Huawei បានវិនិយោគទឹកប្រាក់ជាង 1 ពាន់លានយ៉ន់ទៅលើការស្រាវជ្រាវ និងអភិវឌ្ឍនារយៈពេលជាង 10 ឆ្នាំមកនេះ

កាលពីថ្ងៃទី 29 ខែមេសាឆ្នាំ 2024 នេះ ក្រុមហ៊ុន Huawei បានរៀបចំនូវព្រឹត្តិការណ៍ Digital Intelligence Asia-Pacific Summit នៅក្នុងទីក្រុងបាងកក។ នៅក្នុងព្រឹត្តិការណ៌នោះ នាយកប្រតិបត្តិម្នាក់នៅក្នុងចំណោមនាយកប្រតិបត្តិជាច្រើន បានទម្លាយថា ក្រុមហ៊ុនបច្ចេកវិទ្យាយក្សនេះ បានវិនិយោគទឹកប្រាក់ច្រើនជាង 1 ពាន់លានយ៉ន់ នៅក្នុងការស្រាវជ្រាវ និងអភិវឌ្ឍទៅលើរបកគំហើញនៃផលិតផលបច្ចេកវិទ្យាថ្មី នៅក្នុងរយៈពេលជាង 10 ឆ្នាំនេះ។

នៅក្នុងការថ្លែងសន្ទរកថានេះ អនុប្រធានរបស់ក្រុមហ៊ុន Huawei និង CFO លោកស្រី  Meng Wanzhou បាននិយាយថា ក្រុមហ៊ុននេះ បានវិនិយោគទឹកប្រាក់ច្រើនជាង 1 ពាន់លានយ៉ន់ នៅក្នុងការស្រាវជ្រាវ និងការអភិវឌ្ឍក្នុងរយៈពេលជាង 10 ឆ្នាំមកនេះ ដែលតួរលេខនេះ គឺជាការវិនិយោគដ៏ធំរបស់ក្រុមហ៊ុននេះ ទៅលើផលិតផលបច្ចេកវិទ្យាកាន់តែប្រសើរជាងមុន និងបំពាក់នូវបច្ចេកវិទ្យាថ្មីៗជាច្រើនទៀត។

លោកស្រី បានបន្ថែមថា ក្រុមហ៊ុនចិនមួយនេះ បានផ្តល់នូវអាទិភាពយ៉ាងខ្លាំងទៅលើការស្វែងរកនូវរបកគំហើញថ្មី។ គោលដៅរបស់ក្រុមហ៊ុននេះ គឺបង្កើតនូវផលិតផលជាច្រើនដែលមានបំពាក់នូវបច្ចេកវិទ្យាកម្រិតខ្ពស់ ផលិតផលដែលចាំបាច់ និងងាយស្រួលក្នុងការប្រើប្រាស់សម្រាប់អតិថិជន ហើយពួកគេទទួលបាននូវផលិតផលដែលមានគុណប្រយោជន៍ច្រើនក្នុងការប្រើប្រាស់នៅក្នុងសកម្មភាពប្រចាំថ្ងៃ។ នៅក្នុងព្រឹត្តិការណ៍មុននេះ នាយកប្រតិបត្តិរបស់ក្រុមហ៊ុន Huawei លោក Wang Tao បាននិយាយថា ក្រុមហ៊ុននេះ បានចំណាយទឹកប្រាក់ច្រើនជាង 20% ទៅលើប្រាក់ចំណេញរបស់ក្រុមហ៊ុនសម្រាប់ការស្រាវជ្រាវ និងអភិវឌ្ឍ។ ការវិនិយោគនេះ បានធ្វើអោយក្រុមហ៊ុននេះ បានក្លាយជាក្រុមហ៊ុនស្រាវជ្រាវ និងអភិវឌ្ឍកំពូលទាំង 5 របស់ពិភពលោក។

លោកស្រី Meng Wanzhou បាននិយាយថា “ក្រុមហ៊ុន Huawei បានយកចិត្តទុកដាក់យ៉ាងខ្លាំងទៅលើការស្រាវជ្រាវ និងរបកគំហើញនៃបច្ចេកវិទ្យាថ្មី រួមទាំងការវិនិយោគទឹកប្រាក់ច្រើនជាង 1 ពាន់លានដុល្លារអាមេរិកទៅលើការស្រាវជ្រាវ និងអភិវឌ្ឍនៅក្នុងរយៈពេលជាង 10 ឆ្នាំនេះ។” លោកស្រី Meng បាននិយាយថា ក្រុមហ៊ុន Huawei នឹងបន្តក្នុងការអភិវឌ្ឍទៅលើផលិតផលដែលមានតម្លៃ និងសំខាន់សម្រាប់អតិថិជន។ 

ក្រុមហ៊ុននេះ នឹងផ្តល់នូវបច្ចេកវិទ្យា 5G-A, F5.5G, cloud និងសេវាកម្មឌីជីថលជាច្រើនទៀតសម្រាប់ប្រើប្រាស់នៅក្នុងប្រទេសនៅតំបន់អាស៊ីប៉ាស៊ីហ្វិកដែលអាចរីករាយជាមួយនឹងបច្ចេកវិទ្យាឌីជីថលដ៏ឆ្លាតវៃបំផុត។ គួរបញ្ជាក់ផងដែរ ក្រុមហ៊ុន Huawei បានរៀបចំនូវព្រឹត្តិការណ៍ Digital Intelligence Summit ជាមួយនឹង ASEAN Foundation ។ អ្នកចូលរួមក្នុងព្រឹត្តិការណ៍នេះគឺមានជាង 2000 នាក់ ដែលមានដៃគូសហការ អ្នកជំនាញ និងអ្នកវិភាគជាច្រើនចេញពី 15 ប្រទេសដែលបានចូលរួមនៅក្នុងព្រឹត្តិការណ៍នេះ៕