នៅពេលនេះ ស្មាតហ្វូនបត់បានស៊េរីថ្មី Galaxy Z Fold 7 របស់ក្រុមហ៊ុន Samsung ត្រូវបានគេទម្លាយចេញនូវរូបរាងដំបូងបំផុតរបស់ខ្លួនហើយនេះបើតាមអ្នកទម្លាយ Jukan Choi ដែលបង្ហោះនៅលើ X។ ស្មាតហ្វូននេះមានពណ៌ខៀវស្តើងយ៉ាងស្រស់ស្អាតខ្លាំងមែនទែន។ តាមរយៈរូបភាពបែកធ្លាយថ្មីនេះ បានបង្ហាញអំពីរាងដ៏ស្តើងរបស់ស្មាតហ្វូននេះ ស្តើងជាងស្មាតហ្វូន Fold 6 ប៉ុន្តែមិនទាន់ជាប់ឈ្មោះជាស្មាតហ្វូនបត់បានស្តើងបំផុតរបស់ពិភពលោកនោះទេ។ ថ្មីៗនេះ ក្រុមហ៊ុន Honor ទើបតែបង្ហាញស្មាតហ្វូនបត់បាន Honor Magic V5 ដែលមានកម្រាស់ត្រឹមតែ 8.8mm នៅពេលដែលបិទ។
តាមការបញ្ជាក់នៅក្នុងរបាយការណ៍ថ្មីមួយបានបញ្ជាក់ថា ស្មាតហ្វូន Fold 7 នេះ អាចនឹងមានកម្រាស់ 9mm បើធៀបជាមួយនឹងស្មាតហ្វូន Fold 6 គឺមានកម្រាស់ 12.1mm ។ រូបភាពនៅលើស្មាតហ្វូននេះមានការទម្លាយនូវ Speaker grille, SIM card slot, microphone និងantenna band នៅផ្នែកខាងក្រោមស្មាតហ្វូននេះ។ រូបភាពផ្សេងទៀតក៏មានការបង្ហាញនូវផ្នែកខាងមុខ និងផ្នែកខាងក្រោយរបស់ស្មាតហ្វូននេះផងដែរ។ ផ្នែកខាងមុខរបស់ស្មាតហ្វូននេះគឺប្រើប្រាស់នូវ Protective Film ហើយផ្នែកខាងក្រោយរបស់ស្មាតហ្វូននេះមានពណ៌ខៀវ ជាមួយនឹងកាមេរ៉ាបញ្ឈរ 3 គ្រាប់ផងដែរ។
បើនិយាយអំពីកាមេរ៉ានេះ ស្មាតហ្វូន Z Fold 7 នេះ នឹងមានកាមេរ៉ាគោលទំហំ 200MP, 12MP ultrawide និងមួយគ្រាប់ទៀតមានទំហំ 10MP 3x telephoto។ ស្មាតហ្វូននេះ ប្រើប្រាស់នូវបន្ទះឈីប Snapdragon 8 Elite របស់ក្រុមហ៊ុន Qualcomm ជាមួយនឹង One UI 8 នៅលើ Android 16។ ក្រុមហ៊ុន Samsung អាចនឹងបោះបង់ចោលនូវកាមេរ៉ាខាងក្រោមអេក្រង់ និងប្រើប្រាស់នូវ hole-punch វិញ។ ឆាប់ៗនេះយើងនឹងទទួលបាននូវព័ត៌មានជាច្រើនទៀត។
សូមជំរាបថា ព្រឹត្តិការណ៍ Galaxy Unpacked របស់ក្រុមហ៊ុន Samsung នឹងរៀបចំឡើងនៅថ្ងៃទី 9 ខែកក្ដដាខាងមុខនេះ នៅក្នុងទីក្រុងញ៉ូវយ៉ក ដែលស្មាតហ្វូន Fold 7 នឹងបង្ហាញខ្លួនជាមួយនឹងស្មាតហ្វូន Galaxy Z Flip 7, Galaxy Watch 8 រួមជាមួយនឹងស្មាតហ្វូនបត់បាន 3 តង់ផងដែរ៕
