តាមការស្រាវជ្រាវរបស់ Flurry Analytics បានបង្ហាញថា ការលក់ iPhone XS មានចំនួនច្រើនជាង iPhone X និង iPhone 8

យោងតាមការស្រាវជ្រាវរបស់ក្រុមហ៊ុន Flurry Analytics ដែលជាក្រុមហ៊ុនមួយ មានអ្នកប្រើប្រាស់នូវកម្មវិធីរបស់ខ្លួនជាងមួយលាននាក់ ទៅលើការលក់ iPhone XS និង XS Max បានបង្ហាញថា ការលក់របស់ iPhone Xs មានភាពប្រសើរជាងការលក់ iPhone X និង iPhone 8 និង 8 Plus ប៉ុន្តែចំនួននេះ នៅតែទាបជាង iPhone 7។ Flurry Analytics បានបញ្ជាក់ទៀតថា ការប្រៀបធៀបស្រដៀងគ្នានេះ បានបង្ហាញថា ស្មាតហ្វូនស៊េរី iPhone Xs Series គឺមានការលក់កើនឡើង 7% បើធៀបជាមួយនឹង iPhone X និង iPhone 8 និង 8 Plus ដែលបង្ហាញខ្លួនកាលពីឆ្នាំមុននេះ។ 

រហូតមកដល់ពេលនេះ បើក្រឡេកទៅមើលទីផ្សាររបស់ iPhone 2018 របស់ក្រុមហ៊ុន Apple នៅមិនទាន់មានកំណើនលក់ខ្លាំងក្លានៅលើទីផ្សារនៅឡើយទេ ប៉ុន្តែនៅក្នុងការព្យាករណ៍កាលពីពេលមុននេះ បានបញ្ជាក់ថា ស្មាតហ្វូនទាំងនេះ គឺពិតជាលក់បានយ៉ាងល្អនៅលើទីផ្សារ។ ក្រុមហ៊ុន បានរំពឹងថា ការលក់ iPhone XS នឹងបន្តការកើនឡើងនៅក្នុងរដូវកាលនេះ ហើយនឹងនៅតែរក្សាបាននូវស្ថេរភាពនៅលើទីផ្សារ បើទោះបីជាការកើនឡើងតម្លៃក៏ដោយ។ 

ទោះបីជា iPhone XS ទទួលបានភាពជោគជ័យក៏ដោយ ក៏ iPhone 7 នៅតែស្ថិតនៅក្នុងចំណាត់ថ្នាក់លេខ 1 ដដែល។ នៅលើទីផ្សារកន្លងមក iPhone 7 (15.40%) ស្ថិតនៅក្នុងចំណាត់ថ្នាក់លេខ 1 ស្របពេលដែល iPhone 7 Plus (12.73%) ឈរនៅចំណាត់ថ្នាក់លេខ 2 ហើយ iPhone 6S (12.40%) ឈរនៅចំណាត់ថ្នាក់លេខ 3។ iPhone Xs Max ក៏ឈ្នះពានរង្វាន់អេក្រង់ល្អបំផុតពី DisplayMate ផងដែរ ប៉ុន្តែតាមការបញ្ជាក់របស់ Consumer Report បានបញ្ជាក់ថា iPhone Xs Max នៅមិនទាន់អាចជំនួសកន្លែងរបស់ស្មាតហ្វូន Samsung Galaxy Note 9 នោះទេ៕