បច្ចុប្បន្ននិយាយពីបច្ចេកវិទ្យារថយន្ត គឺមានការទំនាក់ទំនងផ្សាភ្ជាប់គ្នាទៅនឹងបច្ចេកវិទ្យាស្មាតហ្វូន ម៉្លោះហើយទើបបានជាក្រុមហ៊ុនផលិតស្មាតហ្វូនបានចូលប្រឡូកក្នុងឧស្សាហកម្មរថយន្ត ចំនែកក្រុមហ៊ុនផលិតរថយន្តបានហក់ចូលប្រឡូកក្នុងឧស្សាហកម្មស្មាតហ្វូន។ បច្ចុប្បន្នយើងឃើញមានជាអាថ៌នៅក្រុមហ៊ុនផលិតស្មាតហ្វូន Xiaomi ទើបតែបានបញ្ចេញរថយន្តអគ្គិសនីដំបូងផ្ទាល់ខ្លួនម៉ូដែល SU7 ចំនែកក្រុមហ៊ុនផលិតរថយន្ត Nio បានធ្វើការប្រកាសចេញស្មាតហ្វូនដំបូងរបស់ខ្លួនម៉ាក Nio Phone កាលពីឆ្នាំមុន ហើយក្រុមហ៊ុនផលិតរថយន្ត Polestar ដែលជាបុត្រសម្ព័ន្ធក្រុមហ៊ុន Geely ត្រូវបានគេដឹងថា ត្រៀមប្រកាសចេញស្មាតហ្វូនដំបូងរបស់ខ្លួននៅខែក្រោយ (ឧសភា) ផងដែរ។
ជាមួយគ្នានេះក្រុមហ៊ុនផលិតរថយន្តរបស់ចិនមួយផ្សេងទៀត គឺ Hongqi ត្រូវបានគេរាយការណ៍ថា មានកំពុងដំណើរការគម្រោងក្នុងការផលិតស្មាតហ្វូនដំបូងរបស់ខ្លួនផងដែរ ដើម្បីប្រជែងជាមួយ Nio និង Polestar។ Hongqi គឺជាក្រុមហ៊ុនផលិតរថយន្តដែលគ្រប់គ្រងដោយ China FAW។ សម្រាប់គម្រោងក្នុងការផលិតស្មាតហ្វូននេះត្រូវបានគេដឹងថា Hongqi នឹងធ្វើការជាមួយក្រុមហ៊ុន Geely សម្រាប់ការផ្គត់ផ្គង់សំភារៈសមាសធាតុផលិត Ecarx ដើម្បីផលិតម៉ាកនៃស្មាតហ្វូន Hongqi ថ្នាក់ខ្ពស់ (high-end Hongqi-branded smartphones)។
ដូចគ្នានឹង Nio និង Polestar ដែរក្នុងគម្រោងក្នុងការផលិតស្មាតហ្វូនរបស់ Hongqi គឺដើម្បីបង្កើនការលក់រថយន្តឲ្យកាន់តែមានប្រសិទ្ធិភាពខ្ពស់ ដោយការធ្វើទំនាក់ទំនងផ្សាភ្ជាប់គ្នារវាងបច្ចេកវិទ្យាស្មាតហ្វូន Hongqi ជាមួយនឹងរថយន្ត Hongqi ដើម្បីផ្តល់នូវបទពិសោធន៍ប្រើប្រាស់ថ្មីកាន់តែមានប្រសិទ្ធិភាពខ្ពស់ កាន់តែទំនើប និងកាន់តែឆ្លាតវៃជាមួយនឹងបច្ចេកវិទ្យាថ្មីៗចុងក្រោយបំផុត។ ទោះជាយ៉ាងណានេះ គ្រាន់តែជាដំណឹងបឋមប៉ុណ្ណោះដោយមិនទាន់មានការបញ្ជាក់ផ្លូវការណ៍ណាមួយពីក្រុមហ៊ុន Hongqi នៅឡើយទេ។
យ៉ាងណាមិញក្រុមហ៊ុន Ecarx និង FAW បានចុះហត្ថលេខាលើកិច្ចព្រមព្រៀងសម្រាប់ការអភិវឌ្ឍន៍ស្មាតហ្វូននៅថ្ងៃនេះនៅទីស្នាក់ការកណ្តាលរបស់ក្រុមហ៊ុនផលិតរថយន្តដែលស្ថិតនៅទីក្រុង Changchun ទីក្រុង Jilin ភាគឦសានប្រទេសចិន។ សម្រាប់វិសាលភាពនៃកិច្ចសហប្រតិបត្តិការរវាងក្រុមហ៊ុនទាំងពីរនឹងរួមបញ្ចូលការសហការលើប្រព័ន្ធបច្ចេកវិទ្យា "smart cockpit" ប្រព័ន្ធប្រតិបត្តិការ HongqiOS និងស្មាតហ្វូន។ Hongqi ម៉ាកយីហោរថយន្តអគ្គិសនីថ្នាក់ប្រណិត Premium New Energy Vehicle (NEV) របស់សម្ព័ន្ធក្រុមហ៊ុន China FAW។ ដោយកាលពីឆ្នាំ 2023 ម៉ាកនៃរថយន្តអគ្គិសនីប្រណិតនេះលក់បានចំនួនជាង 85,000 គ្រឿង ដែលកើនឡើង 135% បើធៀបនឹងឆ្នាំ 2022៕