តាមដំណឹងថ្មីៗនេះ បង្ហើបថា ក្រុមហ៊ុន Honor កំពុងតែផ្តោតទៅលើការបង្កើនទំហំថាមពលថ្មសម្រាប់ស្មាតហ្វូនជាច្រើនរបស់ខ្លួនហើយ។ ថ្មីៗនេះ បន្ទាប់បានពីការប្រកាសចេញនូវស្មាតហ្វូន Honor Win និង Win RT ជាមួយនិងថាមពលថ្មទំហំ 10,000mAh ហើយនិងស្មាតហ្វូន Honor Power 2 ដែលមានថាមពលថ្មដល់ទៅ 10,080mAh រួចហើយនោះ នៅពេលនេះ មានការបែកធ្លាយថ្មីមួយបញ្ជាក់ថា ស្មាតហ្វូនស៊េរីថ្មី Magic 9 Series អាចនឹងបន្តផ្តោតទៅលើនិន្នាការថ្មីនៃការបង្កើនថាមពលថ្មនេះ។
យោងតាមការបែកធ្លាយថ្មីមួយនៅថ្ងៃនេះ បានអោយដឹងថា ស្មាតហ្វូន Flagship ជំនាន់ថ្មីរបស់ក្រុមហ៊ុននេះ នឹងមានការបង្កើនថាមពលថ្មកាន់តែធំជាងស្មាតហ្វូនជំនាន់មុនរបស់ខ្លួន។ ផ្អែកតាមអ្នកទម្លាយ Smart Pikachu បានអះអាងថា ស្មាតហ្វូន Magic 9 ថ្មីនេះ នឹងផ្តោតទៅលើការពង្រឹងថាមពលថ្មដើម្បីអាចប្រើប្រាស់បានយូរ។ ស្មាតហ្វូនស៊េរីថ្មីនេះអាចនឹងមានការបង្កើនទំហំថាមពលថ្មចន្លោះពី 8,000mAh និង 9,000mAh ហើយនឹងមានការ upgrade ច្រើនទៀត បើធៀបជាមួយនឹងស្មាតហ្វូន Magic Series ជំនាន់មុនៗនេះ។
បើមើលទៅលើស្មាតហ្វូនជំនាន់ថ្មី Honor Magic 8 មានអេក្រង់ទំហំ 6.58 អ៊ីង និងថាមពលថ្មទំហំ 7,000mAh ខណៈពេលដែលស្មាតហ្វូន Magic 8 Pro និង Magic 8 RSR មានអេក្រង់ទំហំ 6.71 អ៊ីង និងថាមពលថ្មទំហំ 7,100mAh។ ស្មាតហ្វូនទាំងនេះ គឺមានការបំពាក់នូវបន្ទះឈីប Snapdragon 8 Elite Gen 5 ដែលមានការបង្កើនទៅលើប្រសិទ្ធិភាព និងសមត្ថភាពកាន់តែខ្លាំងក្លា។
បើតាមពាក្យចចាមអារ៉ាមថ្មីបានបញ្ជាក់ថា ស្មាតហ្វូនជំនាន់ថ្មី Magic 9 Series នេះ នឹងប្រើប្រាស់នូវបន្ទះឈីប Snapdragon 8 Elite Gen 6។ សម្រាប់ស្មាតហ្វូន Magic 9 នឹងមានអេក្រង់ទំហំ 6.3 អ៊ីង ខណៈពេលដែលស្មាតហ្វូន Magic 9 Pro / RSR អាចនឹងមានការបង្កើនទំហំដល់ទៅ 6.85 អ៊ីង។
ក្រុមហ៊ុន Honor ក៏បានធ្វើការនៅលើស្មាតហ្វូន Honor 600 Series ដែលអាចនឹងបង្ហាញខ្លួននៅក្នុងប្រទេសចិន នៅខែឧសភាឆ្នាំ 2026 នេះ ។ របាយការណ៍ថ្មីៗនេះ បានអះអាងថា ស្មាតហ្វូន Honor 600 Series នេះ អាចនឹងមានអេក្រង់ទំហំ 6.57 អ៊ីង OLED និងថាមពលថ្មទំហំ 9,000mAh។ សម្រាប់ព័ត៌មានលម្អិតជាច្រើនទៀតរបស់ស្មាតហ្វូន Honor 600 series នេះនៅមិនទាន់ដឹងនៅឡើយទេ៕
