TECNO Ultimate G Fold Concept គំនិតច្នៃប្រឌិតថ្មី មានអេក្រង់បត់ 3 តង់ចូលក្នុង (Dual Inward)

ថ្មីៗនេះ ក្រុមហ៊ុន TECNO បាននាំយកនូវស្មាតហ្វូនបត់បានជាច្រើនរបស់ខ្លួនទៅកាន់កម្រិតថ្មីមួយទៀតជាមួយនឹងវត្តមានស្មាតហ្វូន PHANTOM Ultimate G Fold Concept ។ សម្រាប់ស្មាតហ្វូន Concept នេះ គឺមានទម្រង់នៃការឌីស្សាញ 3 តង់ជាមួយនឹងអេក្រង់ភ្លោះបត់ចូលក្នុងយ៉ាងទាក់ទាញបំផុត។ ជាមួយនឹងទម្រង់នៃការបត់  G-style folding នេះ ក្រុមហ៊ុននេះបានវិវត្តទៅកាន់ទម្រង់ថ្មីមួយដែលខុសប្លែកពីទម្រង់ Book-style និង outward tri-fold foldables ។

ភាពច្នៃប្រឌិតធំបំផុតទៅលើស្មាតហ្វូន PHANTOM Ultimate G Fold នេះ គឺការឌីស្សាញទម្រង់បត់ចូលក្នុង dual-inward-folding tri-fold ។ ខុសប្លែកពីស្មាតហ្វូនបត់បាន 3 តង់ជាច្រើនទៀតដែលមានទម្រង់បត់ចេញក្រៅនោះ សម្រាប់ស្មាតហ្វូន TECNO Concept នេះ គឺមានទម្រង់អេក្រង់បត់ចូលខាងក្នុង។ ទម្រង់នៃការឌីស្សាញនេះគឺផ្តល់នូវភាពងាយស្រួលក្នុងការទស្សនា និងការងារ multitasking ។

ដើម្បីអោយការងារប្រើប្រាស់ប្រចាំថ្ងៃកាន់តែងាយស្រួលជាងមុននោះ ស្មាតហ្វូននេះ ក៏មានអេក្រង់ខាងក្រៅទី 2 ផងដែរ។ អេក្រង់នៅលើស្មាតហ្វូននេះ អាចប្រើប្រាស់ជាស្មាតហ្វូនធម្មតានៅពេលដែលស្មាតហ្វូននេះបត់ ដែលអនុញ្ញាតអោយស្មាតហ្វូននេះអាចគ្រប់គ្រងទៅលើការខល ការផ្ញើរសារ និងការងារមួយចំនួនទៀតដោយមិនចាំបាច់បើកស្មាតហ្វូននេះទេ។ នៅពេលដែលបើកស្មាតហ្វូននេះ អេក្រង់ខាងក្នុងធំរបស់វានឹងផ្តល់នូវទម្រង់ជាថេប្លេត ឬកុំព្យូទ័រតូចមួយអាស្រ័យទៅលើរបៀបដែលដាក់ស្មាតហ្វូននេះ។

ក្រុមហ៊ុន TECNO បានអះអាងថា ស្មាតហ្វូន  PHANTOM Ultimate G Fold ពិតជាមានរូបរាងស្តើងមែនទែន។ ក្រុមហ៊ុននេះបញ្ជាក់ថា វាគឺជាស្មាតហ្វូនបត់បាន 3 តង់ដ៏ស្តើងបំផុតក្នុងការប្រើប្រាស់។ ក្រុមហ៊ុន TECNO អាចនឹងប្រកាសជាផ្លូវការស្មាតហ្វូនបត់បាន  PHANTOM Ultimate G Fold Concept នៅពាក់កណ្តាលខែកក្កដានេះ។ ខណៈពេលដែលនេះ គឺជាស្មាតហ្វូន Concept នោះ នៅតែជារបកគំហើញថ្មីមួយទៀតសម្រាប់ស្មាតហ្វូនបត់បាន 3 តង់នេះ៕