កាលពីថ្ងៃទី ២៦ ខែមេសា ឆ្នាំ ២០១៤ ផ្សារទំនើប AEON MALL ដែលបង្កើតឡើងក្រោមការវិនិយោគរបស់អ្នកជំនួញជប៉ុន គឺគ្រោងនឹងបើក ឱ្យ ដំណើរការនៅខែមិថុនាឆ្នាំ ២០១៤ ខាងមុខនេះ។យោងតាមការប្រកាសរបស់ក្រុមហ៊ុន AEON MALL Co.Ltd ក្នុងសន្និសីទនៅសណ្ឋាគារ Sofitel Phokeethra Phnom Penh បានឱ្យដឹងថា ផ្សារនេះនឹងត្រូវសម្ពោធក្រោមអធិបតីភាពសម្ដេចនាយករដ្ឋមន្ដ្រី ហ៊ុន សែន នៅ ថ្ងៃទី៣០ ខែមិថុនា ឆ្នាំ ២០១៤ ខាងមុខនេះ។ ផ្សារទំនើប AEON MALL ថ្មីនេះ ត្រូវបានសាងសង់ឡើង កាលពីថ្ងៃទី១០ ខែធ្នូ ឆ្នាំ២០១២ ក្រោមការវិនិយោគរបស់ក្រុមហ៊ុន AEON Co,.Ltd របស់ជប៉ុនដែលមានទឹកប្រាក់សរុបប្រមាណជាជាង ២០០ លានដុល្លារសហរដ្ឋអាមេរិក។
.jpg)
ផ្សារនេះ គឺជាផ្សារទំនើបខ្នាតធំអន្ដរជាតិមួយដែលលាតសន្ធឹងនៅលើផ្ទៃដីទំហំ ៦ ម៉ឺន ៨ ពាន់ម៉ែត្រការ៉េ និងមានទំហំអគារ ១ សែន ៨ពាន់ម៉ែត្រការ៉េ និងមានកម្ពស់ ៤ ជាន់ ដែលអាចផ្ទុករថយន្ដបាន ១៤០០គ្រឿង និងម៉ូតូ ១៦០០គ្រឿងដែលជាកន្លែងដ៏ធំជាងគេបំផុតនៅក្នុងព្រះរាជាណាចក្រកម្ពុជា។ នៅក្នុងផ្សារទំនើប AEON MALL នេះថ្មីមានហាងទំនិញប្រមាណ ១៩០ហាង រួមទាំង មានរោងភាពយន្ដ ភោជនីយដ្ឋាន និងស្ថានីយ ទូរទស្សន៍មួយផងដែរ ដែលមានទីតាំងនៅវិថីសុធារស សង្កាត់ទន្លេបាសាក់ ខណ្ឌចំការ មន ក្បែរសណ្ឋាគារ សូហ្វ៊ីតែល។ នៅថ្ងៃដដែលនោះដែរ ក្រុមហ៊ុន AEON Co., Ltd ក៏មានរៀនចំឡើងនូវការជួបជុំរវាងដៃគូពាណិជ្ជកម្មទាំងអស់ ដែលបានរួមសហការគ្នានៅក្នុងគំរោងដ៏ធំមួយនេះផងដែរ ដោយក្នុងនោះ គេសង្កេតឃើញថា មានវត្តមាននាយកក្រុមហ៊ុនធំៗ ប្រធានសហគ្រាស វិស័យធនាគារ ភោជនីយដ្ចាន និងសេវាកំសាន្តជាច្រើនរូប៕
