ក្រុមហ៊ុនផលិតរថយន្តអគ្គិសនីខ្នាតយក្សរបស់ប្រទេសចិនដែលកំពុងមានសក្តានុភាពខ្លាំងនៅលើទីផ្សារពិភពលោក បាននឹងខិតខំពង្រីកដែនទីផ្សាររថយន្តអគ្គិសនីរបស់ខ្លួនចូលទៅក្នុងតំបន់សមាគមប្រជាជាតិអាស៊ីអាគ្នេយ៍ “Association of Southeast Asian Nations” ហៅកាត់ថា ASEAN ដោយក្រុមហ៊ុននេះបានផ្តោតសំខាន់នៅក្នុងទីផ្សារប្រទេសសិង្ហបុរី និងភីលីពីន សម្រាប់ឆ្នាំ 2024 នេះ។
លោក James Ng នាយកគ្រប់គ្រងរបស់ BYD ប្រចាំប្រទេសសិង្ហបុរី និងហ្វីលីពីន បានលើកឡើងពីយុទ្ធសាស្ត្ររបស់ក្រុមហ៊ុនក្នុងការបង្កើតវត្តមានដ៏រឹងមាំនៅក្នុងទីផ្សារអាស៊ាន។ ការចង់សម្ព័ន្ធវប្បធម៌រវាងទីផ្សារអាស៊ាន និងប្រទេសចិនបានដើរតួនាទីយ៉ាងសំខាន់ ដោយបានធ្វើការផ្លាស់ប្តូអាកប្បកិរិយារបស់អ្នកប្រើប្រាស់នៅក្នុងតំបន់ឆ្លុះបញ្ចាំងពីការទទួលស្គាល់គុណភាពផលិតផលរបស់ BYD។
BYD បានបង្ហាញរថយន្តអគ្គិសនីប្រភេទ SUV ខ្នាតមធ្យមម៉ូដែល Yuan Up ដើម្បីត្រៀមវាយលុក និងពង្រីកទីផ្សារនៃម៉ាករថយន្តរបស់ខ្លួនឲ្យបានកាន់តែទូលំទូលាយ។ ជាមួយការដាក់បង្ហាញរថយន្តប្រភេទដឹកអ្នកដំណើរចំនួនបីម៉ូដែលក្នុងប្រទេសឥណ្ឌូណេស៊ីនាពេលថ្មីៗនេះរបស់ BYD គឺព្រឹត្តិការណ៍ដ៏សំខាន់មួយក្នុងប្រវត្តិសាស្ត្ររបស់ក្រុមហ៊ុនក្នុងការធ្វើដំណើរចូលទៅកាន់ទីផ្សារអាស៊ានរបស់ខ្លួន។
ក្រុមហ៊ុន BYD បានបង្កើតភាពជាដៃគូជាមួយក្រុមហ៊ុនក្នុងស្រុកដើម្បីជួយសម្រួលដល់ការលក់រថយន្តអគ្គិសនីរបស់ខ្លួន ដូចជាការសហការជាមួយក្រុមហ៊ុន Sime Darby Motors ក្នុងប្រទេសសិង្ហបុរី និងក្រុមហ៊ុន Ayala របស់ហ្វីលីពីនជាដើម។ ហើយនៅក្នុងប្រទេសហ្វីលីពីន BYD មានគោលបំណងពង្រីកបណ្តាញលក់របស់ខ្លួនដោយបន្ថែមចំណុចលក់ច្រើនជាង 20 ខណៈនៅប្រទេសសិង្ហបុរី ក្រុមហ៊ុនកំពង់មានផែនការក្នុងការបើកហាងចំនួន 2 ឬ 3 បន្ថែមទៀតផងដែរ ។
BYD បាននឹងកំពុងទទួលបានភាពជោគជ័យក្នុងការលក់រថយន្តអគ្គិសនីរបស់ខ្លួននៅប្រទេសសិង្ហបុរី ដោយក្រុមហ៊ុនបានធ្វើការចុះបញ្ជីរថយន្តជាង 1,400 គ្រឿងក្នុងឆ្នាំ 2023 លើសក្រុមហ៊ុន Tesla ដែលធ្វើឱ្យ BYD ក្លាយជាម៉ាកយីហោរថយន្តអគ្គិសនី ឈានមុខគេក្នុងប្រទេស។
ទីផ្សាររថយន្តអគ្គិសនីរបស់ប្រទេសសិង្ហបុរីមានការរីកចម្រើនយ៉ាងខ្លាំង ដោយក្នុងនោះតាមរបាយការណ៍មានរថយន្តថ្មីជាង 18% ដែលបានចុះបញ្ជីនៅឆ្នាំ 2023 គឺជារថយន្តអគ្គិសនី ដែលជាការកើនឡើងគួរឱ្យកត់សម្គាល់ពីធៀបនឹងឆ្នាំ 2021។ លើសពីនេះទៅទៀត BYD បានសហការជាមួយ NTUC LearningHub របស់ប្រទេសសិង្ហបុរី ដើម្បីបើកដំណើរការកន្លែងសម្រាប់បណ្តុះបណ្តាលលើបច្ចេកវិទ្យារថយន្តអគ្គិសនី EV mechanic ថែមទៀតផង។ ដែលគោលដៅ គឺដើម្បីបណ្តុះបណ្តាលមនុស្ស 500 នាក់ជារៀងរាល់ឆ្នាំក្នុងការថែទាំរថយន្តអគ្គិសនី ឲ្យស្របតាមការប្តេជ្ញាចិត្តរបស់ BYD ចំពោះតំបន់។
លោក James Ng នាយកគ្រប់គ្រងរបស់ BYD បានសង្កត់ធ្ងន់លើការយកចិត្តទុកដាក់របស់ក្រុមហ៊ុនក្នុងការរៀនសូត្រពីភាពជោគជ័យរបស់ខ្លួននៅក្នុងប្រទេសសិង្ហបុរី និងការអនុវត្តឲ្យល្អបំផុតសម្រាប់ការធ្វើមូលដ្ឋានីយកម្មនៅពេលពង្រីកនៅក្នុងប្រទេសហ្វីលីពីន។ ជាមួយនឹងផែនការបើកហាងលក់រថយន្តប្រភេទដឹកអ្នកដំណើរច្រើនជាងដប់កន្លែងនៅក្នុងប្រទេសសិង្ហបុរី និងហ្វីលីពីននៅឆ្នាំ 2024, BYD មានគោលបំណងពង្រឹងទីតាំងទីផ្សាររបស់ខ្លួន និងរួមចំណែកដល់ទិដ្ឋភាពរថយន្តអគ្គិសនីដែលកំពុងរីកចម្រើននៅក្នុងតំបន់អាស៊ានទាំងមូលផងដែរ៕
