កាលពីម្សិលមិញនេះ ក្រុមហ៊ុន Apple បានបង្ហាញនូវថេប្លេតស៊េរីថ្មីម៉ូឌែលចុងក្រោយបំផុតរបស់ខ្លួន iPad Pro ដែលមានទំហំ 11-inch និងទំហំ 12.9-inch។ ថេប្លេតនេះ គឺមានភ្ជាប់ជាមួយនឹងបន្ទះឈីប A1Z។ នៅថ្ងៃនេះ iPad Pro 2020 ទំហំ 11-inch ក៏បានធ្វើការតេស្តនៅលើ AnTuTu ដែលមានការទម្លាយបង្ហាញអំពីលក្ខណៈសម្បត្តិជាច្រើនដែលគួរអោយចាប់អារម្មណ៍របស់វាផងដែរ។
វាពិតជាគួរអោយចាប់អារម្មណ៍ខ្លាំងណាស់ដែលក្រុមហ៊ុនបច្ចេកវិទ្យា Apple ផ្លាស់ប្តូរទៅប្រើប្រាស់នូវបន្ទះឈីប A12Z ខណៈពេលដែលស្មាតហ្វូន iPhones ថ្មីរបស់ខ្លួនប្រើប្រាស់នូវបន្ទះឈីប A13 SoC នោះ។ អ្នកប្រហែលជាគិតថា បន្ទះឈីបថ្មីនេះប្រហែលជាខ្លាំងជាងបន្ទះឈីបមុនហើយ។ បន្ទះឈីប A13 មាន 6x core CPU និង Quad-Core GPU។ សម្រាប់ A12X នៅលើ iPad Pro កាលពីឆ្នាំមុននេះ គឺមាន Octa-Core CPU និង 7x -Core GPU។ បន្ទះឈីប A12Z នៅលើថេប្លេត iPad Pro នៅឆ្នាំនេះគឺមាន Octa-Core CPU និង Octa-Core GPU ថែមទៀត។
នៅពេលនេះ ការតេស្តនៅលើថេប្លេត iPad Pro 11 2020 បានបង្ហាញថា វាមានរ៉េមទំហំ 6GB ដែលមានការបង្កើនច្រើនជាងមុនដល់ទៅ 2GB។ ថេប្លេត iPad ថ្មីនេះគឺដំណើរការនូវ iOS 13.4 និងម៉េមូរីទំហំ 128GB។ CPU នេះ គឺអាចមានសមត្ថភាពខ្លាំងជាង ឬតិចជាងថេប្លេត iPad Pro កាលពីឆ្នាំមុននេះ ប៉ុន្តែវាក៏មានការបន្ថែមនូវ GPU ដែលមានការបង្កើននូវពិន្ទុដល់ទៅ 9%។ ពិន្ទុសរុបរបស់វានៅលើ AnTuTU គឺច្រើនជាង 700,000។ ទោះជាយ៉ាងណាក៏ដោយនោះ វា គឺកៀកទៅនឹងពិន្ទុជិត 100,000 របស់បន្ទះឈីប Snapdragon 865 នៅលើស្មាតហ្វូន Android នោះ៕
