Honda e:Ny1 EV រថយន្តអគ្គិសនីស៊េរីថ្មីសាកមួយពេញម្តងរត់បានចំងាយផ្លូវ 412 គីឡូម៉ែត្រ

ថ្មីៗនេះក្រុមហ៊ុន Honda របស់ជប៉ុនបានធ្វើការប្រកាសចេញលក់រថយន្តអគ្គិសនីស៊េរីថ្មីជាប្រភេទ SUV ដែលមានឈ្មោះផ្លូវការណ៍ថា Honda e:Ny1 electronic SUVនៅលើទឹកដីនៃតំបន់ទ្វីបអឺរ៉ុប។ រថយន្តអគ្គីសនីស៊េរីថ្មីរបស់ក្រុមហ៊ុនជប៉ុនមួយនេះ ត្រូវបានរចនារូបរាងឡើងប្រកបដោយភាពប្រណិត និងមានភាពថ្លៃថ្នូរជាមួយនឹងសមត្ថភាពអាចរត់បានក្នុងរយះចំងាយផ្លូវដល់ 412 គីឡូម៉ែត្រនៅពេលសាកអាគុយមួយពេញម្តង។

e:Ny1 EV គឺជារថយន្តអគ្គិសនីម៉ូដែលទីពីររបស់ Honda ដែលបានប្រកាសចេញនៅអឺរ៉ុប ហើយក៏ជាជម្រើសរថយន្ត EV ខ្នាតធំជាងម៉ូដែលទីមួយផងដែរ។ Honda e:Ny1 គឺជាប្រភេទ Crossover SUV ហើយ Honda រំពឹងថា ម៉ូដែលថ្មីមួយនេះនឹងអាចប្រគួតប្រជែងជាមួយនឹងរថយន្ត Kia Niro EV, Subaru Solterra និង Volkswagen ID.4 ហើយនិងរថយន្តអគ្គិសនីម៉ូដែលដទៃទៀតនៅលើទឹកដីនៃតំបន់អឺរ៉ុប។ 

Honda e:Ny1 Electronic SUV ត្រូវបាន Honda បំពាក់ដោយថាមពលថ្មកំលាំង 68.8kWh និងដំណើរការដោយម៉ូទ័រអគ្គិសនីមួយដែលមានកំលាំង 150kW (single-motor front-wheel-drive electric drivetrain) ផ្តល់នូវកំលាំង 201hp និងកំលាំងរមូល 310Nm ដែលអាចជាន់ស្ទុះពី 0 ទៅ 100km ចាយពេលប្រមាណ 7.7 វិនាទី។ រថយន្តអគ្គិសនីស៊េរីថ្មីនេះ គាំទ្របច្ចេកវិទ្យាសាកភ្លើងល្បឿងលឿន fast-charging DC System ដែលអាចសាកពី 10% ឡើងទៅ 80% ចំនាយពេលខ្ទង់ប្រហែល 45 នាទីប៉ុណ្ណោះ។

នៅផ្នែកខាងក្នុងរបស់ Honda e:Ny1 EV SUV ត្រូវបានរចនាឡើងផ្តល់នូវទំហំធំទូលាយដែលផ្តល់នូវផាសុខភាពក្នុងការធ្វើដំណើរ។ ក្នុងនោះវាត្រូវបានបំពាក់នូវអេក្រង់កម្សាន្តប្រភេទ Touchscreen បញ្ឈរដែលមានទំហំធំដល់ទៅ 15.2-inch នោះចំកណ្តាល ខណៈប៊ូតុង Cruise Control និងប៊ូតុងបញ្ជាមុខងារផ្សេងៗទៀតស្ថិនៅលើដៃចង្កូតផ្ទាល់តែម្តង។ រីនៅខាងក្រោយចង្កូតក៏មានបំពាក់នូវអេក្រង់កុងទ័រឌីជីថលធំច្បាស់ទំហំ 10.3-inch។ 

Honda នឹងប្រកាសចេញលក់ Honda e:Ny1 EV SUV ជាផ្លូវការណ៍នៅទីផ្សារតំបន់អឺរ៉ុបនៅចុងឆ្នាំ 2023 នេះ ប៉ុន្តែ ក្រុមហ៊ុនមិនទាន់បញ្ជាក់ពីតម្លៃនៅឡើយទេ។ ទោះជាយ៉ាងណាបើតាមប្រភពមួយបានបង្ហើបថា Honda e:Ny1 EV SUV ស៊េរីថ្មីនេះអាចនឹងមានតម្លៃខ្ទង់ប្រហែល $38,000៕