Canon EOS R100 ម៉ាស៊ីនថតស៊េរីថ្មីកម្រិត Entry-Level បានប្រកាសចេញលក់ផ្លូវការណ៍ក្នុងតម្លៃ $480

ក្រុមហ៊ុន Canon ទើបតែបានប្រកាសចេញកាមេរ៉ាស៊េរីថ្មីដែលមានតម្លៃធូរថ្លៃស្ថិតក្នុងស្រឡាយ EOS R-Series ម៉ូដែល EOS R100។ កាមេរ៉ា Canon ស៊េរីថ្មីនេះមានតម្លៃធូរថ្លៃជាងម៉ូដែល EOS R50 ប៉ុន្តែ វាបានប្រើប្រាស់នូវសែនស័រជាប្រភេទ Crop Sensor។

Canon EOS R100 បានប្រើប្រាស់សែនស័រស៊េរី APS-C CMOS sensor ដែលមានទំហំ 24.2MP និងដំណើរការដោយប្រើអង្គគណនា DIGIC 8 Processor ដូចគ្នាទៅនឹងម៉ូដែល EOS M50 Mark II ដែរ។ ប្រព័ន្ធសែនស័ររបស់ EOS R100 គាំទ្រជាមួយប្រព័ន្ធមុខងារ Dual Pixel AF រួមជាមួយ 143 AF zones, face detection, ហើយនិងមានសមត្ថភាពក្នុងការចាប់ប្លង់ថតបានកម្រិត 6.5fps burst capture ថែមទៀតផង។ សមត្ថភាពកាមេរ៉ាស៊េរីថ្មីនេះអាចធ្វើការផលិតសាច់វីដេអូបានកម្រិត 1080px ក្នុងល្បឿន 30fps និងដល់ 4K ក្នុងល្បឿន 24fps ប៉ុន្តែបានសម្រាប់តែជាមួយនឹងមុខងារ Crop និង contrast-based AF តែប៉ុណ្ណោះ។

ហើយអ្វីដែលថ្មីពិសេសបំផុតសម្រាប់ Canon EOS R100 គឺវាមានភ្ជាប់មកជាមួយមុខងារ Scene Intelligent Auto mode ដែលដំណើរការជាមួយ Creative Filters និង Hybrid Auto mode ដែលវានឹងដំណើរការក្នុងការចាប់សកម្មភាពវីដេអូ 2-4 វិនាទីជាមុនរៀងរាល់មុនការចាប់យក។ បន្ថែមពីនេះអ្នកប្រើប្រាស់ក៏អាចធ្វើការថតវីដេអូបែប vertical video សម្រាប់បង្ហោះចូលទៅក្នុងបណ្តាញសង្គមបានថែមទៀតផង។ ជាមួយគ្នានេះ Canon EOS R100 ក៏មានភ្ជាប់មកជាមួយប្រព័ន្ធបច្ចេកវិទ្យា Bluetooth និង Wi-Fi ដែលផ្តល់នូវភាពងាយស្រួលក្នុងការតភ្ជាប់ជាមួយស្មាតហ្វូនដើម្បីចែករំលែកទិន្នន័យថែមទៀតផង។

Canon EOS R100 មានអេក្រង់ Viewfinder ប្រភេទ OLED EVF ដែលមានកម្រិតភាពច្បាស់ 2.36M Dot រួមនឹងអេក្រង់ LCD សម្រាប់មើលសកម្មភាព និងកំនត់មុខងារទូទៅទំហំ 3.0 អ៊ីង ដែលមានកម្រិតច្បាស់ 1.04M Dot ផងដែរ។ ម៉ាស៊ីនថតកម្រិតថវិកាស៊េរីថ្មីនេះ គាំទ្រការប្រើប្រាស់ជាមួយម៉េមូរីប្រភេទ UHS-I SD card ហើយគួរឲ្យស្តាយដោយសារតែវាមិនមានរន្ធដោតកាស និងម៉ាយក្រូហ្វូន ក៏ដូចជាមុខងារ Stabilization ភ្ជាប់នៅលើខ្លួនរបស់វានោះទេ។

Canon EOS R100 គាំទ្រការប្រើប្រាស់ជាមួយ EOS R mount ដែលជាលែនតដែលមានតម្លៃថ្លៃវាទៅទៀត។ ហើយ Canon ក៏បានផ្តល់នូវជម្រើសប្រភេទ RF-S18-45mm F4.5-6.3 IS STM and RF-S55-210mm F5-7.1 IS STM សម្រាប់ការភ្ជាប់ប្រើជាមួយកាមេរ៉ាកម្រិតថវិកាស៊េរីថ្មីនេះ។ ជាងនេះទៅទៀត Canon ក៏បានធ្វើការប្រកាសចេញលែនស៊េរីថ្មីជាប្រភែត RF28mm F2.8 STM pancake lens ផងដែរ។

សម្រាប់តម្លៃខ្លួនរបស់ Canon EOS R100 គឺខ្ទង់ $480 ចំនែកលែនសម្រាប់ប្រើភ្ជាប់ជាមួយមានតម្លៃខ្ទង់ $600 ឡើងទៅ។ EOS R100  នឹងមានចេញលក់ផ្លូវការណ៍នៅក្នុងខែកក្តដា ឆ្នាំនេះ រីឯលែនស៊េរីថ្មី RF28mm F2.8 STM ក៏នឹងមានលក់នៅក្នុងខែកក្ដដាផងដែរ ដែលអាចមានតម្លៃខ្ទង់ $300៕