ប្រទេសចិនទំនងជានឹងក្លាយជាប្រទេសដំបូងគេលើលោកដែលបានឃើញយានយន្តហៅនៅលើវេហាស៍ក្នុងពេលឆាប់ៗនេះ ដោយសារតែក្រុមហ៊ុនផលិតរថយន្ត Xpeng បានធ្វើការដាក់បង្ហាញឡានអាចហោះហើរបានដំបូងគេក្នុងលោក ដោយបានបើកការសាកល្បងហោះហើរកាលពីពេលថ្មីៗនេះ។ ហើយនៅពេលនេះ បើតាមដំណឹងចុងក្រោយនេះ បានបញ្ជាក់ថា ឡានហោះបានរបស់ Xpeng និង AeroHT គឺបានខិតជិតដល់ការសម្រេចអនុម័តក្នុងការដាក់ឲ្យដំណើរការហោះហើរជាផ្លូវការណ៍ហើយ។
ក្រុមហ៊ុនផលិតរថយន្តខ្នាតយក្សរបស់ចិន Xpeng និងដៃគូរបស់ខ្លួន AeroHT គ្រោងនឹងផ្លាស់ប្តូរការដឹកជញ្ជូនក្នុងទីក្រុងជាមួយនឹងមហិច្ឆតារបស់ពួកគេចូលទៅក្នុងឧស្សាហកម្មរថយន្តអាចហោះហើរបាន។ AeroHT ដែលជាក្រុមហ៊ុនបុត្រសម្ព័ន្ធរបស់ Xpeng បាននិងកំពុងដំណើរការអភិវឌ្ឍរថយន្តហោះហើររបស់ខ្លួនអស់រយៈពេលមួយទសវត្សរ៍មកហើយ ដោយការធ្វើតេស្តហោះហើររយៈកម្ពស់ទាប គឺទទួលបានជោគជ័យកាលពីពេលថ្មីៗនេះ នៅក្នុងសង្កាត់ពាណិជ្ជកម្មកណ្តាលដ៏មមាញឹករបស់ទីក្រុង Guangzhou ដែលបានបង្ហាញពីវឌ្ឍនភាពរបស់វា។
លោក He Xiaopeng នាយកប្រតិបត្តិរបស់ក្រុមហ៊ុន បានគូសបញ្ជាក់អំពីសក្តានុពលផ្លាស់ប្តូរនៃការធ្វើដំណើរតាមអាកាសក្នុងរយៈកម្ពស់ទាបក្នុងអំឡុងពេលសុន្ទរកថារបស់គាត់នៅឯព្រឹត្តិការណ៍ Auto China 2024 ដោយបង្ហាញពីផលប៉ះពាល់យ៉ាងខ្លាំងទៅលើជីវិតរស់នៅប្រចាំថ្ងៃនៅក្នុងទីក្រុង។ សម្រាប់ឡានហោះ AeroHT ដែលនឹងចេញនាពេលខាងមុខនេះ គ្រោងនឹងចាប់ផ្តើមទទួលការបញ្ជាទិញមុននៅក្នុងត្រីមាសទី 4 ក្នុងឆ្នាំនេះ។ AeroHT ប្រើប្រាស់នូវប្រព័ន្ធម៉ូទ័រអគ្គិសនីពីរ dual-mode electric vertical take-off and landing (eVTOL) សម្រាប់ជម្រុញស្លាបទាំងបួនក្នុងការហោះឡើងលើ និងចុះចត ដែលមានសមត្ថភាពផ្លាស់ប្តូរយ៉ាងរលូនរវាងការធ្វើដំណើរតាមផ្លូវគោក និងផ្លូវអាកាស។
យ៉ាងណាមិញសម្រាប់កាលបរិច្ឆេទចេញលក់ និងអំពីតម្លៃផ្លូវការណ៍មិនទាន់ត្រូវបានបញ្ចេញនៅឡើយទេ ប៉ុន្តែមានការប៉ាន់ស្មានតម្លៃថាអាចខ្ទង់ប្រហែល 1 លានយន់ ឬ $138,000។ សម្រាប់ពេលបច្ចុប្បន្ននេះ ក្រុមហ៊ុន Xpeng និង AeroHT កំពុងនាំមុខគេទៅលើការធ្វើពាណិជ្ជកម្មរថយន្តហោះហើរទូទាំងពិភពលោក។ ហើយក្នុងពេលនេះរដ្ឋបាលអាកាសចរណ៍ស៊ីវិលប្រទេសចិន បាននឹងកំពុងពិនិត្យ និងធ្វើការវាយតម្លៃបញ្ជាក់សម្រាប់ប្រព័ន្ធដំណើរការ eVTOL របស់ ឡានហោះ AeroHT នេះ ហើយក្រុមហ៊ុន Xpeng ក៏កំពុងរៀបចំសម្រាប់ការបញ្ជាទិញជាមុន ដោយក្នុងដំណាក់កាលនេះ ត្រូវបានកំណត់សម្រាប់ការផ្លាស់ប្តូរគំរូនៃការធ្វើដំណើរចរនៅក្នុងទីក្រុង៕