណ៌ Space Gray, Silver, Midnight Blue និង Starlight Gold ហើយនិងមានខ្សែប្រភេទ MagSafe Charging ផងដែរ។ កុំព្យូទ័រនេះ ទ្រទ្រង់នូវ Fast Charging ជាមួយនឹង 67W USB-C adapter។ កុំព្យូទ័រថ្មីនេះ នឹងដាក់លក់នៅក្នុងខែកក្កដាខាងមុខនេះជាមួយនឹងតម្លៃ $1,199 ហើយវាក៏អាចភ្ជាប់ជាមួយនឹង 2TB SSD និងរ៉េមទំហំ 24GB ផងដែរ។ M1 MacBook Air នៅតែមានតម្លៃចាប់ពី $999 ។
MacBook Pro 13 អ៊ីង វិញ គឺមានការបំពាក់ជាមួយនឹងបន្ទះឈីបថ្មី មានគែម Bezel នៅក្រាស់ និងមាន Keyboard របស់ Apple ដែលមានភ្ជាប់ជាមួយនឹង Touch Bar ។ កុំព្យូទ័រ MacBook Pro 13 អ៊ីង ដែលមានភ្ជាប់ជាមួយនឹង M2 នេះមានតម្លៃ $1,299 ៕
