កាលពីថ្ងៃទី 24 ខែកក្កដា ឆ្នាំ 2012 នៅសណ្ឋាគារ សីហ្វូីថែល មានរៀបចំឡើង នូវពិធីសម្ពោធជាផ្លូវការបណ្តាញទូរទស្សន៍បង់លុយតាមរយៈប្រព័ន្ធឌីជីថល ទូទាំងប្រទេស ដំបូងគេបំផុតក្នុងព្រះរាជាណាចក្រកម្ពុជាស្ថិតនៅក្រោមយីហោពាណិជ្ជកម្ម ONE TV។ ពិធីដ៏មហោឡារឹកនេះ ទទួលបាននូវការអញ្ជើញ ចូលរួមជអធិបតីដ៏ខ្ពង់ខ្ពស់បំផុតរបស់ឯកឧត្តម ខៀវ កញ្ញារីទ្ធ រដ្ឋមន្ត្រីក្រសួងពត៌មាននៃព្រះរាជាណាចក្រកម្ពុជា និងឯកឧត្តម Alexey Malinlin អនុរដ្ឋមន្ត្រី ក្រសួងប្រៃសណីយ៍ និងទូរគមនាគមន៍នៃសហព័ន្ធរុស្ស៊ី ព្រមទាំងបណ្តាមន្ត្រីជាន់ខ្ពស់រៃជារដ្ឋាភិបាលមកប្រទេសកម្ពុជា និងរុស្ស៊ីយ៉ាងច្រើនកុះកុរ។
ONE TV ត្រូវបានបង្កើតឡើងដោយការវិនិយោគរួមគ្នារវាងក្រុមហ៊ុន Royal Group របស់ប្រទេសកម្ពុជា និងក្រុមហ៊ុន General Satellite មកពីប្រទេសរុស្ស៊ី។ អ្នកឧកញ្ញា គិត ម៉េង អគ្គនាយកក្រុមហ៊ុន Royal Group បានមានប្រសាសន៍ថា បណ្តាញទូរទស្សន៍ថ្មីស្រឡាងនេះមានប៉ុស្តិ៍ជាតិ និងអន្តរជាតិចំនួន 60 ប៉ុស្តិ៍ជាប្រភេទឌីជីថលរួមមានប៉ុស្តិ៍ កំសាន្ត អប់រំ និងពត៌មានសំរាប់ផ្តល់ជូនដល់គ្រួសារកម្ពុជាទាំងអស់តាមលទ្ធភាព។ ប្រព័ន្ធ ផ្សព្វផ្សាយបណ្តាញទូរទស្សន៍នេះ ត្រូវបានជ្រើសរើសយកបច្ចេកវិទ្យា ដែលមានគុណ ភាពជាលក្ខណៈអន្តរជាតិផ្តល់ដោយក្រុមហ៊ុន General Satellite។ ជាមួយគ្នាដែរ លោក Andrey Tkachenko ប្រធានក្រុមហ៊ុន General Satellite បានមានប្រសាសន៍ឱ្យដឹង ផងដែរថា កិច្ចសហប្រតិបត្តិការនេះ នឹងរួមចំណែកឱ្យកាន់តែប្រសើរឡើងថែមទៀត ដល់ការអភិវឌ្ឍន៍វិស័យពាណិជ្ជកម្ម បច្ចេកវិទ្យា វប្បធម៌ទ្វេភាគីរវាងព្រះរាជាណាចក្រកម្ពុជា និងសហព័ន្ធរុស្ស៊ី ៕
