ការប្រមូលរថយន្ត Tesla លក្ខណៈទ្រទ្រាយធំដោយសារមានបញ្ហាទៅលើប្រព័ន្ធមុខងារបើកបរដោយស្វ័យប្រវត្តិ ឬ Full Self-Driving (FSD) បានចាប់ផ្តើមដំណើរការជាផ្លូវការណ៍ហើយ។ ចំពោះរថយន្តដែលក្រុមហ៊ុន Tesla ចាប់ផ្តើមធ្វើការប្រមូលមកវិញ គឺមានចាប់ពី Tesla Model S និង Model X ឆ្នាំផលិត 2016, Tesla Model 3 ឆ្នាំផលិត 2017 និង Tesla Model Y ឆ្នាំផលិត 2020 ដែលសរុបមានចំនួន 362,758 គ្រឿង។
ចំពោះបញ្ហាលើប្រព័ន្ធមុខងារបើកបរស្វ័យប្រវត្តិ FSD ត្រូវបានគេរាយការណ៍ថា វាមិនអាចដំណើរការគ្រប់គ្រង់បានក្នុងស្ថានភាពមួយចំនួន ដូចជាការបញ្ជារថយន្តបើកបរហួសល្បឿនកំណត់ បើកបរឆ្លងកាត់ផ្លូវប្រសព្វខុសលក្ខណៈបច្ចេកទេស ឬមិនអាចទាយទុកមុនបាន ដែលបង្កើននៅហានិភ័យក្នុងការបើកបរ។ សេចក្តីជូនដំណឹងអំពីការប្រមូលមកវិញដែលបង្ហោះដោយរដ្ឋបាលសុវត្ថិភាពចរាចរណ៍ផ្លូវហាយវេជាតិ (NHTSA) បានអំពាវនាវជាពិសេសចំពោះភាពមិនប្រក្រតីនៅលើផ្លូវប្រសព្វ ដោយកត់សម្គាល់ថាយានជំនិះដែលប្រើប្រាស់មុខងារ FSD គឺអាចបន្តទៅមុខត្រង់ បើទោះបីជាវាស្ថិតក្នុងគន្លងផ្លូវបត់ក៏ដោយ ឬបន្តឆ្លងកាត់ភ្លើងពណ៌លឿង។
ទាក់ទិននឹងបញ្ហាខាងលើនេះ ក្រុមហ៊ុនក៏ត្រៀមបញ្ចេញកំនែ Updated Software ក្នុងជំនាន់ FSD Beta ផងដែរដើម្បីដោះស្រាយបញ្ហាដំណើរការមិនប្រក្រតីដែលកើតមានឡើង។ ទោះជាយ៉ាងណាដំណោះស្រាយនេះហាក់មិនទទួលបានលទ្ធផលល្អប្រសើរឡើង ដូច្នេះហើយ Tesla ក៏បានប្រកាសប្រមូលរថយន្តរបស់ខ្លួនដ៏ច្រើនមកវិញ ដើម្បីការពារសុខសុវត្ថិភាពរបស់អ្នកប្រើប្រាស់។
ប្រព័ន្ធបើកបរដោយស្វ័យប្រវត្តិ ឬ Autopilot និង FSD របស់ Tesla បានស្ថិតនៅក្រោមការស៊ើបអង្កេតរបស់សហព័ន្ធមួយរយៈ ហើយឥឡូវនេះ ក្នុងអំឡុងពេលដែលស្ថាប័ន NHTSA បានបង្ហាញពីកង្វល់ដែលនាំទៅដល់ការប្រមូលមកវិញនេះ។ ដែលសំណើរឲ្យធ្វើការប្រមូលរថយន្តត្រូវបានផ្ញើទៅ Tesla កាលពីថ្ងៃទី 25 ខែមករា។ ហើយគិតត្រឹមថ្ងៃទី 14 ខែកុម្ភៈ Tesla បានកំណត់អត្តសញ្ញាណការអះអាងចំនួន 18 ដែលមានសក្តានុពលភ្ជាប់ទៅនឹងមុខងារ FSD ក្នុងស្ថានភាពជាក់លាក់។ ក្រុមហ៊ុនផលិតរថយន្តមិនទាន់ទទួលបានរបាយការណ៍ពីជនរងគ្រោះ ឬការស្លាប់ទាក់ទងនឹងបញ្ហាទាំងនេះនៅឡើយទេ៕