BYD ប្រកាសចេញលក់រថយន្តអគ្គិសនីពីរម៉ូដែលនៅទីផ្សារប្រទេសវៀតណាម

ថ្មីៗនេះ BYD ដែលជាក្រុមហ៊ុនផលិតរថយន្តអគ្គិសនីជួរមុខរបស់ប្រទេសចិន បានប្រកាសចេញលក់រថយន្តអគ្គិសនីស៊េរីថ្មីប្រទេស វៀតណាម។ រថយន្តទាំងពីរម៉ូដែលនោះ គឺមានដូចជា BYD Han EV និង BYD M6 Electric MPV។សម្រាប់ម៉ូដែល BYD Han EV

មានតម្លៃចាប់ពីខ្ទង់ $58,800 ខណៈម៉ូដែល BYD M6 Electric MPV មានតម្លៃចាប់ពីខ្ទង់ $29,800។

BYD Han EV គឺជារថយន្តអគ្គិសនី Sedan ដ៏ប្រណិតបំផុតរបស់ BYDដែលត្រូវបានក្រុមហ៊ុនធ្វើការប្រកាសចេញលើកដំបូងនៅក្នុងប្រទេសចិនកាលពីឆ្នាំ 2020។ សម្រាប់ម៉ូដែលថ្មី Han EV 2025 បានទទួលការបង្កើនប្រសិទ្ធិភាពទៅលើប្រព័ន្ធ rear suspension ជាមួយពណ៌ថ្មី និងបង្កើនប្រសិទ្ធិភាពលើប្រព័ន្ធចាប់សញ្ញា LiDAR Sensor ជាដើម។ BYD Han EV 2025 បានប្រកាសចេញលក់នៅទីផ្សារប្រទេសចិនដំបូងកាលពីខែកញ្ញា ឆ្នាំ 2024 ជាមួយតម្លៃខ្ទង់ $23,200។ ដោយឡែកសម្រាប់ម៉ូដែល BYD M6 Electric MPV វិញ បច្ចុប្បន្ន គឺមិនមានវត្តមានលក់នៅទីផ្សារប្រទេសចិននោះទេ ដោយម៉ូដែលនេះមានវត្តមានតែនៅទីផ្សារប្រទេសឥណ្ឌូនេស៊ី និងថៃប៉ុណ្ណោះ។

BYD M6 បានបង្ហាញវត្តមានដំបូងក្នុងឆ្នាំ 2010 ជាមួយម៉ូដែលដំណើរការដោយប្រព័ន្ធម៉ាស៊ីនចំហេះក្នុង ក្រោយមកៗម៉ូដែលនេះត្រូវបានធ្វើការកែប្រែជាច្រើនជំនាន់ ប៉ុន្តែ ត្រូវបានបញ្ឍប់ការផលិតវិញ។ BYD បានចូលវាយលុកទីផ្សាររថយន្តប្រទេសវៀតណាមកាលពីដើមរដូវក្តៅ នាថ្ងៃទី 18 ក្នុងខែកក្តដា ឆ្នាំ 2024។ សម្រាប់រថយន្តដែល BYD នាំយកទៅប្រកាសចេញលក់នៅប្រទេសវៀត ណាមរួមមានម៉ូដែល BYD Dolphine, Seal, និង Atto 3 ដែលរថយន្តទាំងបីម៉ូដែលនេះ BYD ប្រើក្នុងការប្រកាសចេញសម្រាប់ទីផ្សារថ្មីរបស់ខ្លួនស្ទើរតែទាំងអស់។

បើតាមរបាយការណ៍ដែលបានចេញផ្សាយកាលពីពេលកន្លងមកបានបង្ហើបថា BYD ចង់ពង្រីកទីផ្សារក្នុងប្រទេសវៀតណាមជាមួយគម្រោងក្នុងការសាងសងរោងចក្រផលិតនៅក្នុងប្រទេសនេះ ក្រោយមកគម្រោងនេះត្រូវបានគេរាយការណ៍ថាបានរំសាយ ចោលវិញ។ រថយន្ត BYD ដែលលក់ក្នុងប្រទេសវៀតណាមបច្ចុប្បន្ន ត្រូវបាននាំចូលពីប្រទេសចិន ប៉ុន្តែ នៅពេលអនាគតរថយន្តទាំងនោះនឹងត្រូវនាំចេញពីរោងចក្រ BYD ក្នុងប្រទេសថៃវិញ ខណៈរោងចក្ររបស់ BYD នៅប្រទេសថៃបានជិតបញ្ចប់ការសាងសង និងចាប់ផ្តើមសង្វាក់ផលិតកម្មក្នុងពេលឆាប់ៗ។ 

BYD បានចូលទៅក្នុងទីផ្សាររថយន្តអគ្គិសនីរបស់វៀតណាមដែលកំពុងកើនឡើង ប៉ុន្តែប្រឈមនឹងការប្រកួតប្រជែងពីក្រុមហ៊ុនផលិតរថយន្តក្នុងប្រទេសវៀតណាម Vinfast ក៏ដូចជាក្រុមហ៊ុនផលិតរថយន្តរបស់ប្រទេសចិនផ្សេងទៀតដូចជា Great Wall Motors និង SAIC-GM-Wuling ជាដើម។ តាមរបាយការណ៍ គឺមានរថយន្តសរុបចំនួន 404,294 គ្រឿងត្រូវបានលក់ក្នុងឆ្នាំ 2023 ដោយក្នុងនោះមានរថយន្តអគ្គិសនីចំនួនប្រហែល 6% នៃចំនួនរថយន្តលក់សរុបទាំងនោះ៕