ស្មាតហ្វូន OnePlus Nord CE 5G ត្រូវគេបញ្ជាក់ថា នឹងក្លាយជាស្មាតហ្វូនជំនាន់បន្ទាប់របស់ក្រុមហ៊ុន OnePlus ដែលនឹងបង្ហាញខ្លួនឆាប់ៗនេះហើយ។ តាមដំណឹងចុងក្រោយបង្ហាញថា ស្មាតហ្វូននេះ គ្រោងនឹងប្រកាសចេញនៅថ្ងៃទី 10 ខែមិថុនានេះ។ ក្រៅពីការបែកធ្លាយនេះ ក្រុមហ៊ុននេះ ក៏បានទម្លាយព័ត៌មានជាច្រើនរបស់ស្មាតហ្វូននេះ នៅមុនការប្រកាសជាផ្លូវការផងដែរ។ នៅពេលនេះ ក្រុមហ៊ុន Amazon នៅក្នុងប្រទេសឥណ្ឌា ក៏ទម្លាយនូវលក្ខណៈសំខាន់ចំនួន 2 របស់ស្មាតហ្វូននេះផងដែរ។
ក្រុមហ៊ុន Amazon នៅក្នុងប្រទេសឥណ្ឌា នឹងក្លាយជាក្រុមហ៊ុនលក់រាយទៅលើស្មាតហ្វូន OnePlus Nord CE 5G ផ្តាច់មុខនៅក្នុងប្រទេសនេះ។ នៅមុនការបង្ហាញវត្តមានរបស់ស្មាតហ្វូននេះ ក្រុមហ៊ុន eCommerce ដ៏ធំមួយរបស់សហរដ្ឋអាមេរិក ក៏ចាប់ផ្តើមធ្វើការផ្សព្វផ្សាយទៅលើស្មាតហ្វូននេះផងដែរ។ នៅក្នុងរបាយការណ៍មួយចេញពី 91Mobiles នោះ ក្រុមហ៊ុនAmazon នៅក្នុងប្រទេសឥណ្ឌា បានបង្កើតនូវសំណួរនៅលើ App របស់ខ្លួនដែលមានការទម្លាយអំពីម៉េមូរី និងពណ៌របស់ស្មាតហ្វូន OnePlus Nord CE 5G ។
ស្មាតហ្វូន OnePlus Nord CE 5G នេះ មានរ៉េមទំហំ 8GB និងម៉េមូរីទំហំ 128GB និងមានពណ៌ Charcoal Ink។ ក្រុមហ៊ុនOnePlus ក៏បានបង្ហើបថា ស្មាតហ្វូននេះ នឹងមានតម្លៃទាបជាងស្មាតហ្វូន OnePlus Nord ផងដែរ។ នៅក្នុងរបាយការណ៍ជាច្រើននោះ បានទម្លាយថា ស្មាតហ្វូន OnePlus Nord CE 5G នេះ នឹងមានអេក្រង់ទំហំ 6.43-inch 90Hz AMOLED បន្ទះឈីប Qualcomm Snapdragon 750G SoC កាមេរ៉ា 3 គ្រាប់ខាងក្រោយទំហំ 64MP និងកាមេរ៉ាខាងមុខទំហំ 16MP selfie ៕
