IM Motor ដែលស្ថិតនៅក្រោមដំបូងសម្ព័ន្ធក្រុមហ៊ុនផលិតរថយន្ត SAIC បានប្រកាសចេញឡានអគ្គិសនីកម្រិត Flagship SUV ថ្មីក្នុងម៉ូដែល IM LS9 Hyper Series។ LS9 Hyper ម៉ូដែលកំពូលថ្មីនេះ ត្រូវបានIM ប្រកាសថាជា SUV EV ដំបូងគេក្នុងលោកដែលបំពាក់នូវប្រព័ន្ធបច្ចេកវិទ្យាទំនើបថ្មីដែលអាចបត់កងទាំងបួនតាមការកាច់ចង្កូត ឬហៅថា “Four-wheel electric steering” រួមនិងដំណើរការដោយម៉ូទ័រអគ្គិសនី 3 ជាមួយប្រព័ន្ធបើកបរ All-wheel-drive system។
IM LS9 Hyper ជាប្រភេទឡាន Large-size SUV ដែលមានតួរប្រវែង 5,279mm/ទទឹង 2,000mm/ កម្ពស់ 1,806mm ជាមួយគម្លាតកង់មុខទៅកង់ក្រោយ 3,160mm។ LS9 Hyper មានជម្រើសប្រើយ៉ាន់កង់ទំហំ 20-inch, 21-inch និង 22-inch ជាមួយជម្រើសយ៉ាន់កាំរាយ ឬ Multi-spoke rim និងយ៉ាន់ថាស ឬ mirror-finish disc។ នៅផ្នែកកាប៊ីនខាងក្នុងមានការរៀបចំបំពាក់ដោយបច្ចេកវិទ្យាអេក្រង់ចំនួន 3 ផ្ទាំង ក្នុងនោះមានអេក្រង់កម្សាន្តមានទំហំធំដល់ 27.1-inch កម្រិតបង្ហាញ 5K និងអេក្រង់ mini-LED កម្រិត 3K ទំហំ 15.3-inch សម្រាប់អ្នករួមដំណើរ។ LS9 Hyper គាំទ្រប្រព័ន្ធជំនួយការសុវត្ថិភាពបើកបរ advanced driving system គាំទ្រដោយប្រព័ន្ធសែនស័រ 520-line laser radar system គាំទ្រដំណើរការដោយបន្ទះឈីប Nvidia Thor chip។
LS9 Hyper អាចដំណើរការមុខងារបើកបរស្វ័យប្រវត្តិកម្រិត high-level autonomous driving ដែលគាំទ្រដោយប្រព័ន្ធជំនួយការឆ្លាតវៃ Flywheel large model របស់ក្រុមហ៊ុន Momenta ដែលមានលទ្ធភាពដំណើរការបានទាំងនៅផ្លូវក្នុងក្រុង និងផ្លូវហាយវ៉េ រួមនឹងមុខងារចូលចំណតស្វ័យប្រវត្តិ Automatic parking ផងដែរ។
ឡានអគ្គិសនី SUV ថ្មីនេះ ផលិតឡើងដោយប្រើនូវប្រព័ន្ធគ្រោងឆ្អឹង “Lingxi” (Lizard) digital chassis 3.0 ដែលប្រព័ន្ធនេះ អាចឲ្យរថយន្តធ្វើការបត់កង់ទាំងបួនរេតាមការកាច់ចង្កូតបានក្នុងកម្រិតមុំ 24 ដឺក្រេ ដែលធ្វើអោយអង្កត់ផ្ចិតក្នុងការបត់រថយន្តត្រឡប់ក្រោយមានប្រវែងខ្លីបំផុតត្រឹម 4.95m ប៉ុណ្ណោះ។ បន្ថែមពីនេះវាក៏មានភ្ជាប់មកជាមួយប្រព័ន្ធហ្វ្រាំងអេឡិចត្រូនិចឆ្លាតវៃប្រភេទ MK C2 electronic braking system ដែលអាចដំណើរការប្រព័ន្ធចាប់ហ្វ្រាំងបន្ទាន់ស្វ័យប្រវត្តិឡើងវិញ (100% braking energy recovery) រួមនឹងប្រើប្រាស់ប្រព័ន្ធប៊ូមខ្យល់ 150mm travel closed dual-chamber air suspension system។
IM LS9 Hyper EREV ប្រើប្រាស់ម៉ាស៊ីនសាំង 1.5T សម្រាប់ជំនួយដល់ការបើកបរចម្ងាយឆ្ងាយ ឬ range-extender អាចផលិតកម្លាំងបាន 114kW រួមជាមួយប្រព័ន្ធម៉ូទ័រអគ្គិសនី 3 (មុខមួយ/ក្រោយពីរ) ដោយម៉ូទ័រមុខអាចផលិតកម្លាំងបាន 215 សេះ ខណៈម៉ូទ័រខាងក្រោយនីមួយៗអាចផលិតកម្លាំងបាន 261 សេះ។ ចំពោះកញ្ចប់ថ្មវិញ គឺមានទំហំ 65.9kWh ប្រភេទ ternary Lithium សាកភ្លើងពេញម្តងអាចបើកបរដោយប្រើថាមពលថ្មសុទ្ធបានចម្ងាយ 308km ក្រោមលក្ខខណ្ឌស្តង់ដារ WLTC។ ទោះជាយ៉ាងសម្រាប់តម្លៃ និងថ្ងៃចេញលក់ផ្លូវការណ៍សម្រាប់កំពូលរថយន្ត IM LS9 Hyper SUV ថ្មី IM Motors មិនទាន់បានបញ្ជាក់ផ្លូវការណ៍នៅឡើយទេក្នុងពេលនេះ៕
