បន្ទាប់ពីក្រុមហ៊ុន Huawei ត្រូវបានបញ្ចូលទៅក្នុងបញ្ជីខ្មៅ ‘Entity List’ របស់សហរដ្ឋអាមេរិកកាលពីឆ្នាំមុននេះ។ បានបង្ខំឱ្យក្រុមហ៊ុនជាច្រើនរបស់អាមេរិក បញ្ឈប់អាជីវកម្មរបស់ខ្លួនជាមួយក្រុមហ៊ុនទូរគមនាគមន៍យក្សរបស់ចិន។ ឥឡូវនេះ បន្ទាប់ពីរយៈពេលមួយឆ្នាំ នៃការហាមឃាត់នោះ គឺត្រូវបានពង្រីកបន្ថែមទៀតហើយសម្រាប់មួយឆ្នាំទៀតបន្ថែមលើផែនការដែលនឹងកាត់ផ្តាច់ក្រុមហ៊ុន Huawei ពីក្រុមហ៊ុនផ្គត់ផ្គង់បន្ទះឈីបសកល ក្នុងនោះមានដូចជាក្រុមហ៊ុន TSMC ជាដើម។ ដើម្បីទប់ទល់នឹងវិធានការដ៏ឃោរឃៅទាំងនេះ ប្រទេសចិន បានត្រៀមខ្លួនជាស្រេចនូវ“ បញ្ជីឈ្មោះអង្គភាពដែលមិនអាចជឿទុកចិត្តបាន” រួចហើយ នេះ បើយោងតាមរបាយការណ៍របស់សារព័ត៌មាន Global Times ។
បញ្ជីឈ្មោះអង្គភាពដែលមិនគួរទុកចិត្តរបស់ក្រសួងពាណិជ្ជកម្មចិន (MOFCOM) នឹងរួមបញ្ចូល“ អង្គការបរទេស បុគ្គល និងក្រុមហ៊ុនជាច្រើនដែលរារាំង ឬបិទខ្សែសង្វាក់ផ្គត់ផ្គង់ ឬចាត់វិធានការរើសអើងចំពោះហេតុផលមិនមែនពាណិជ្ជកម្មដែលសកម្មភាពទាំងនេះបង្កគ្រោះថ្នាក់ដល់អាជីវកម្មរបស់ក្រុមហ៊ុនចិន ក៏ដូចជាអ្នកប្រើប្រាស់សកល និងក្រុមហ៊ុនជាច្រើនផងដែរ” ។ ក្រុមហ៊ុន ដែលបានចុះបញ្ជីនឹងត្រូវប្រឈមនឹងវិធានការច្បាប់ និងរដ្ឋបាលដែលចាំបាច់ ហើយសាធារណៈជនចិនក៏នឹងត្រូវបានព្រមានប្រឆាំងនឹងក្រុមហ៊ុន ដើម្បីកាត់បន្ថយហានិភ័យផងដែរ។ រដ្ឋាភិបាលចិន កំពុងផ្តោតលើក្រុមហ៊ុនអាមេរិកជាច្រើនខាងក្រោមនេះដែលពឹងផ្អែកភាគច្រើនលើប្រទេសចិន។
•Apple
•Qualcomm
•Cisco
•Boeing
បញ្ហាសម្រាប់ក្រុមហ៊ុន Huawei ចាប់ផ្តើមប្រមូលផ្ដុំគ្នានៅដើមឆ្នាំ 2018 នៅពេលដែលក្រុមហ៊ុន AT&T បានទម្លាក់ចោលនូវផែនការលក់ស្មាតហ្វូន Mate 10 Pro ដោយសារមានសម្ពាធពីរដ្ឋាភិបាលអាមេរិក។ ក្រោយមកទៀតការដាស់តឿនពី FBI, CIA, NSA និងទីភ្នាក់ងារស៊ើបការណ៍សម្ងាត់អាមេរិកចំនួន 3 ផ្សេងទៀត ឱ្យបញ្ឈប់ការប្រើប្រាស់ ឬទិញផលិតផលពីក្រុមហ៊ុន Huawei និង ZTE។ ក្រុមហ៊ុនទាំងនេះ ក្រោយមកត្រូវបានហាមឃាត់មិនឱ្យផ្គត់ផ្គង់ឧបករណ៍ទូរគមនាគមន៍សម្រាប់ហេដ្ឋារចនាសម្ព័ន្ធទៅលើបច្ចេកវិទ្យា 5G នោះទេ។ មន្រ្តីសហរដ្ឋអាមេរិកថែមទាំងបានព្រមានប្រទេសដទៃទៀតឱ្យចៀសវាងការប្រើប្រាស់បច្ចេកវិទ្យាទាំងពីរម៉ាកនេះផងដែរ។
បន្ទាប់មកនៅខែឧសភាឆ្នាំ 2019 ទីបំផុតក្រុមហ៊ុន Huawei ត្រូវបានដាក់បន្ថែមទៅក្នុង“ បញ្ជីខ្មៅ” ហើយវាធ្វើអោយក្រុមហ៊ុននេះបាត់បង់អាជ្ញាប័ណ្ណ GMS (Google Mobile Services) របស់ខ្លួនផងដែរ។ ចាប់តាំងពីពេលនោះមកការលក់ស្មាតហ្វូនយីហោ Huawei និង Honor មានបញ្ហានៅទូទាំងពិភពលោក ប៉ុន្តែវាបានកើនឡើងខ្ពស់នៅក្នុងប្រទេសចិន។ ក្រុមហ៊ុន Huawei បានអភិវឌ្ឍទៅលើប្រព័ន្ធប្រតិបត្តិការ HMS (Huawei Mobile Services) ដើម្បីបំពេញចន្លោះប្រហោងដែលនៅសល់ពីប្រព័ន្ធប្រតិបត្តិការ GMS សម្រាប់ទីផ្សារពិភពលោក។ ទោះជាយ៉ាងណាក៏ដោយ AppGallery របស់ក្រុមហ៊ុននៅតែខ្វះកម្មវិធីដែលប្រើប្រាស់ជាច្រើន ហើយអ្នកប្រើប្រាស់ភាគច្រើនពឹងផ្អែកលើកម្មវិធី Google Apps គឺមិនមាននៅលើស្មាតហ្វូនស៊េរីថ្មីរបស់ក្រុមហ៊ុន Huawei / Honor ទេ៕