BYD Atto 3 Evo ថ្មីដំណើរការដោយប្រព័ន្ធ 4WD គាំទ្រដោយប្រព័ន្ធភ្លើងកម្លាំង 800V និងបច្ចេកវិទ្យាសាកភ្លើងល្បឿនលឿន

ក្រុមហ៊ុន BYD បានប្រកាសចេញឡានអគ្គិសនីប្រភេទ Crossover ស៊េរីថ្មីម៉ូដែល Atto 3 Evo ជាផ្លូវការណ៍ ហើយឡាន Crossover EV ថ្មីនេះ នឹងចេញលក់នៅលើទីផ្សារសកលជាមួយការគាំទ្រប្រព័ន្ធភ្លើងកម្លាំង 800V, ដំណើរការដោយប្រព័ន្ធម៉ូទ័រពីរ ឬប៉ុងពីរ (4WD) រួមនិងបច្ចេកវិទ្យាសាកភ្លើងល្បឿនលឿន។ សមត្ថភាពរបស់ BYD Atto 3 Evo ថ្មីនេះ គឺអាចជាន់ស្ទុះល្បឿនពី 0-100km/h ប្រើពេលប្រមាណ 3.9 វិនាទី និងសាកភ្លើងចូលលឿនពី 10% ទៅ 80% ចាយពេលខ្ទង់ 25 នាទី តាមរយៈឆ្នាំងសាកប្រភេទ DC Fast Charging។

Atto 3 បានក្លាយជារថយន្តដំណើរការដោយថាមពលថ្មីដំបូងគេបង្អស់របស់ BYD ដែលចេញលក់នៅលើទីផ្សារទូទាំងពិភពលោកកាលពី 4 ឆ្នាំមុន។ Atto 3 ត្រូវបានចេញលក់នៅទីផ្សារប្រទេសចិនដោយប្រើឈ្មោះថា Yuan Plus។ នៅថ្ងៃទី 11 ខែកុម្ភៈ ឆ្នាំ 2026 ថ្មីៗនេះ BYD បានបញ្ចេញ Atto 3 ជំនាន់ថ្មីដែលមានឈ្មោះថា “Atto 3 Evo” ដែលមានគោលដៅចម្បងសម្រាប់ទីផ្សារសកល។ Atto 3 Evo ប្រើប្រាស់កញ្ចប់ថ្មទំហំធំដល់ 74.88 kWh។ 

Atto 3 Evo មានជម្រើសពីរម៉ូដែល គឺម៉ូដែល RWD និង 4WD ដោយម៉ូដែល RWD ដំណើរការដោយម៉ូទ័រអគ្គិសនីមួយកម្លាំង 230kW (308hp) និងកម្លាំងរមួល 380Nm ធៀបនឹងម៉ូដែលមុនវាមានកម្លាំងខ្លាំងជាង 107hp និងបានប្តូរពីការបំពាក់ម៉ូទ័រនៅខាងមុខទៅបំពាក់នៅផ្នែកខាងក្រោយវិញ។ Atto 3 RWD អាចជាន់ស្ទុះល្បឿនពី 0-100km/h ចាយពេលខ្ទង់ 5.5 វិនាទី ហើយការសាកភ្លើងពេញម្តងអាចបើកបានចម្ងាយផ្លូវ 650km តាមស្តង់ដារ CLTC។

ចំនែកម៉ូដែល Atto 3 Evo 4WD វិញបំពាក់ម៉ូទ័រអគ្គិសនីដែលមានកម្លាំងខ្លាំងដល់ 330kW (443hp) និងកម្លាំងរមួល 580N.m ដែលអាចជាន់ស្ទុះពីកុងទ័រ 0 ទៅ 100km/h ប្រើពេលខ្ទង់ 3.9 វិនាទី។ ម៉ូដែលនេះ អាចបើកបានចម្ងាយផ្លូវ 510km នៅពេលសាកភ្លើងពេញម្តង។ ចំនុចពិសេសសំខាន់មួយផ្សេងទៅរបស់ BYD Atto 3 Evo គឺការបំពាក់នូវប្រព័ន្ធប៊ូមថ្មី “five-link independent rear suspension”។ ទៅលើការឌីស្សាញផ្នែកខាងក្រៅរបស់ Atto 3 Evo មិនមានអ្វីផ្លាស់ប្តូរច្រើនខុសពីម៉ូដែលមុននោះទេ គ្រាន់មានការផ្លាស់ប្តូរកន្លែងសាកភ្លើងមកនៅលើត្រគៀកផ្នែកខាងក្រោយតែប៉ុណ្ណោះ។ 

ឡានអគ្គិសនី Crossover ស៊េរីថ្មីនេះមានប្រវែងតួរខ្លួន 4,455mm/ទទឹង 1,875mm/កម្ពស់ 1,0615mm និងគម្លាតកង់មុខទៅកង់ក្រោយ 2,720mm។ ចំនែកទំងន់បន្ទុកនៅឃ្លប់ខាងមុខអាចផ្ទុកទំងន់បានធ្ងន់ជាងមុនឡើង101kg និងឃ្លប់ខាងក្រោយក៏អាចផ្ទុកទំងន់បានធ្ងន់ជាមុនផងដែរ គឺអាចផ្ទុកបានដល់ 490Kg។ ផ្នែកខាងក្នុងមានការបំពាក់នូវអេក្រង់កម្សាន្តប្រភេទ Touchscreen ទំហំ 15.6-inch និងអេក្រង់បង្ហាញព័ត៌មានប្រភេទ LCD ទំហំ 8.8-inch និងកន្លែងសាកថ្មស្មាតហ្វូនឥតប្រើខ្សែជាដើម៕