ថ្មីៗនេះ យោងតាមការបញ្ជាក់របស់ក្រុមហ៊ុន Kantar Worldpanel បានឱ្យដឹងថា ការលក់របស់ទូរស័ព្ទ Apple iPhone X គឺមានការពេញនិយមខ្លាំងនៅក្នុងប្រទេសចិន និងប្រទេសជប៉ុន។ iPhoneX ក៏បានក្លាយទៅជាទូរស័ព្ទដែលលក់ដាច់បំផុតនៅក្នុងចក្រភពអង់គ្លេសកាលពីខែវិច្ឆិកាកន្លងទៅថ្មីៗនេះថែមទៀតផង។
ចំណុចដែលលេចធ្លោនៅក្នុងរឿងនេះ គឺការលក់នៅក្នុងប្រទេសចិន ដែលជាទីផ្សារស្មាតហ្វូនធំបំផុតនៅក្នុងពិភពលោកនោះទូរស័ព្ទ iPhone X ដំណើរបានការយ៉ាងល្អនៅទីនោះ ដោយអាចប្រកួតប្រជែងបានជាមួយនឹងក្រុមហ៊ុនក្នុងស្រុក ដែលភាគច្រើននៃអ្នកទិញទូរស័ព្ទ iPhone X គឺចេញមកពីអ្នកប្រើប្រាស់ Android។ ស្របពេលដែលអ្នកប្រើប្រាស់ជាច្រើនផ្លាស់ប្តូរមកប្រើទូរស័ព្ទ iPhoneX ស្ទើរតែគ្រប់ៗគ្នា មិនថាតែនៅចិនទេ នៅក្នុងទីផ្សារជាច្រើនទៀត ក៏បានចាប់ផ្តើមមានការទាក់ទាញផ្លាស់ប្តូរទៅប្រើប្រាស់ទូរស័ព្ទ iPhone ដូចគ្នា។
ក្រុមហ៊ុននេះ បានបន្ថែមថា iPhone X គឺជាទូរស័ព្ទដែលលក់ដាច់បំផុតនៅក្នុងចក្រភពអង់គ្លេសនៅក្នុងខែវិច្ឆិកាជាមួយនឹងចំនែកទីផ្សារ 14.4% ។ នេះមិនមានជាការកើនឡើងខ្លាំងនោះទេ បើធៀបជាមួយនឹងចំណែកទីផ្សាររបស់ iOS មានការធ្លាក់ចុះ ស្របពេលដែលទីផ្សាររបស់ Android មានការកើនឡើងនៅក្នុងរយៈពេល 3 ខែចប់ត្រឹមតែវិច្ឆិកាឆ្នាំ 2017 បើធៀបជាមួយនឹងរយៈពេលដូចគ្នានៅឆ្នាំមុននោះ។
លោក Dominic Sunnebo អគ្គនាយករបស់ក្រុមហ៊ុន Kantar Worldpanel បាននិយាយថា “ក្រុមហ៊ុនបច្ចេកវិទ្យា Apple កំពុងតែវិលត្រឡប់ទៅកាន់ពេលវេលាមួយ ដែលតម្រូវការរបស់ iPhoneX មានការកើនឡើងខ្លាំងនៅក្នុងទីក្រុងនៃប្រទេសចិន បើទោះបីជាតម្លៃរបស់ទូរស័ព្ទនេះ ថ្លៃក៏ដោយ។ សម្រាប់អ្នកប្រើប្រាស់ទូរស័ព្ទស្មាតហ្វូន Huawei, Xiaomi និង Samsung ក៏កំពុងតែផ្លាស់ប្តូរទៅប្រើប្រាស់ iPhone ស៊េរីថ្មីនេះ ផងដែរ៕”