ពាក្យចចាមអារ៉ាមថ្មីនិយាយថា ប្រព័ន្ធកាមេរ៉ានៅលើ Galaxy S26 Ultra ប្រហែលជាមិនមានការផ្លាស់ប្តូរទេ

គិតមកដល់ពេលនេះ បើទោះបីជាសល់ពេលជាច្រើនទៀត ទំរាំដល់ថ្ងៃប្រកាសេចេញជាផ្លូវការណ៌នូវ Samsung Galaxy S26 Series ក៏ដោយ ស្មាតហ្វូនជំនាន់ថ្មីនេះ ត្រូវបានគេទម្លាយចេញនូវព័ត៌មានជាច្រើនរួចមកហើយ ដោយក្នុងនោះ ពាក្យចចាមអារ៉ាមជាច្រើន គឺបាននិយាយអំពីស្មាតហ្វូនស៊េរីថ្មី Galaxy S26 Ultra។ បើតាមការបែកធ្លាយជាបន្តបន្ទាប់នាពេលកន្លងមកនោះ គឺបាននិយាយថា ក្រុមហ៊ុន Samsung ប្រហែលជាមិនមានការផ្លាស់ប្តូរខ្លាំងទៅលើស្មាតហ្វូនជំនាន់ថ្មីរបស់ខ្លួននោះទេ។

នារយៈពេលប៉ុន្មានឆ្នាំចុងក្រោយនេះ មានអ្នកប្រើប្រាស់ជាច្រើន បានបង្ហាញពីក្តីរំពឹងថា ស្មាតហ្វូនជំនាន់ថ្មីនេះ គឺអាចនឹងមានការ Upgrade ទៅលើកាមេរ៉ាគោលអោយកាន់តែមានសមត្ថភាពខ្ពស់ជាងម៉ូដែលមុនៗ ប៉ុន្តែបើមើលទៅលើការវិវត្តន៌របស់ក្រុមហ៊ុន Samsung ប្រហែលជាមិនទាន់ធ្វើការ Upgrade ទៅលើកាមេរ៉ាគោលនៅលើស្មាតហ្វូនជំនាន់ថ្មី Galaxy S26 Ultra នោះទេ។ យោងទៅតាមរបាយការណ៍មួយចេញពី GalaxyClub បានអះអាងថា ស្មាតហ្វូន Galaxy S26 Ultra នេះអាចនឹងមានកាមេរ៉ាគោលខាងក្រោយ 200-Megapixel ដូចទៅនឹងស្មាតហ្វូនជំនាន់មុនអញ្ចឹង។ 

ប៉ុន្តែទាក់ទងនឹងព័ត៌មាននេះ គឺនៅមិនទាន់ច្បាស់ថា ក្រុមហ៊ុនបច្ចេកវិទ្យាយក្សកូរ៉េខាងត្បូងមួយនេះ អាចនឹងនាំយកនូវសិនស័រថ្មីនេះ ឬប្រើប្រាស់នូវសិនស័រដូចគ្នាទៅនឹងស្មាតហ្វូនជំនាន់មុន Galaxy S25 Ultra នៅឡើយទេ។ បន្ថែមពីនេះ ក្រៅពីកាមេរ៉ាក៏មានរបាយការណ៍មួយទៀតបានទម្លាយថា ថាមពលថ្មរបស់ស្មាតហ្វូន Galaxy S26 Ultra នេះ អាចនឹងមានទំហំ 5,000mAh ដូចគ្នាទៅនឹងស្មាតហ្វូនជំនាន់មុនផងដែរ ប៉ុន្តែក្រុមហ៊ុន Samsung អាចនឹងបង្ហាញនូវបច្ចេកវិទ្យាថាមពលថ្មថ្មីនៅលើស្មាតហ្វូនជំនាន់ថ្មី នេះបើពាក្យចចាមអារ៉ាមជាច្រើនបញ្ជាក់កន្លងមក។ ជាមួយគ្នានេះ ស្មាតហ្វូនជំនាន់ថ្មីនេះ អាចនឹងដកចេញនូវរន្ធសម្រាប់ដោត S Pen ថែមទៀតផង៕