OPPO សហការជាមួយនឹងក្រុមហ៊ុន AMBUSH ឌីស្សាញនូវសម្បកទូរស័ព្ទដ៏ពិសេសសម្រាប់ Find N3 Flip

ថ្មីៗនេះ ក្រុមហ៊ុន OPPO និងក្រុមហ៊ុនរចនាម៉ូត AMBUSH បានសហការគ្នាក្នុងការឌីស្សាញទៅលើសម្បកទូរស័ព្ទយ៉ាងពិសេសសម្រាប់ស្មាតហ្វូនបត់បានជំនាន់ថ្មី OPPO Find N3 Flip។ សម្រាប់សម្បកទូរស័ព្ទនេះ គឺមានឈ្មោះហៅថា Flipped Padlock នឹងត្រូវបានបង្កើតឡើងដោយអ្នកច្នៃប្រឌិត Yoon Ahn ដែលជាបុគ្គលដ៏ល្បីរបស់ក្រុមហ៊ុន  AMBUSH តាមរយៈនៃការបំផុសគំនិតចេញពី Heart Padlock Bag ដ៏ពេញនិយមបំផុត។

សម្បកទូរស័ព្ទថ្មីនេះ គឹមានពណ៌ផ្កាឈូកដ៏ទាន់សម័យ ហើយមានដៃទាញដែលការរចនាចេញមានលោហៈធាតុថែមទៀតផង។ សូមជំរាបថា AMBUSH គឺជាម៉ាកយីហោសម្លៀកបំពាក់ដ៏ប្រណិតដែលមានការគ្រប់គ្រងដោយអ្នកឌីស្សាញអាមេរិកកូរ៉េដ៏ល្បីល្បាញ Yoon Ahn។ កាលពីពេលមុននេះ ក្រុមហ៊ុននេះ ក៏ធ្លាប់បានសហការជាមួយនឹងក្រុមហ៊ុនបច្ចេកវិទ្យាធំៗជាច្រើនដូចជា Nike, Converse និង Moët & Chandon ជាដើម។

ក្រុមហ៊ុន OPPO បាននិយាយថា សម្បកទូរស័ព្ទ OPPO X AMBUSH Flipped Padlock ដែលគេឌីស្សាញសម្រាប់ស្មាតហ្វូនបត់បាន Find N3 Flip នេះ នឹងបង្ហាញខ្លួននៅក្នុងប្រទេសចិន ប្រទេសឥណ្ឌា ប្រទេសឥណ្ឌូនេស៊ី ម៉ាឡេស៊ី សិង្ហបុរី ថៃ និងហ្វីលីពីន ប៉ុន្តែមកដល់ពេលនេះ គេនៅមិនទាន់លក់នៅឡើយទេ។ បើនិយាយអំពីលក្ខណៈសម្បត្តិនៃស្មាតហ្វូនបត់បាន Find N3 Flip នេះ ស្មាតហ្វូនបត់បាននេះ មានអេក្រង់ទំហំ 6.8-អ៊ីង LTPO គាំទ្រជាមួយនឹងល្បឿន 120Hz refresh rate និងពន្លឺអេក្រង់ 1600nits។ អេក្រង់ទី 2 របស់ស្មាតហ្វូននេះ មានទំហំ 3.2 អ៊ីង ដែលអេក្រង់នេះ គឺជាប្រភេទកញ្ចក់ AMOLED ជាមួយនឹងកញ្ចក់ការពារ Corning Gorilla Glass Victus ថែមទៀតផង។

សម្រាប់កាមេរ៉ាខាងនៅលើស្មាតហ្វូន OPPO Find N3 Flip នេះ មានកាមេរ៉ាខាងក្រោយ 3 គ្រាប់ដែលមានទំហំ 50MP មានមុខងារ OIS និងគ្រាប់ទីពីរមានទំហំ 32MP telephoto ហើយនិងគ្រាប់ទីបីមានទំហំ 48MP ultra-wide-angle lens។ ស្មាតហ្វូននេះ មានកាមេរ៉ាខាងមុខទំហំ 32MP។ ស្មាតហ្វូន OPPO Find N3 Flip នេះមានបន្ទះឈីប Dimensity 9200 ជាមួយនឹងរ៉េមទំហំ 12GB និងអង្គចងចាំទំហំ 256GB។ ស្មាតហ្វូនថ្មីនេះ មានថាមពលថ្មទំហំ 4,300mAh និងបច្ចេកវិទ្យា 44W fast charging។ ស្មាតហ្វូនបត់បាននេះដំណើរការនូវប្រព័ន្ធប្រតិបត្តិការ Android 13 ជាមួយនឹងការអាប់ដេតបានដល់ទៅ 4 ឆ្នាំ៕