Nissan ចេញឡាន SUV ប្រើម៉ាស៊ីនកូនកាត់ថ្មី ទំនើបខ្លាំង ហើយជិះ 100KM ស៊ីសាំងតែ 4.5L ប៉ុណ្ណោះ

នេះគឺជាឡាន Nissan Qashqai e-Power ស៊េរីឆ្នាំ 2026 ថ្មី ដែលទើបតែបានបង្ហាញខ្លួនជាផ្លូវការ ជាមួយនឹងតម្លៃចាប់ពីខ្ទង់ $42,000 នៅលើទីផ្សារបរទេស។ ឡាន SUV របស់ជប៉ុនមួយនេះ បំពាក់ម៉ាស៊ីនសាំង ចំណុះ 1.5L Turbo ប៉ុន្តែមិនបញ្ជូនកម្លាំងទៅកង់ឡើយ ដោយដើរតួត្រឹមជាអ្នកសាកថាមពល ឲ្យទៅកញ្ចប់អាគុយ ទំហំ 2.1 kWh ដែលបញ្ជូនថាមពលទៅកាន់ម៉ូទ័រអគ្គិសនី 1 ដើម្បីបង្វិលកង់ជំនួសវិញ ហើយម៉ូទ័រនេះអាចបង្កើតកម្លាំងបាន 202 HP ឯណោះ។

ជាលទ្ធផល វាមិនចាំបាច់ត្រូវការប្រអប់លេខឡើយ ធ្វើឲ្យឡាននេះអាចដំណើរការ សឹងតែដូចឡានអគ្គិសនីសុទ្ធ ទាំងការបើកបររលូន និងស្ងាត់ល្អ ផងដែរ។ មិនតែប៉ុណ្ណោះ ឡាន Nissan Qashqai e-Power ស៊េរីឆ្នាំ 2026 មានកម្រិតស៊ីសាំងជាមធ្យមត្រឹមតែ 4.5L/100KM ប៉ុណ្ណោះ ឬ អាចបើកបរបានចម្ងាយដល់ 1,200 KM នៅពេលចាក់សាំងពេញម្តង។

លក្ខណៈពិសេសធំបំផុតមួយទៀតសម្រាប់ SUV កូនកាត់នេះ គឺគ្រប់គ្រឿងបង្គុំនៃប្រព័ន្ធ e-Power របស់វា រួមទាំង ម៉ូទ័រ, ឧបករណ៍បង្វិលម៉ាស៊ីនភ្លើង និង ឧបករណ៍បំលែងអគ្គិសនី ជាដើម ត្រូវបានផ្ទុកនៅក្នុង Unit តែមួយ ដើម្បីសម្រួលដល់ការវិចខ្ចប់ និងសន្សំសំចៃ ទៀតផង។ ក្រៅពីមានភាពសន្សំសំចៃខ្លាំង ឡាន Nissan មួយនេះ ក៏បានអាប់ដេតកាប៊ីនខាងក្នុង ឲ្យមានសភាពស្ងាត់ជាងមុន និង កាត់បន្ថយរំញ័៍របានប្រសើរជាងមុន ទៀតផង។

សូមបញ្ជាក់ថា Nissan Qashqai e-Power ស៊េរីឆ្នាំ 2026 នឹងចេញលក់នៅលើទីផ្សារអឺរ៉ុប នាខែកញ្ញា ឆ្នាំ 2025 នេះ ខណៈទីផ្សារសហរដ្ឋអាមេរិក នឹងមានលក់នៅក្នុងឆ្នាំ 2026 ដោយប្រើឈ្មោះ Nissan Rogue។