កាលពីថ្ងៃទី 20 ខែមករា នេះ នៅមជ្ឈមណ្ឌលកោះពេជ្រ ក្រុមហ៊ុន Cellcard បានរៀបចំប្រារព្ធខួប 20 ឆ្នាំរបស់ខ្លួនជាមួយនឹងវត្តមានតំណាងចែកចាយ និងដៃគូសហាការយ៉ាងច្រើនកុុះករ។ គួរបញ្ជាក់ថា ក្រោយពីបើកដំណើរការនៅកម្ពុជា តាំងពីឆ្នាំ 1996 ថ្ងៃនេះ គឺជាថ្ងៃដ៏ពិសេសបំផុត ដោយនៅក្នុងពិធីនេះ ក្រុមហ៊ុន Cellcard បានប្រកាសកិច្ចសហការជាមួយនឹងក្រុមហ៊ុន Nokia នៅក្នុងការដំឡើងបណ្ដាញអ៊ីនធើណិត 4G LTE ចំនួន 1500 កន្លែងបន្ថែមទៀត ទូទាំងប្រទេស ដើម្បីឲ្យសេវាក្របដណ្តប់ បណ្តាខេត្តក្រុងសំខាន់ៗ នៅក្មុងប្រទេសកម្ពុជា។
លោក អៀន វ៉ាតសុន នាយកប្រតិបត្តិក្រុមហ៊ុន Cellcard បានឱ្យដឹងថាការដាក់ឱ្យដំណើរការ សេវានេះបង្ហាញពីភាពឈានមុខ លើទីផ្សារទាំងអត្ថប្រយោជន៍ សម្រាប់អតិថិជន និងការភ្ជាប់ទំនាក់ទំនង បានឆាប់រហ័សព្រមទាំងសេវាគ្របដណ្ដប់ ទូទាំងប្រទេស។ លោកថា ក្រុមហ៊ុនបានចំណាយពេល ១ឆ្នាំ ដើម្បីដំឡើងបណ្ដាញសេវាឱ្យកាន់តែធំទូលាយ និងមានល្បឿនលឿន បំផុតនៅកម្ពុជា ដោយមានអង់តែនជាង 2750 បង្គោលនៅទូទាំងប្រទេស។
លោកបញ្ជាក់ថា៖ «ខួប 20 ឆ្នាំនេះ យើងគ្មានអ្វីច្រើនទេ គឺមានតែសេវាដូរលុយអស្ចារ្យ និងការពង្រីកសេវា 4G LTE មួយនេះប៉ុណ្ណោះ។ ខ្ញុំយល់ថាអតិថិជននឹង ពេញចិត្តនឹងបច្ចេកវិទ្យា Super 4G ថ្មី ដែលពួកគាត់អាចភ្ជាប់ទំនាក់ទំនង កាន់តែជិតស្និត តាមរយៈបណ្ដាញសេវាថ្មី ដើម្បីទទួលបានបទពិសោធ សេវាទូរស័ព្ទ និងអ៊ីនធើណិតល្អបំផុត» ។
លោក Harald Preiss ប្រធានតំបន់អាស៊ីខាងជើងនៃក្រុមហ៊ុន Nokia បាន ឱ្យដឹងដែរថា លោកពិតជារីករាយយ៉ាងខ្លាំងដោយបានធ្វើការយ៉ាងជិតស្និទ្ធជាមួយ Cellcard សម្រាប់គម្រោងរំឭកខួបទី 20 ឆ្នាំ។ កិច្ចសហការនេះ ជាការដំឡើងបណ្ដាញ 4G LTE ដំបូងបំផុតរបស់យើងនៅកម្ពុជា ហើយវានឹងធ្វើឱ្យសេវាកាន់តែគ្រប់ដណ្តប់ ក្នុងការផ្ដល់នូវសេវាទូរស័ព្ទល្អបំផុតសម្រាប់អតិថិជន ដើម្បីទទួលបានបទពិសោធកាន់តែប្រសើរឡើង ក៏ដូចជាពង្រីកបណ្ដាញសេវាទៅកាន់តំបន់ដាច់ស្រយាលព្រមទាំងផ្ដល់ជូនប្រជាជនកម្ពុជាជាច្រើនទៀតនូវការភ្ជាប់ទំនាក់ទំនងទូរស័ព្ទកាន់តែប្រសើរ។
ក្នុងឱកាសនោះដែលក្រុមហ៊ុន ក៏បានដាក់ចេញនូវគម្រោងកម្មវិធី ថ្មីមួយស្របនឹងការពង្រីកបណ្ដាញ 4G LTE មានឈ្មោះថា សេវាដូរលុយអស្ចារ្យថ្មីជាមួយ បច្ចេកវិទ្យា Super 4G ដែលជាប្រព័ន្ធសេវាអ៊ីនធើណិតដ៏ធំបំផុត និងលឿនបំផុតនៅកម្ពុជា ។ ដូរលុយអស្ចារ្យ ជាសេវាដ៏ល្អបំផុតនៅកម្ពុជា ដែលអាចឱ្យអតិថិជនប្ដូរ 1 ដុល្លារបាន 100 ដុល្លារសម្រាប់ទូរស័ព្ទ និងលេងអ៊ីនធើណិតតាមចិត្តហើយទទួលបាន 30 នាទីបន្ថែមរៀងរាល់ថ្ងៃ និងមានសុពលភាពកាន់យូរ រហូតដល់ 14 ថ្ងៃ៕
