vivo បានប្រកាសចេញស្មាតហ្វូនជំនាន់ថ្មីគ្រួសារ vivo X60 Series កាលពីចុងខែធ្នូ ឆ្នាំ 2020 ដែលមាន X60 និង X60 Pro។ ដោយឡែកនៅថ្ងៃទី 21 ខែមករា, 2021 នេះ vivo បានសម្រេចប្រកាសចេញម៉ូដែលកំពូលមួយទៀតដែលជាបងធំក្នុងគ្រួសារ X60 Series គឺឈ្មោះថា X60 Pro+។ បងធំនៅក្នុងគ្រួសារ vivo X60 ត្រូវបានក្រុមហ៊ុនបំពាក់នូវឈីប Snapdragon 888 និងបំពាក់នូវប្រព័ន្ធកាមេរ៉ាក្រោយប្រើនូវសែនស័រគោលពីរគ្រាប់ដោយមួយគ្រាប់ជាសែនស័ររបស់ក្រុមហ៊ុន SONY និងមួយផ្សេងទៀតជារបស់ក្រុមហ៊ុន SAMSUNG។
ទៅលើផ្នែកឌីស្សាញរូបរាងខាងក្រៅរបស់ vivo X60 Pro+ គឺមិនខុសពីប្អូនរបស់វា X60 Pro នោះទេ ដោយផ្ទៃខាងមុខត្រូវបានពាសដោយបន្ទះអេក្រង់កោងគែមសងខាងប្រភេទបន្ទះបង្ហាញ OLED Display ទំហំ 6.56 អ៊ីញ រំលេចដោយលែនទំលុះត្រង់ថ្ងាសមួយគ្រាប់។ បន្ទះអេក្រង់របស់ vivo X60 Pro+ មានកម្រិត refresh rate 120Hz ជាមួយល្បឿនសំគាល់ Touch Sample rate 240Hz ទ្រទ្រង់កម្រិតបង្ហាញ Full-HD+ ទំហំ 2376 x 1080px ជាមួយកម្រិតដង់ស៊ីតេភាពច្បាស់ 398ppi និងកម្រិតពន្លឺខ្ពស់ដល់ 1300nits។ អេក្រង់របស់ vivo X60 Pro+ ទ្រទ្រង់នូវមាតិកាវីដេអូកម្រិត HDR និង HDR10+ ជាមួយបច្ចេកវិទ្យាចាក់ទឹកពណ៌កម្រិត DCI-P3 ប៉ុន្តែ vivo មិនបានបញ្ជាក់ពីកញ្ចក់ស្រោបការពារអេក្រង់របស់ X60 Pro+ នោះទេ។
vivo X60 Pro+ ប្រតិបត្តិការលើបន្ទះឈីប Qualcomm Snapdragon 888 មានរ៉េមទំហំ 8GB/12GB ប្រភេទ LPDDR5 និងម៉េមូរីក្នុងម៉ាស៊ីនស្រាប់ទំហំ 128GB ដល់ 256GB ប្រភេទ UFS3.1។ vivo បានបញ្ជាក់ថា សម្រាប់ម៉ូដែលមានរ៉េម 12GB បានប្រើនូវបច្ចេកវិទ្យា Memory Fusion Technology ដែលមានន័យថាវាទាញយកម៉េមូរីផ្ទុកទិន្នន័យក្នុងម៉ាស៊ីនក្នុងទំហំ 3GB ដើម្បីបូកបញ្ចូលបន្ថែមទៅលើទំហំរបស់រ៉េម ដើម្បីជួយបង្កើនល្បឿនប្រើប្រាស់កាន់តែខ្លាំង។
កំពូលស្មាតហ្វូនជំនាន់ថ្មីរបស់ vivo មួយនេះមានថ្មទំហំ 4,200mAh និងប្រើបច្ចេកវិទ្យាសាកភ្លើងល្បឿនលឿនកំលាំង 55W Flash Charge។ ស្មាតហ្វូននេះប្រើប្រាស់ស៊ីមកាតបានពីរជាប្រភេទ Nano SIM តែមិនអាចដាក់បន្ថែមទំហំម៉េមូរីក្រៅបានទេ។ vivo X60 Pro+ ទ្រទ្រង់ដំណើរដោយប្រតិបត្តិការថ្មីហៅថា Origin OS1.0 ទ្រទ្រង់ដោយ Android 11។ បន្ថែមពីនេះ X60 Pro+ មានភ្ជាប់មកជាមួយនូវបច្ចេកវិទ្យា In-display fingerprint scanner + Face Unlock សម្រាប់ស្កែនដោះសោរសុវត្ថិភាព, មុខងារ NFC, Bluetooth 5.2 ទ្រទ្រង់នូវមុខងារ SBC, AAC, aptX HD, និង LDAC ទៀតផង។
និយាយពីប្រព័ន្ធកាមេរ៉ារបស់ vivo X60 Pro+ វិញគឺត្រូវបានក្រុមហ៊ុនដំឡើងនូវប្រព័ន្ធលែនកាមេរ៉ារបស់ក្រុមហ៊ុន ZEISS ស៊េរី Zeiss T* coating ភ្ជាប់ដោយសែនស័រផលិតរូបភាពគោលចំនួនពីរគ្រាប់ និងសែនស័រជំនួយពីរគ្រាប់ទៀតសរុបទាំងអស់ 4 គ្រាប់។ សម្រាស់សែនស័រផលិតរូបភាពគោលគ្រាប់ទីមួយមានទំហំ 48MP (aperture F/2.2) ជាសែនស័រ Sony IMX598 ប្រភេទ Focal Length ខ្នាត 14mm ភ្ជាប់ដោយមុខងារទប់លំនឹង 4-axis OIS និង gimbal stabilization system ហើយក៏ដើរតួរជាលែន Ultra Wide Angle កម្រិត 114 ដឺក្រេ ផងដែរ។ រីឯសែនស័រគោលគ្រាប់ទីពីរមានទំហំ 50MP (aperture F/1.57) ជាសែនស័រ Samsung ISOCELL GN1 ខ្នាង 1/1.3”។ សម្រាប់សែនស័រពីរគ្រាប់ផ្សេងទៀតក្នុងនោះមាន Telephoto Lens ទំហំ 32 MP (aperture F/2.0) ជាប្រភេទ Focal Length ខ្នាត 50mm និង Periscope Lens ទំហំ 8MP (Aperture F/3.4) ភ្ជាប់នូវមុខងារ OIS មានលទ្ធភាពអាចពង្រីកប្លង់ថត Optical Zoom បាន 5x និង Digital Zoom បាន 60x ។
vivo បាននិយាយថា ប្រព័ន្ធកាមេរ៉ាក្រោយរបស់ X60 Pro+ ភ្ជាប់នូវមុខងារ AF Autofocus, video stabilization និង Super Night Mode 2.0 ដែលជួយបង្កើនពន្លឺនៅលើប្លង់ថតពេលរាត្រីបានប្រសើរជាងមុន 38.8% ជាមួយល្បឿន Focus លឿនជាងមុន 22%។ បន្ថែមពីនេះប្រព័ន្ធកាមេរ៉ា vivo X60 Pro+ ក៏មានសមត្ថភាពអាចផលិតសាច់វីដេអូបានដល់កម្រិត 8K@30fps និងវីដេអូ Slow-Motion ដល់កម្រិត 1080px ផងដែរ។ ងាកមកកាមេរ៉ាសែលហ្វីមួយគ្រាប់ដែលជាលែនទំលុះអេក្រង់វិញគឺមានទំហំធំដល់ 32MP ជាមួយកម្រិត aperture F/2.45 ជាមួយសមត្ថភាពផលិតសាច់វីដេអូបានដល់ 4K@30fps។
vivo បានប្រកាសដាក់អោយអតិថិជនធ្វើការបញ្ជាទិញ vivo X60 Pro+ ចាប់ថ្ងៃប្រកាសចេញនេះតាមរយះហាងលក់អនឡាញ vivo online shop និង JD.com រីឯការចេញលក់ផ្លូវការណ៍គឺនៅថ្ងៃសៅរ៍ ទី 23 ខែមករា ស្អែកនេះ។ ចំពោះតម្លៃវិញ ម៉ូដែលមានរ៉េមទំហំ 8GB ម៉េមូរីទំហំ 128GB គឺខ្ទង់ CNY 4,998 ឬប្រហែល $773 និងម៉ូដែលមានរ៉េមទំហំ 12GB/ម៉េមូរីទំហំ 256GB គឺខ្ទង់ CNY5,998 ឬប្រហែល $927៕
