ក្រុមហ៊ុន Hyundai ប្រចាំនៅទីផ្សារសហរដ្ឋអាមេរិកបានផ្តល់ជូនកាដូរពិសេសដល់អតិថិជនដែលបានទិញរថយន្តអគ្គិសនីស៊េរីថ្មីឆ្នាំ 2025 ម៉ូដែល loniq 5 ដោយពួកគេនឹងទទួលបាននូវឆ្នាំងសាកសម្រាប់សាកភ្លើងនៅផ្ទះ ChargePoint Home Flex Level 2 EV charger មួយដោយឥតគិតថ្លៃ យ៉ាងណាមិញសម្រាប់តម្លៃសេវាដំឡើងមិនត្រូវបានរាប់បញ្ចូលសម្រាប់ការប្រូសិននេះនោះទេ។
ជាងនេះទៅទៀតប្រសិនបើអតិថិជនមិនចង់បានឆ្នាំងសាកនេះនោះទេ ពួកគេក៏ទទួលបានកញ្ចប់ទឹកប្រាក់ចំនួន 400 ដុល្លារសម្រាប់ប្រើជាមួយកម្មវិធី ChargePoint នៅតាមបណ្តាញស្ថានីយ៍សាកភ្លើងរបស់ក្រុមហ៊ុន ឬតាមរយះការសាកនៅ EVgo និង Shell Recharger។ សរុបមក បណ្តាញរបស់ ChargePoint ផ្តល់នូវការចូលប្រើឧបករណ៍សាកថ្មជាង 87,000 កន្លែងនៅទូទាំងសហរដ្ឋអាមេរិក។
ការផ្តល់ជូននេះ មានសម្រាប់អតិថិជនទាំងអស់ដែលទិញដាច់ ឬបង់រំលោះ Ioniq 5 ថ្មីចាប់ពីថ្ងៃទី 1 ខែមករា។ អតិថិជនមានពេល 60 ថ្ងៃ គិតចាប់ពីថ្ងៃទិញ ឬបង់រំលោះ Ioniq 5 ថ្មី ដើម្បីជ្រើសរើសយកឆ្នាំងសាក ChargePoint Home Flex Level 2 EV charger ឬកាតឥណទានសម្រាប់ទូទាត់ការសាកថ្មតាមស្ថានីយ៍ ឬកន្លែងសាកថ្មដែលបានរៀបរាប់ខាងដើម។
ហើយប្រសិនបើអ្នកជ្រើសរើសឆ្នាំងសាក អតិថិជនមានរយះពេល 120 ថ្ងៃ រាប់ចាប់ពីថ្ងៃទិញ ឬបង់រំលោះរថយន្តអគ្គិសនីស៊េរីថ្មីដើម្បីបញ្ចប់ការដំឡើងកន្លែងសាកភ្លើងតាមផ្ទះជូន។ ប្រសិនបើអ្នកជ្រើសរើសកាតឥណទានឥតគិតថ្លៃ អ្នកត្រូវប្ដូរវានៅចុងបញ្ចប់នៃរយៈពេល 60 ថ្ងៃពីការទិញ ឬរំលោះ ហើយបន្ទាប់មកអ្នកមានពេលពីរឆ្នាំគិតចាប់ពីថ្ងៃរំលោះដើម្បីប្រើឥណទាន។ ការផ្តល់ជូននេះត្រូវបានផ្តល់ជូនតាមរយៈ Hyundai Home Marketplace ដែលដំបូងតម្រូវឲ្យអតិថិជនត្រូវបង្កើតគណនីមួយ ហើយបន្ទាប់មកអាចជ្រើសរើសកញ្ចប់ប្រូម៉ូសិនណាមួយដែលចង់បាន៕
