តម្លៃស្មាតហ្វូនអេក្រង់បត់បានស៊េរីថ្មី vivo X Fold 5 សម្រាប់ទីផ្សារសកលត្រួវគេទម្លាយចេញហើយ

កាលពីថ្ងៃទី 14 ខែកក្កដានេះ ក្រុមហ៊ុន vivo ទើបតែទម្លាយព័ត៌មានរបស់ស្មាតហ្វូនអេក្រង់បត់បានស៊េរីថ្មី Vivo X Fold 5 ដែលត្រៀមសម្រាប់ដាក់លក់នៅក្នុងទីផ្សារប្រទេសឥណ្ឌាហើយ។ គួរបញ្ជាក់ថា មុននេះ មានការរំពឹងជាច្រើនធ្លាប់និយាយថា ស្មាតហ្វូនអេក្រង់បត់បាននេះ នឹងមានលក្ខណៈសម្បត្តិដូចគ្នាទៅនឹង version នៅប្រទេសចិន ដែលបានបង្ហាញខ្លួនកាលពីខែមុននេះអញ្ចឹងដែរ។ នៅថ្ងៃនេះ មុនការប្រកាសជាផ្លូវការស្មាតហ្វូនអេក្រង់បត់ X Fold 5 នៅលើទីផ្សារកលនោះ មានការបញ្ចេញនូវរូបភាពថ្មីនៅលើបញ្ជី Geekbench ដោយបង្ហាញថា ស្មាតហ្វូននេះមានលេខម៉ូឌែល V2429។ 

តាមរយៈរបាយការណ៌ថ្មីនៅក្នុងបញ្ជី Geekbench បង្ហាញថា ស្មាតហ្វូន vivo X Fold 5 (V2429) នេះ អាចប្រើប្រាស់នូវបន្ទះឈីប Snapdragon 8 Gen 3។ ខណៈពេលដែលឈ្មោះនៃបន្ទះឈីបនេះ មិនទាន់បានទម្លាយនៅក្នុងបញ្ជីនេះទេ ប៉ុន្តែបើមើលទៅលើលក្ខណៈសម្បត្តិលម្អិតនៃបន្ទះឈីប និង GPU គឺអាចសន្និដ្ឋានបានថា ប្រហែលជាងបន្ទះឈីប Snapdragon 8 Gen 3 ពិតមែនហើយ។ នៅក្នុងបញ្ជីនេះបន្តទម្លាយថា ស្មាតហ្វូនអេក្រង់បត់បាន vivo X Fold 5 នេះ មានរ៉េមទំហំ 16GB និងដំណើរការនៅលើប្រព័ន្ធប្រតិបត្តិការ Android 15។ នៅក្នុងការតេស្ត single-core និង multi-core នៅលើ Geekbench នេះគឺមានពិន្ទុរៀងគ្នាគឺ 2142 និង  6315 ។

យោងតាមអ្នកទម្លាយ Abhishek Yadav ដែលបង្ហោះនៅលើបណ្តាញ X បានបញ្ជាក់ថា ស្មាតហ្វូនអេក្រង់បត់បានស៊េរីថ្មី Vivo X Fold 5 នេះ មានតម្លៃ 1750 ដុល្លារ ទៅលើទំហំ 16GB+512GB។ ជាមួយគ្នានេះ ក្រុមហ៊ុន Vivo ក៏បានបញ្ជាក់ដែរថា ស្មាតហ្វូន vivo X200 FE ក៏នឹងបង្ហាញខ្លួនជាមួយស្មាតហ្វូនបត់បាន  X Fold 5 នៅក្នុងប្រទេសឥណ្ឌា នាថ្ងៃទី 14 ខែកក្កដានេះដែរ ។ អ្នកទម្លាយរូបនេះ បានបន្ថែមថា ស្មាតហ្វូនស៊េរីថ្មី X200 FE នេះ មាន 2 ទំហំគឺ 12GB+256GB មានតម្លៃ 640 ដុល្លារ និង និងទំហំ 16GB+512GB មានតម្លៃ 700 ដុល្លារ ៕